රාජ්‍ය සාහිත්‍ය සම්මාන උළෙලේ හොඳම සිංහල නවකතාව | දිනමිණ

රාජ්‍ය සාහිත්‍ය සම්මාන උළෙලේ හොඳම සිංහල නවකතාව

කීර්ති වැලිසරගේ රචිත ‘ගරුඬ මුහුර්තය’

මෙවර රාජ්‍ය සාහිත්‍ය සම්මාන ප්‍රදානෝත්සවයේදී (2017) හොඳම ස්වතන්ත්‍ර සිංහල නවකතාව ලෙස කීර්ති වැලිසරගේ විසින් රචිත ගරුඬ මුහුර්තය කෘතියද, හොඳම ඉංග්‍රීසි නවකතාව ලෙස නයෝමි මුණවීර විසින් රචිත What Lies Between Us කෘතියද, හොඳම දමිළ නවකතාව ලෙස එම්. බාලසිංහම් විසින් රචිත තළම්පු කෘතියද සම්මානයට පාත්‍රවිය.

මෙම කෘතීන් සඳහා රාජ්‍ය සාහිත්‍ය සම්මාන ප්‍රදානය ජනාධිපති මෛත්‍රීපාල සිරිසේන මහතා අතින් සිදුවූ අතර මෙම අවස්ථාව සඳහා අභ්‍යන්තර කටයුතු, වයඹ සංවර්ධන හා සංස්කෘතික කටයුතු ඇමැති එස්. බී නාවින්න මහතා, එම අමාත්‍යාංශයේ ලේකම් ඩී. ස්වර්ණපාල මහතා, සංස්කෘතික කටයුතු දෙපාර්තමේන්තුවේ අධ්‍යක්ෂ අනූෂා ගෝකුල ප්‍රනාන්දු මහත්මිය, රාජ්‍ය සාහිත්‍ය උපදේශක මණ්ඩලයේ සභාපති මහාචාර්ය සමන්ත හේරත් මහතා සහභාගි විය.

මෙම සම්මාන ප්‍රධානෝත්සවය පසුගියදා(8) කොළඹ, නෙළුම් පොකුණ රඟහලේ දී පැවැත්විණ.

සිංහල, දමිළ, ඉංග්‍රීසි සාහිත්‍ය සඳහා ජීවිතයේ එක්වරක් පමණක් ලැබෙන සාහිත්‍යරත්න සම්මානයෙන් මෙම 2017 රාජ්‍ය සාහිත්‍ය සම්මාන ප්‍රදානෝත්සවයේ දී මහාචාර්ය ආරිය රාජකරුණා මහතා, නිර්වයි පොන්අයියන් මහතා සහ ජීන් අර්සනායගම් මහත්මිය පිදුම් ලැබූහ.

මෙම උත්සවයේ දී රාජ්‍ය සාහිත්‍ය උත්සවයට සමගාමීව ප්‍රකාශයට සාහිත්‍ය විශේෂ කලාපය(2017) ශාස්ත්‍රීය සංග්‍රහය සහ මෙවර සම්මානයෙන් පිදුම් ලබන සාහිත්‍ය කෘතින් මෙහි දී එස්.බී නාවින්න ඇමැතිවරයා සහ සංස්කෘතික කටයුතු දෙපාර්තමේන්තුවේ අධ්‍යක්ෂක අනූෂා ගෝකුළ ප්‍රනාන්දු මහත්මිය විසින් ජනාධිපති මෛත්‍රීපාල සිරිසේන මහතා වෙත පිළිගන්වන ලදී. සාහිත්‍ය විශේෂ කලාප (2017) පිළිගැන්වීමේ අවස්ථාව සඳහා එය සම්පාදනය කළ මහාචාර්ය සමන්ත හේරත්, පර්සි ජයමාන්න, මහාචාර්ය රෝහිණී පරණවිතාන, තිලකරත්න කුරුවිට බණ්ඩාර, බුද්ධදාස ගලප්පත්ති සහ දමිළ සාහිත්‍ය විශේෂ කලාපය සංස්කරණය කළ එස්. මුරලිදරන් සහ ආචාර්ය ශ්‍රී ප්‍රශාන්තන්, ඉංග්‍රීසි සාහිත්‍ය විශේෂ කලාපයේ සංස්කරණය කළ ආචාර්ය චන්ද්‍රා අමරසේකර, මහත්ම මහත්මීන් සහභාගි වූහ. මෙම ශාස්ත්‍රීය සංග්‍රහ මෙරට විශ්වවිද්‍යා මහාචාර්යවරුන්ගේ කතිකාචාර්යවරුන්ගේ, විද්වතුන්ගේ ලේඛක ලේඛිකාවන්ගේ ලිපිවලින් සම්පාදිතය.

