පොදු රාජ්‍ය මණ්ඩලීය අරමුණු උදෙසා කැපවෙනවා | දිනමිණ

පොදු රාජ්‍ය මණ්ඩලීය අරමුණු උදෙසා කැපවෙනවා

 ශ්‍රී ලංකාව වැනි කුඩා රටවලට ජාත්‍යන්තර වෙළෙඳපොළ වෙත පහසුවෙන් පිවිසීමට හැකි වන පරිදි කුඩා රටවල් සඳහා වන වෙළෙඳපොළ මූල්‍ය සංචිතයක් ස්ථාපනය කිරීම සඳහා මූල්‍ය දායක්තවය දැක්වීමට ශ්‍රී ලංකාව ද පොරොන්දු විය. බ්‍රිතාන්‍යයේ පැවැත්වෙන 25 වැනි පොදු රාජ්‍ය මණ්ඩලීය රාජ්‍ය නායක සමුළුවට සමගාමීව පැවැති හමුවක දී ඊට අදාළ ගිවිසුමට අත්සන් තැබීමේ අවස්ථාවට එක් වෙමින් මුදල් හා ජනමාධ්‍ය ඇමැති මංගල සමරවීර මහතා මේ බව සඳහන් කළේ ය.

2013 වසරේ දී කොළඹ පැවැති 23 වැනි පොදු රාජ්‍ය මණ්ඩලීය රාජ්‍ය නායක සමුළුවේ දී කුඩා රටවල සංවර්ධනය සඳහා වාණිජ මූල්‍යනය ක්‍රමයක අවශ්‍යතාව අවධාරණය කෙරිණි. එහි දී කුඩා රටවල් සඳහා ඇ.ඩො. මිලියන 5ක මූල්‍යනය පහසුකම් සැලසීමේ ක්‍රමයක් ද හඳුන්වා දෙන ලදී. මේ හරහා පොදු රාජ්‍ය මණ්ඩලයට අයත් කුඩා රටවලට ඉදිරි වසර තුන තුළ දී ඇ.ඩො. මිලියන 300ක් දක්වා වූ වෙළෙඳ මූල්‍යන ආධාර පහසුකම් සැලසිය හැකිවනු ඇතැයි අපේක්ෂා කෙරේ. මේ මූල්‍යනය පහසුකම් සැලසීම සඳහා වන ගිවිසුමට 2015 වසරේ දී එවකට විදේශ ඇමැතිවරයාව සිටි මංගල සමරවීර මහතා අත්සන් තබා ඇති අතර මේ දක්වා ශ්‍රී ලංකාව මේ වෙනුවෙන් අ.ඩො. ලක්ෂ 15ක දායකත්වයක් ලබා දී ඇත.

පොදු රාජ්‍ය මණ්ඩලයට අයත් කුඩා රටවල නිෂ්පාදන හා වෙළෙඳපොළ අවස්ථා සීමිත බැවින් ඔවුන්ගේ ආර්ථිකය ශක්තිමත් කිරීම සඳහා ගනු ලැබූ මෙම තීරණය මගින් පොදු රාජ්‍ය මණ්ඩලීය අරමුණු මුදුන්පත් කර ගැනීම උදෙසා ශ්‍රී ලංකාවේ කැපවීම ප්‍රදර්ශනය වන බව මුදල් හා ජනමාධ්‍ය ඇමැති මංගල සමරවීර මහතා සඳහන් කෙළේ ය. මෙහි දී අදාළ ගිවිසුම්වලට ඉන්දියාව, මොරිෂස් සහ මෝල්ටාව යන රටවල් ද අත්සන් තැබීය. 


නව අදහස දක්වන්න

Or log in with...