රිදියගම සෆාරි උයන සංචාරකයින්ගෙන් පිරෙයි | දිනමිණ

රිදියගම සෆාරි උයන සංචාරකයින්ගෙන් පිරෙයි

වසර 08 ක් පුරා බිලියන 15 ක් වැයකොට ඉදි කරමින් තිබූ රිදියගම සෆාරි උද්‍යානය විවෘත කර මාසයක කාලයක් ඉක්මවන්නටත් මත්තෙන් සංචාරකයින්ගෙන් පිරී ඉතිරී යනු ලැබීය. ශ්‍රී ලංකාවේ සත්ත්ව ලෝලීන්ට වෙනස් ආකාරයේ අත්දැකීමක් ලබා දෙන්නට මෙම සෆාරි උද්‍යානය සමත් වි ඇති අතර පසුගිය 15, 16 සහ 17 යන දින වලදී සත්වෝද්‍යාන ඉතිහාසයෙහි වාර්තාගත ආදායමක් ලබා ගන්නට ද සමත් වි ඇත.
 
අප්‍රේල් මස 15 වන දින සංචාරකයින් 2,019 ක් පැමිණි අතර, ආදායම රුපියල් 334,000 ක් විය. අප්‍රේල් මස 16 වන දින සංචාරකයින් 20,982 ක් පැමිණි අතර, ආදායම රුපියල් 465,000 ක් විය. අප්‍රේල් මස 17 වන දින සංචාරකයින් 3,160 ක් පැමිණි අතර, ආදායම රුපියල් 475,000 ක් විය. 
 
පසුගිය දින තුනෙහිම අධික සංචාරකයින් ප්‍රමාණයක් පැමිණීම හේතුවෙන් සෆාරි උද්‍යානයට නව බස් රථ 04 ක් කුලී පදනම යටතේ ගෙන්වා ගැනීමට ද සිදු වී ඇත. මෙය සංචාරකයින්ගේ පහසුව උදෙසා අමාත්‍යවරයා විසින් ගනු ලැබූ තීරණයක් වන අතර, ඉදිරියේ දී සංචාරක පහසුව සඳහා නව වැඩ පිළිවෙළවල් රැසක් දියත් කිරීමට අමාත්‍යංශය සහ සත්වෝද්‍යාන දෙපාර්තමේන්තුව මේ වන විටත් සාකච්ඡා කොට අවසන්ය.
 
නිදැල්ලේ සැරිසරන සතුන් දැක බලා ගැනීමට පාසැල් දරු දැරියන් විශාල ප්‍රමාණයක් මෙම සෆාරි උද්‍යානයට පැමිණ ඇති බව ද හම්බන්තොට සෆාරි උද්‍යාන කාර්යය මණ්ඩලය පවසයි.
 

නව අදහස දක්වන්න