රාජ්‍ය සාහිත්‍ය සම්මාන උළෙලේ පළමු අධියරේ සම්මාන ප්‍රදානය සඳහා මහාචාර්ය ජේ.බී දිසානායක, රාජ්‍ය සාහිත්‍ය උපදේශක මණ්ඩලයේ සාමාජික මහාචාර්ය රෝහිණී පරණවිතාන මහත්මිය, එහි සාමාජික බුද්ධදාස ගලප්පත්ති මහතා, ප්‍රවීන සාහිත්‍යවේ දී නඩරාජා මහතා එක්වූ අතර එහි දී හොඳම පිටකවර නිර්මාණය වෙනුවෙන් නොනවතින දඩයම කෘතියේ පිටකවරය නිර්මාණය කළ ශාන්ත කේ. හේරත් ද හොදම නිමාවෙන් හා පිටු සැකැස්මෙන් යුත් නිර්මාණ ග්‍රන්ථය සඳහා සම්ප්‍රදාන(මහාචාර්ය කේ.එම්.පී කුලසේකර අභිනන්දන ශාස්ත්‍රය සංග්‍රහය) සඳහා අරුණ ලොකුලියන ද, ළමා සාහිත්‍ය කෘති පළමු කාණ්ඩය සඳහා අවුරුදු කෑම කෘතිය රචනා කළ සිබිල් වෙත්තසිංහ ද දෙවන කාණ්ඩය සඳහා මගේ ගුරුතුමා කෘතිය රචනා කළ තනූජා එම් අයගමද රාජ්‍ය සාහිත්‍ය සම්මානයෙන් හා මුදල් ත්‍යාගයෙන් පිදුම් ලැබූහ.

දමිළ ළමා සාහිත්‍ය කෘති පළමු කාණ්ඩය යටතේ උඩෛනංත පානෛ කෘතිය වෙනුවෙන් කුණනාදන් ද, දෙවන කාණ්ඩය යටතේ චින්තනෛක් කඩෙයිකල් කෘතිය වෙනුවෙන් අරුලානන්දම් ද ඉංග්‍රීසි ළමා සාහිත්‍ය කෘතිය වෙනුවෙන් True Sportsmanship කෘතිය රචනා කළ ජානකී ගලප්පත්ති ද හොඳම විද්‍යා සාහිත්‍ය කෘතිය(සිංහල) සඳහා සැඟවුණු ලොවක හුදෙකලා ගවේෂණය කෘතිය රචනා කළ හසිනී භාග්‍යා රත්නායකද, යොවුන් සාහිත්‍ය කෘතිය(සිංහල) සඳහා රාමා සහ දිනූ රචනා කළ අනුල ද සිල්වාද, දමිළ යොවුන් සාහිත්‍ය කෘතිය සඳහා ආන්මීක පොයිහෙයි කෘතිය සඳහා ආර්.වී කන්දස්වාමිද, ඉංග්‍රීසි යොවුන් සාහිත්‍ය කෘතිය සඳහා The New Child කෘතිය සඳහා සරාවි රණසිංහද සම්මාන හා මුදල් ත්‍යාග ලැබූහ.

මහාචාර්ය කලෝ ෆොන්සේකා මහතා, මහාචාර්ය රංජනී ඔබේසේකර මහත්මිය, රාජ්‍ය සාහිත්‍ය උපදේශක සභාවේ තිලකරත්න කුරුවිට බණ්ඩාර මහතා, සුගත් වටගෙදර මහතා සහ 1957 වර්ෂයේ පළමුවරට පැවැත්වූ රාජ්‍ය සාහිත්‍ය සම්මාන ප්‍රධානෝත්සවයේ දී සම්මානයට පාත්‍ර වූ සාහිත්‍ය විවේචනය නමැති කෘතිය රචනා කළ පණ්ඩිත අශෝක කරුණාරත්න මහතාද රාජ්‍ය සාහිත්‍ය සම්මාන ප්‍රධානෝත්සවයේ දෙවන වටයේ සම්මාන හා මුදල් ත්‍යාග පිරිනැමීමේ අවස්ථාවට සහභාගි වූහ.

