ජනතා සේවයේදී විනිවිදභාවය රාජ්‍ය නිලධාරින්ගේ වගකීමක් | දිනමිණ

ජනතා සේවයේදී විනිවිදභාවය රාජ්‍ය නිලධාරින්ගේ වගකීමක්

නව වසරේ රාජකාරි අරඹමින් ජනාධිපති ලේකම් කියයි

රාජ්‍ය නිලධාරින් ජනතාවට සිය සේවාව සැපයීමේදී නීති රීතිවලට අනුගතව විනිවිද භාවයෙන් යුතුව කටයුතු කිරීම තුළින් රජයේ නව සංවර්ධන ක්‍රියාදාමයන්ගේ පාරිශුද්ධබව ඉස්මතු වන බව ජනාධිපති ලේකම් ඔස්ටින් ප්‍රනාන්දු මහතා පවසයි.

සැලසුම් සහගතව සහ සුහදතාවයෙන් යුතුව මහජන සේවය සඳහා සියලු රාජ්‍ය සේවකයින් වගකීමෙන් බැඳී සිටින බව ද මෙහිදී ඔස්ටින් ප්‍රනාන්දු මහතා අවධාරණය කෙළේ ය.

උදා වූ නව වසරේ රාජකාරි ආරම්භ කිරීමට ප්‍රථමයෙන් ඊයේ (02) පෙරවරුවේ ජනාධිපති කාර්යාලයේ දී ජනාධිපති කාර්යාලයීය කාර්යය මණ්ඩලය අමතමින් ජනාධිපති ලේකම්වරයා මේ බව සඳහන් කෙළේ ය.

රාජ්‍ය ආයතන අතර මනා සම්බන්ධතාවයකින් යුතුව කටයුතු කිරීමේ වැදගත්කම මෙහිදී පෙන්වා දුන් ජනාධිපති ලේකම්වරයා නව ආකල්ප තුළින් රාජ්‍ය සේවයේ කාර්යක්ෂමතාවය ඉහළ නැංවීමට එක්වන ලෙස ද නව වසර උදාවත් සමග සියලු රාජ්‍ය සේවකයන්ගෙන් ඉල්ලා සිටියේ ය.

නව වසරේ රාජකාරි ඇරඹීම සනිටුහන් කරමින් ජනාධිපති ලේකම්වරයා ජාතික ධජය එසවීමෙන් අනතුරුව සියලු කාර්යය මණ්ඩලය එක්ව රාජ්‍ය සේවයේ ප්‍රතිඥාව ලබා දෙන ලදී.

ජනාධිපති කාර්යාලයේ ජ්‍යෙෂ්ඨ නිලධාරින් ඇතුළු සියලු කාර්යය මණ්ඩලය මෙම අවස්ථාවට එක්ව සිටියහ. 


නව අදහස දක්වන්න