සමාගම් ලියාපදිංචිය ඔන්ලයින් ක්‍රමයට

 ශ්‍රී ලංකාවේ ප්‍රථම වරට සමාගම් ලියාපදිංචිය E – ROC (Electronic Register of Company) හෙවත් විද්‍යුත් සමාගම් ලියාපදිංචි ක්‍රමවේදයට සිදුකිරීමට සැලසුම් කරයි. අන්තර් ජාතික ප්‍රමිතියට අනුව අන්තර්ජාලය ඔස්සේ online ක්‍රමයට ක්‍රියාත්මක කරමින්, සමාගම් සංස්ථාපන කාර්ය කාර්යක්‍ෂම කිරීමට කර්මාන්ත අමාත්‍යාංශය කටයුතු කරයි . එම අමාත්‍යාශය යටතේ පවතින සමාගම් ලියාපදිංචි කිරීමේ දෙපාර්තමේන්තුව මෙසඳහා පියවර ගනිම්න් සිට්න බව කර්මාන්ත හා වාණිජ කටයුතු අමාත්‍ය රිෂාඩ් බදියුදීන් මහතා පවසයි.

මීට වසර 80 කට පෙර වර්ෂ 1938 දී බ්‍රිතාන්‍ය යටත් විජිත පාලන සමයේදී සමාගම් පනතේ 51 වැනි වගන්තිය යටතේ ශ්‍රි ලංකා සමාගම් ලියාපදිංචි දෙපාර්තමේන්තුව ආරම්භ කර තිබේ. වර්තමානයේ කර්මාන්ත හා වාණිජ කටයුතු අමාත්‍යාංශය යටතේ පවතින සමාගම් ලියාපදිංචි දෙපාර්තමේන්තුව මේ වන විට සමාගම් 80,000 ක් පමණ ලියාපදිංචි කර තිබේ. දැනට දිනකට සමාගම් 50 ක් පමණ ලියාපදිංචි කටයුතු කරන අතර, එය වසරකට 8000 ක් පමණ වේ.

වාඩාත් කාර්යක්ෂම හා පහසු දුර බැහැර පදිංචි අයගේ පහසුව , මෙන්ම කඩිනම් සේවයක් මෙමඟින් සැලැසීමට අපේක්ෂා කෙරේ

මෙහිදී වැඩි දුරටත් අදහස් දැක්වූ අමාත්‍යවරයා

“තොරතුරු හා සන්නිවේදන තාක්ෂණය පදනම් කරගෙන ආරම්භ කරන මෙම E – ROC සමාගම් ලියාපදිංචි ක්‍රමවේදය අප රටේ සමාගම් කාර්යක්‍ෂමව පවත්වාගෙන යාමට නව පියවරක් ලෙස හැඳින්වීමට පුළුවන්. මේ මඟින් සමාගම් ලියාපදිංචි ක්‍රියාවලිය කඩිනම් කරමින්, කාර්යක්‍ෂමව වර්ධනය කරමින් එහි ගුණාත්මකභාවයද වැඩි කිරීමට හැකි වෙනවා. මේ යටතේ පළමු අදියර ලෙස සමාගම් නාමයන් ඔන්ලයින් (online) ක්‍රමයට අන්තර්ජාලය ඔස්සේ ස්වයංක්‍රීයව අනුමත කරගැනීම සහ නව සමාගම් ඔන්ලයින් ක්‍රමය යටතේ සංස්ථාගත කිරීම හා ලියාපදිංචිය ආරම්භ කරල තියෙනවා. එසේම අනාගතයේදී අක්‍රියාකාරී සමාගම් වසා දැමීම පවා මේ යටතේ සිදු කිරීමට පුළුවන්.

ඒ වගේම මේ යටතේ රාජ්‍ය ආයතන තොරතුරු සඳහා පොදු ප්‍රවේශයක් ඇති කිරීම සහ සහතික කළ තොරතුරු නිකුත් කිරීම සිදු කිරීමටද නියමිතයි. මේ වසර අවසාන වන විට මේ අදියරයන් සම්පූර්ණ කර අනාගතයේදී E – ROC යටතේ ලාංකික සමාගම් විදේශයකදී සිට වුවද විදේශ ගෙවීම් ක්‍රම භාවිතා කරමින් ලියාපදිංචි කිරීමට හැකි වෙනවා.

ඒ වගේම දැනට ක්‍රියාත්මක වන සමාගම් ලියාපදිංචි ක්‍රමවේදය, මේ නව ක්‍රමයට පුරුදුවන තෙක් යම් කාලයක් භාවිතා කළත්, අපගේ දේශීය හා විදේශීය ව්‍යාපාර සඳහා මෙම E – ROC online ලියාපදිංචි ක්‍රියාවලියට අනුගත වන මෙන් සියලුම ව්‍යාපාරික ප්‍රජාවගෙන් ඉල්ලා සිටිනවා. මේ මඟින් පිරිවැය ඉතිරි කර ගැනීමත්, කාර්යක්ෂමතාව වැඩි කර ගැනීමත් ඇතුළු වාසි රැසක් අත්කර ගැනීමට පුළුවන්.” යැයි තවදුරටත් පැවසීය.

මදාරා මුදලිගේ