එහි දී හොඳම පරිවර්තිත නාට්‍ය කෘතිය(සිංහල) වෙනුවෙන් ශ්‍රී හර්ෂදේව රචිත රත්නාවලී නාටිකා කෘතිය රචනා කළ වෝලටර් මාරසිංහද, පරිවර්තිත නාට්‍ය කෘතිය(දමිළ) වෙනුවෙන් කෝක්කේසිය වේණ්කඩ්ඩි වඩ්ඩම් කෘතිය රචනා කළ සම්මුගලිංගම්ද, හොඳම පරිවර්තිත කෙටිකතා සංග්‍රහය(සිංහල) වෙනුවෙන් වෙස්මුහුණ කෘතිය පරිවර්තනය කළ චන්දන මෙන්ඩිස්ද, හොඳම පරිවර්තික කෙටිකතා සංග්‍රහය( දමිළ) වෙනුවෙන් අවල් පෙයිහිරාල් පරිවර්තනය කළ අල් අස්මත් ද, හොඳම පරිවර්තිත නවකතාව( සිංහල) වෙනුවෙන් නොමේරූ තරුණයෙක්(1, 2, 3 කාණ්ඩ) පරිවර්තනය කළ ආනන්ද අමරසිරි ද, හොදම පරිවර්තිත නවකතාව(දමිළ) බෝගල සවුන්දිරිස් පරිවර්තනය කළ දික්වැල්ලේ කමල්ද, හොඳම පරිවර්තන නවකතාව(ඉංග්‍රීසි) Mirage පරිවර්තනය කළ සුබ්‍රමනියම් ජෙබන්සෙන් ද මෙහි දී සම්මානයෙන් හා මුදල් ත්‍යාගයෙන් පිදුම් ලැබූහ.

රාජ්‍ය සාහිත්‍ය සම්මාන උළෙලේ තෙවන අධියරේ සම්මාන සහ මුදල් ත්‍යාග පිරිනැමීමේ අවස්ථාවට මහාචාර්ය සුනිල් ආරියරත්න, රාජ්‍ය සාහිත්‍ය උපදේශක මණ්ඩලයේ සාමාජික ජයසුමන දිසානායක, පර්සි ජයමාන්න, ආචාර්ය ශ්‍රී ප්‍රසාන්ත්, ක්‍රිෂාන් සිරිවර්ධන මහත්වරුන් සහභාගි වූ අතර හොඳම විවිධ විෂයක පරිවර්තිත ග්‍රන්ථය( සිංහල) ලෙස මගේ ජීවිත කතාව හෙවත් සත්‍ය සොයා කළ මගේ පර්යේෂණයන්හි කතාව පරිවර්තනය කළ ගයාත්‍රී මනෝහාරී හේරත් ද, හොඳම පරිවර්තිත ශාස්ත්‍රීය හා පර්යේෂණ ග්‍රන්ථය(සිංහල) සඳහා සම සම්මාන දැහැමි අශෝක( අශෝක අධිරාජ්‍යයාගේ නිසැක ජීවන චරිතය) පරිවර්තනය කළ විමලසේන විදානපතිරණට සහ නිර්වාණය සහ ආවචත්‍යත්වය පරිවර්තනය කළ ඩෙන්සිල් සේනාධීරද සම්මාන හා මුදල් ත්‍යාග ලැබූහ.

