දවස් බොහොම හෙමිහිට ගත වෙන්න පටන් ගත්තා. මෙලාවියෝ ඇවිද්ද සෑම අඩියක් ම ගත්තෙ නැවති නැවති. වෙහෙසකරයි.
කළු පාට හිම වැටෙන්න පටන් ගත්තා කොළඹට. සීතලයි. මෙලාවියෝ රෑට ගැහි ගැහී ජනේලෙ ඇරල කකුල් දෙක මහා පාතාලෙට දාගෙන තරුවක්වත් නැති අහස දිහා ඔහේ බලාගෙන හිටියා. කන්න අමතක වුණා. පූසට කන්න දෙන්නත් අමතක වුණා. පූසා ඇවිත් කමිසෙ කීතු කීතු ඉරෙනකන් ම කෑම ඉල්ලුවා. ඒත් මෙලාවියෝට දැනුණෙ නෑ. දවස් දෙකකට පස්සෙ රෑක පූසා කෑම හොයාගෙන යන්න තීරණය කලා. ගැරේජ් එකේ දොරෙන් රිංගල ගොඩනැගිල්ල පිටතින් තියෙන අඟල් තුන හතරකට වඩා පළල් නැති පීල්ල දිගේ අල්ලපු ගෙදර ජනේලෙ දිහාවට ගියා. ජනේලෙ වහලා. කළු පාට හිම වැටිලා ටික ටික කළු පූසා හිම ගොඩක් වගේ පේන්න ගත්තා. හිම ගොඩ කිටි කිටි ගාලා ගැහුණා. පාන්දර ජනේලෙ ඇරුණා. ඒකෙන් කුණු බෑග් එකක් අහසට වීසි වුණා. ජනේලෙ වැහෙන්න කලින් කළු පූසා ඇතුළට පැන්නා. ආයෙත් ජනේලෙ ඇරුණා. පූසා ජනේලෙන් විසි වුණා. ආයෙත් ජනේලෙ වැහුණා. මෙලාවියෝ බලාගෙන හිටියා. මුලින් ම කුණු බෑග් එකත් ඊළඟට කළු පූසත් අඳුර මැදට කඩා වැටිල අතුරුදන් වුණ හැටි.
දවස් දෙකකට පස්සෙ මෙලාවියෝට නිව්මෝනියාව. දවස් තුනක් රෝහල්ගත වෙලා හිටියා. ඊළඟ දවසෙ වැඩට ගියා ම ඇතීනා ආවා එයාව හම්බෙන්න.
‘තෑන්ක්ස් ඩොක්ටර්’ඇතීනා කිව්වා. අර හිනාව එහෙමමයි. ‘මම සිලෙක්ට් වුණා. මගේ ෂට්ල් එක තියෙන්නෙ තව සති දෙකකින් ඉරිදා.’
ආ … මෙලාවියෝ ඇතීනා දික් කරපු අත ඇල්ලුවා. ඊළඟට එයා ගියා. ඒ මෙලාවියෝ ඇතීනා දැක්ක අන්තිම වතාව.
මෙලාවියෝගෙ කාර්යක්ෂමතාව අඩු වී ඇති බවත් නිර්දේශ කල බෙහෙත් ප්රමාණය අඩු වී ඇති බවත් ඉහළ පාලනාධිකාරියෙන් දැනුම් දුන්නා. ආයෙ සුපුරුදු ජීවිතයට යන්න තීරණය කරපු මෙලාවියෝ ආයෙත් චිත්රපටි බලන්න යන්න පටන් ගත්තා. චිත්රකතා කියවන්න පටන් ගත්තා. අලුත් පූස් පැටියෙක් ගන්න තැනක් හොයල බැලුවා. ඒත් මෙලාවියෝ ආයෙ කවදාවත්, ඩ්රැකියුලා සුදුමැලි වෙච්ච ගෑනු ළමයෙක්ගෙන් ලේ උරා බොනකොට තිගැස්සුණේ නෑ. ආවේශ වෙච්චි පුංචි ළමයෙක් ඔළුව කරකව කරකව වහලෙ දිගේ ඇවිදිනකොට බිරාන්ත වෙලා පුටුවෙ ගුලි වුණේ නෑ. ඔහේ බලාගෙන හිටියා. පොප් කෝන් හැමදාම ඉතුරු වුණා. හිතට හරියන පූස් පැටියෙක් හම්බුණෙත් නෑ.
