ශ්‍රීලනිපය ප්‍රමුඛ සන්ධානයේ මංගල රැලිය අද අනුරපුරේ | දිනමිණ

ශ්‍රීලනිපය ප්‍රමුඛ සන්ධානයේ මංගල රැලිය අද අනුරපුරේ

පෙබරවාරී 10 වැනිදා පැවැත්වෙන පළාත් පාලන මැතිවරණයට අදාළව ශ්‍රී ලංකා නිදහස් පක්ෂය ප්‍රමුඛ එක්සත් ජනතා නිදහස් සන්ධානය සංවිධන කරන මහජන රැලි හා රැස්වීම් මාලාවේ මංගල රැලිය හා රැස්වීම ශ්‍රී ලංකා නිදහස් පක්ෂයේ සභාපති, ජනාධිපති මෛත්‍රිපාල සිරිසේන මහතාගේ ප්‍රධානත්වයෙන් අද (10) පස්වරු 2 ට අනුරාධපුරයේදී පැවැත්වේ.

ජනාධිපති මෛත්‍රීපාල සිරිසේන, පක්ෂ මහලේකම්, කෘෂිකර්ම ඇමැති දුමින්ද දිසානායක, එක්සත් ජනාතා නිදහස් සන්ධානයේ මහලේකම්, ධීවර හා ජලජ සම්පත් ඇමැති මහින්ද අමරවීර, විද්‍යා, තාක්ෂණ හා පර්යේෂණ ඇමැති සුසිල් ප්‍රේමජයන්ත් ඇතුළු පක්ෂ නායකයන් ශ්‍රී මහා බෝධීන් වහන්සේගේ හා රුවන්මැලි සෑ රඳුන්ගේ ආශීර්වාද ලබා ගැනීමෙන් අනතුරුව රැස්වීමට සහභාගී වීමට නියමිතය.

මෙහිදී එක්සත් ජනතා නිදහස් සන්ධානයේ ප්‍රතිපත්ති ප්‍රකාශය ද එළි දැක්වීමට නියමිත අතර සන්ධානයට බලය හිමි වන පළාත් පාලන ආයතන නව තාක්ෂණය හා නව කළමනාකරණ ක්‍රමවේද භාවිත කරමින් ජනතා හිතවාදී හා පිරිසුදු ආයතන ලෙස පවත්වාගෙන යන ආකාරය සම්බන්ධයෙන් ප්‍රතිපත්ති ප්‍රකාශය ඔස්සේ ඉදිරිපත් කිරීමට ද සැලසුම් කර තිබේ.

මෙවර මංගල රැලිය සඳහා කොළඹින් සීමිත පිරිසක් එක් වීමට නියමිත අතර අනුරාධපුර දිස්ත්‍රික්කයේ සියලු ම අපේක්ෂකයින් හා පාක්ෂිකයින් මේ අවස්ථාවට සහභාගී වනු ඇති බව ඇමැති සුසිල් ප්‍රේමජයන්ත මහතා පැවසීය. 

සමන්මලී ප්‍රියශාන්ති,
චන්දිමා කරුණාරත්න


නව අදහස දක්වන්න

Or log in with...