කළුතර මැද පාරට උමං මාර්ග සහිත මංතීරු 7ක්

කළුතර නගරය මැදින් දිවෙන මැද පාර පදිකයන් සඳහා උමං මාර්ග සහිතව මංතීරු හතකින් යුතුව සකස් කිරීමට සැලැසුම් කර ඇතැයි මාර්ග සංවර්ධන අධිකාරියේ ඉංජිනේරු (සැලැසුම්) එච්. සිරිවර්ධන මහත්මිය කළුතර දිස්ත්‍රික් සම්බන්ධීකරණ කමිටු රැස්වීමේදී ප්‍රකාශ කළාය.

මේ සඳහා සැලසුම් යෝජනා 3ක් ඉදිරිපත්වී ඇති බවත් ඉන් පළමුවැන්න සඳහා රුපියල් මිලියන 250ක් ද, දෙවැනි යෝජනාව සඳහා රුපියල් මිලියන 540ක් හා තෙවැනි යෝජනාව සඳහා රුපියල් මිලියන 560ක් ද වශයෙන් ඇස්තමේන්තු කර ඇතැයි කළුතර දිස්ත්‍රික් සම්බන්ධිකරණ කමිටු රැස්වීමේදී අනාවරණය විය.

මේ අනුව කළුතර නගරයට වාහනවලින් පැමිණෙන ජනතාවට නගරයේ වාහන නවතා වෙළෙඳසල්වලට ගොස් භාණ්ඩ මිලට ගැනීමට මේ මගින් අවස්ථාව ලැබෙනු ඇත.

මෙම ව්‍යාපෘතිය යටතේ මහජනතාවට ගමන් කිරීම සඳහා පදික වේදිකා මෙන්ම පාර හරහා මාරුවීමට උමං මාර්ග ද ඉදිකෙරේ.

මේ පිළිබඳව කළුතර වෙළෙඳ සංගමය හා මහජන නියෝජිතයන් සමඟ ද සාකච්ඡා කරන බවත් කළුතර දැකුම්කළු නගරයක් බවට පත්කිරීමට සෑම දෙනාගේම සහය ලබාගන්නා බවත් කළුතර දිස්ත්‍රික් පාර්ලිමේන්තු මන්ත්‍රී ලක්ෂ්මන් විජේමාන්න මහතා මෙහිදී කීය.