එක ඉරිදා දවසක නිදාගෙන හිටපු මෙලාවියෝ ගැස්සිලා ඇහැරුණා. ඉර බැහැගෙන යන්න ළඟයි. කම්මැලියි. කෝපි කෝප්පයක් හදාගෙන ඒක සීතල වෙනකන් ම බිබී හිටපු මෙලාවියෝ දිග කළු කබායත් ඇඳගෙන වාහනේට නැග්ගා. කළුවර වෙලා. පුංචි වැස්සක් වැටෙනවා. ගොඩනැගිලි අතර පියාඹන වාහන තදබදයක හිරවෙලා. හෝන් ගහනවා. හෙඩ්ලයිට් පත්තු කරනවා. ජනෙල්වලින් ඔළුව දාල එකිනෙකාට බැන ගන්නවා.
ගාලු මුව දොර ළඟට යනකොට තදබදය අඩු වුණා. හැන්දෑවෙ අටට ළඟයි. මෙලාවියෝ පීඨිකාවට වාහනේ පාත් කරල නැවැත්තුවා. හීන් වැස්සට ඔළුව නොතෙමෙන්න කබායෙ කොලර් දෙක ඔළුවට උඩින් ඇදගෙන පීඨිකාව අග බංකුවක ඉඳගත්තා. අඩි සිය ගාණක් පහළින් පේන මුහුදෙ අහස උසට නැගිච්ච කොළඹ විදුලි එළි දිස්න දිදී නටනව. ක්ෂිතියට පොඩ්ඩක් මෙහා පැත්තෙ කොළඹ අන්තර්ජාතික අභ්යවකාශ සෝපානය. මුහුද මැද තියෙන යෝධ පීඨිකාව මැදින් යෝධ කාබන් ෆයිබර් බටය සේද නූලක් වගේ විදුලි එළි දල්වගෙන අහසට නැගිල නොපෙනී ගිහින් අනිත් කොන ශ්රී ලංකා අභ්යවකාශ මධ්යස්ථානයට සම්බන්ධ වෙලා. මෙලාවියෝ දිව්ය ලෝකෙට නඟින පඩිපෙළ දිහා බලාගෙන හිටියා. තවමත් හරියට සුව වෙලා නැති නිසා ඇඟ කොලර් අතරින් සිරුරට රිංගන සීතල වැහි සීරාවත් එක්ක මෙලාවියෝ ගැහෙන්න ගත්තා. අටයි කාල වෙද්දි සෝපානය වටේ රතු ආලෝක දැල්වෙන්න වුණා. මොඩියුලය ගුවන්ගත වෙන්න සූදානම්. අට හමාරට නිල් පාට ආලෝකයකින් සෝපානයේ පාදම එළිය වුණා. ඒ එළිය සෝපානයේ බඳ දිගේ වේගයෙන් අහසට නැග්ගා. පුංචි වෙවී ගිහින් කළුවර අහස මැද අතුරුදන් වුණා. මෙලාවියෝ අහස දිහා බලාගෙන හිටියා. වලා දුමාර අතරින් කලා සම්පූර්ණ කරන්න තව දවස් දෙකක් පමණ තිබිච්ච හඳ එළිය වගුර වගුර හිටියා. ඒක හරිම ලස්සන දර්ශනයක්. ගාලු මුව දොර කලාතුරකින් යන එන මිනිස්සුන්ගෙන් හිස් වෙලා ගියා ම පහළ මුහුදෙ රැළි ගැහැන සද්දෙ යාන්තමට ඇහෙන්න තරම් කලබල සද්ද අඩු වුණා ම මෙලාවියෝගේ හිතට සැනසිල්ලක් ආවා.