විවිධ විෂයක ග්‍රන්ථ (මානව ශාස්ත්‍ර) සඳහා භාෂා විමංසා ග්‍රන්ථය රචනා කළ පියසිලි විජේමාන්න ද, හොඳම විවිධ විෂයක ග්‍රන්ථය(සමාජ ශාස්ත්‍ර) සඳහා පොලිස් ඉතිහාසය හා ප්‍රජා පොලිස් සේවය ග්‍රන්ථය රචනා කළ වික්ටර් පෙරේරාද, හොඳම විවිධ විෂයක ග්‍රන්ථය( ඉංග්‍රීසි) The Lion's Roar රචනා කළ ඇමැති සරත් අමුණුගමද, හොඳම ශාස්ත්‍රිය හා පර්යේෂණ ග්‍රන්ථය(සිංහල) සඳහා සංශයවාදී හා ඥාණයෙහි සීමා ග්‍රන්ථය රචනා කළ දිල්හාන් මනෝජ් රාජපක්ෂද, දමිළ ග්‍රන්ථය වන Ancient History of the Tamils in Adankappattu-Vanni කෘතිය රචනා කළ අරුණා සෙල්වදොරෙයි ද, ඉංග්‍රීසි ග්‍රන්ථය වන Crime Prevention Efforts in national Planning in Sri lanka කෘතිය රචනා කළ ප්‍රේමානන්ද අතපත්තු ද මෙහි දී සම්මානයෙන් පිදුම් ලැබූහ.

අභ්‍යන්තරකටයුතු වයඹ සංවර්ධන හා සංස්කෘතික කටයුතු ඇමැති එස්. බී නාවින්න මහතා, සංස්කෘතික කටයුතු දෙපාර්තමේන්තුවේ අධ්‍යක්ෂක අනූෂා ගෝකුළ ප්‍රනාන්දු මහත්මිය, රාජ්‍ය සාහිත්‍ය උපදේශක මණ්ඩලයේ සභාපති මහාචාර්ය සමන්ත හේරත් මහතා, එහි සාමාජික ආචාර්ය චන්ද්‍රා අමරසේකර, එස්. මුරලිදරන් මහතා රාජ්‍ය සාහිත්‍ය සම්මාන ප්‍රදානෝත්සවයේ සිව්වන අධියරේ සම්මාන සහ මුදල් ත්‍යාග පිරිනැමීමේ අවස්ථාවට සහභාගි වූහ.

එහි දී හොඳම ස්වතන්ත්‍ර නාට්‍ය කෘතිය(සිංහල) සඳහා හඩ නිහඩ නාට්‍ය කෘතිය රචනා කළ ජයලත් මනෝරත්න ද දමිළ කෘතිය සඳහා අට්ට්‍රෙයි තිංගල් රචනා කළ ජොන්සන් රාජ්කුමාර්ද, හොඳම ස්වතන්ත්‍ර ගීත රචනා සංග්‍රහය(සිංහල)සඳහා පිනිබර මලක් ගීත රචනා සංග්‍රය රචනා කළ කුලරත්න අරියවංශද, ස්වතන්ත්‍ර පද්‍ය කෘතිය සඳහා සමහර කමටහන් පද්‍ය කෘතිය රචනා කළ ලක්ෂාන්ත අතුකෝරලද, හොඳම ස්වතන්ත්‍ර කෙටිකතා සංග්‍රහය (සිංහල) සඳහා මකර තොරණ කෙටිකතා සංග්‍රහය රචනා කළ ප්‍රභාත් ජයසිංහද, දමිළ කෙටිකතා සංග්‍රහය සඳහා සොක්කපුරිච් සන්ගති රචනා කළ එම්.එම් නවුෂාඩ්ද, ඉංග්‍රීසි කෙටිකතා සංග්‍රහය සඳහා Mute Squalls රචනා කළ නිරංජලී මෝතා ද 2017 රාජ්‍ය සාහිත්‍ය සම්මාන ප්‍රදානෝත්සවයේ දී සම්මානයෙන් සහ මුදල් ත්‍යාගයෙන් පිදුම් ලැබූහ.

මෙහි දී 2016 දී රාජ්‍ය සාහිත්‍ය සම්මාන සඳහා නිර්දේශිත වැඩිම ග්‍රන්ථ සංඛ්‍යාවක් ප්‍රකාශයට පත් කළ ආයතනයට හිමිවන සම්මාන එස්.ගොඩගේ සහ සහෝදරයෝ හිමිකර ගන්නා ලදී.

උපාලි කරුණාරත්න
ඡායාරූපය- ශාන් රඹුක්වැල්ල


නව අදහස දක්වන්න

CAPTCHA
This question is for testing whether or not you are a human visitor and to prevent automated spam submissions.
Image CAPTCHA
Enter the characters shown in the image.

Or log in with...