විමල් දිනපොතෙන් ගහපු ගැහිල්ල හෙළිදරව් වෙයි | දිනමිණ

විමල් දිනපොතෙන් ගහපු ගැහිල්ල හෙළිදරව් වෙයි

කමනී අල්විස්

 ඉදිකිරීම් නිවාස පොදු පහසුකම් අමාත්‍ය ධුරය දරද්දී විමල් වීරවංශ මහතා සිය අමාත්‍යාංශය යටතේ පවතින ආයතනවලින් දිනපොත් මුද්‍රණයට එකතුකරගත් රුපියල් ලක්ෂ එකසිය හතළිහට සහ එම අමාත්‍යාංශය යටතේ පවතින ඕෂන් වීව් සමාගම දිනපොත් මුද්‍රණයට වෙන් කළ මුදලින් ඉතිරි වූ රුපියල් ලක්ෂ එකසිය තිස්තුනක මුදලට සිදුවූයේ කුමක්ද එය කාගේ සාක්කුවකට ගියේද යන කාරණාවට පිළිතුරු ලබාදෙන ලෙසට එජාප හිටපු පාර්ලිමේන්තු මන්ත්‍රී නලීන් බණ්ඩාර මහතා විමල් වීරවංශ මහතාට අභියෝගයක් කළේය. එම කාරණාව පිළිබඳව මූල්‍ය අපරාධ කොට්ඨාසය පරීක්ෂණ පවත්වයි.

එම අභියෝගය කළේ ඊයේ (17) සිරිකොත පක්ෂ මූලස්ථානයේදී පැවැති හෙළිදරව්ව අංක 16 මාධ්‍ය හමුවේදීය. අදාළ දිනපොත් ගනුදෙනු පිළිබඳව නලීන් බණ්ඩාර මහතා මෙසේ විස්තර කළේය.

2015 වසර වෙනුවෙන් දිනපොත් මුද්‍රණය කිරීමට එම අමාත්‍යාංශය යටතේ පවතින ඕෂන් වීව් නමැති සමාගමට භාරදී තිබේ. ඒ සඳහා මිල ගණන් කැඳවීමට අදාළ සමාගම පියවර ගත්තේය. ඒ අනුව නුගේගොඩ ඉමාෂි සමාගම දිනපොත් හතළිස්දහසක් මුද්‍රණය කිරීමට රුපියල් ලක්ෂ 140ක ඇස්තමේන්තු ඉදිරිපත් කළේය. එක දිනපොතකට වැය වන මුදල රුපියල් තුන්සිය පනහකි.

එම ඇස්තමේන්තුව ඕෂන්වීව් සමාගම පිළිගත්තේය. එහිදී මුද්‍රණය කෙරුණේ දිනපොත් දෙදහසක් පමණි. ඒ සඳහා වියදම් වුණේ රුපියල් ලක්ෂ හතකි. එසේ නම් ඉතිරි රුපියල් ලක්ෂ එකසිය තිස්තුනට කුමක් සිදුවීද යන්න ගැටලුවකි.

එම ලක්ෂ 133ට අමතරව අමාත්‍යාංශය එකතු කරපු ලක්ෂ 140ක්ද වෙයි. ඒ ලක්ෂ 140ට සිදුවුණේ කුමක්ද යන්නටත් පිළිතුරු දෙන්නැයි හිටපු මන්ත්‍රී නලීන් බණ්ඩාර අභියෝග කරයි.


නව අදහස දක්වන්න