ඇතීනා ගියා. දැන් අමතක කරල දාන්න. මෙලාවියෝ හිතට කිව්වා. එහෙම දේවල් වෙන්න පුළුවන්. ආදරය කියන එක එකපාර දැනෙන්න පුළුවන්. දැනෙනකොට ඒක ලෝකෙ වැදගත්ම දේ. ඒක විනාශකාරී හැඟීමක්. ඒත් කල් යද්දි තමන්ට එහෙම දැනුණ එකත් විහිළුවක් වගේ දැනෙන්න ගන්නවා. ඒවා ජීවිතයේ එක එක මොහොතවල්. එච්චරයි.
හරි. එහෙනම් ඒකත් එච්චරයි. මෙලාවියෝ නැගිට්ටා. පොඩි හිනාවකුත් මූණට ආවා. හිතට දැනෙන්නෙ සැනසීමක්. එදා කලින් ම ඇවිත් කලින් ම නිදාගත්ත මෙලාවියෝ අනිත් දවස හරිම නැවුම් විදියට දැක්ක. ඒ දවස ඇතුළත නිර්දේශ කරපු ඩෙස්පිඩොමීන් ප්රමාණය වෙනදා ගාණ වගේ එකහමාරක්. දැන් හැමදේම හරි. ආයෙත් සුපුරුදු ජීවිතය. එදා චිත්රපටයෙ දි වුල්වරීන් උස ගොඩනැගිල්ලකින් වැටෙද්දි එයා ඕනවට වඩා තිගැස්සෙන්න ගිහින් අත වැදුණ පුටු ඇන්දෙ, රිදෙන්නම. නළලෙ සුදු පොට්ටුවක් තියෙන කළු පාට පූස් පැටියෙක් හම්බුණා හොලෝග්රෑම් තිරයේ උඩට පල්ලෙහට යද්දි. ගෙදරට ම ගෙනත් දෙන්න කියල ඇණවුමක් දාල චීන කඩේට ගිහින් වොඩ්කා මිලි ලීටර් පනහක් ඉල්ලුවා. හම්බුණේ විස්කි. දවසකට ඇල්කොහොල් මිලි ලීටර් පනහකට වැඩිය බොන්න හොඳ නෑ. කවදාවත් බීලත් නෑ. ඒත් එදා මෙලාවියෝ තවත් විස්කි ෂොට් එකක් ඉල්ලුවා. කළු දුමෙන් පිරිච්ච සුළඟ වුණත් දැනෙන්න පටන් ගත්තා හරිම සනීපෙට. යන ගමන් අලුත් චිත්රකතා පොතකුත් අරගෙන රෑම ඒක කියවන්න පටන් ගත්තා. කාලෙකට පස්සෙ හිත නිදහස්.
ඊළඟ දවසෙ රෑත් එහෙමයි. ගෙදර ඇවිත් කණ්ණාඩියෙන් මූණ බලද්දි පේන්නෙ යාන්තම් හිනාවක් එක්ක තියෙන ප්රසන්න මුහුණක්. මෙලාවියෝ තවත් ටිකක් හිනා වුණා. මූණ හිනාවත් එක්ක ඇදිල පිරුණා. ඔහු මහ හයියෙන් හිනා වුණා. කණ්ණාඩියට ඔළුවෙන් ගගහ හිනා වුණා. කණ්ණාඩිය ඉරි තලල නළලෙන් ලේ ගැලුවා. තවත් හයියෙන් හිනා මෙලාවියෝ වුණා. ගෙදර බිත්තිවලට හිනා වුණා, බැන්නා. කුණු රෙදි බාල්දියට පයින් ගැහුවා. බය වෙච්ච පූස් පැටියා කබඩ් එකක් යටින් හෙමිහිට බඩගාගෙන ගිහින් ඇඳුම් රාක්කෙ එල්ලල තිබුණ උස කබාය දිගේ නැගල ඇතුළු සාක්කුවකට බැහැල හැංඟුණා. මෙලාවියෝ එයාගේ ඡායාරූප ප්රක්ෂේපණ යන්ත්රයට පයින් ගැහුවා. ඡායාරූපවල හිටියා හොඳ පාසල් යන ළමයෙක්. කොණ්ඩෙ වමෙන් බෙදල කෙලින් හිටගෙන, උපාධියත් අතේ තියාගෙන වැදගත් විදියට ඉන්න තරුණයෙක්. මනෝචිකිත්සක කෝට් එක දාගෙන උපැස් යුවළක් දාගෙන ඉන්න එකෙක්. තනියම ඉන්න ජායාරූප ගොඩක්, ලෝකෙ වැදගත් ම දේ කරනව වගේ සෘජුව හිටගෙන කැමරාව ඉස්සරහ. ඔහු ප්රක්ෂේපණ යන්ත්රය උස්සල පොෙළාවෙ ගැහුවා. ඡායාරූප ගැහෙන්න වුණා.
‘මේකද ජීවිතේ’ඔහු ඡායාරූපවලට තර්ජනය කර කර ඇහුවා. උන් ගැහි ගැහී හිටියා මිස උත්තර දුන්නෙ නෑ. මෙලාවියෝ ඒක ඔළුවට උඩින් උස්සල වීසි කළා. ජනෙල් වීදුරුවත් කඩාගෙන ඒක කළුවරේ අතුරුදන් වුණා.
‘මේකද ජීවිතේ’කළු කෝට්, සුදු ෂර්ට්, කළු කලිසම් මෙලාවියෝ ඇඳුම් රාක්කෙන් ඇහුවා. රාක්කෙ සද්ද නෑ. එකම ජාතියෙ ඇඳුම්. කළුයි සුදුයි. එච්චරයි. ඒවත් උත්තර දුන්නෙ නෑ. මෙලාවියෝ පිස්සෙක් වගේ ඇඳුම් රාක්කෙ ඇඳුම් ඔක්කොම උදුනට වීසි කළා. වැහුවා. හාරසීයට කැරකෙව්වා. කබා සාක්කුවෙ හිටපු පූස් පැටියට කවදාවත් නොදැනිච්ච උණුහුමක් දැනුණා.
‘මේකද ජීවිතේ’අන්තිමට මෙලාවියෝ බිත්තියෙ ඔළුව ගගහ ඇඬුවා.
‘මේකද ජීවිතේ’
‘මේකද ජීවිතේ’
‘ට්රාන්ස්එෆ් 4002’
‘ට්රාන්ස්එෆ් 4002’
මෙලාවියෝ ගල් ගැහිල නතර වුණා. ට්රාන්ස්එෆ් 4002. ඇයි එකපාර ඒක ඔළුවට ආවෙ ? මොනාලිසා ගෑනි. ඇතීනා මුලින් ම ආපු දවසෙ හැන්දෑවෙ ආපු ගෑනි. ට්රාන්ස්එෆ් 4002 කියන වචනයත් එක්ක මෙලාවියෝට දැනුණෙ කවුරු හරි ඔළුවට පොල්ලකින් දමල ගැහුව වගේ. එහෙම්ම බිම වැටුණු මෙලාවියෝ පැය ගාණක් ඔහේ බලාගෙන හිටියා. ට්රාන්ස්එෆ් 4002.
පැයකට විතර පස්සෙ හදිසියෙම නැගිට්ට මෙලාවියෝ විනාස කරන්න අමතක වුණ එක ම පරිගණක තිරය දල්වගත්තා. ට්රාන්ස්එෆ් 4002. ඔහු විස්තර කියවන්න පටන් ගත්තා.
‘ට්රාන්ස්එෆ් 4002 යනු ජීව ශරීරය රූපාන්තරණය කිරීම සඳහා යොදා ගන්නා රසායනික, ක්වොන්ටම් ව්යුහකාරක සහ නැනෝ පරිගණක අඩංගු සංයුක්ත ඖෂධයකි. මෙම ඖෂධය ලබා ගැනීම මඟින් සිය ජීව විද්යාත්මක ශරීරය, මොළයේ රසායනික ව්යුහය, පෞර්ෂ ආකාරය, ජීව විද්යාත්මක වයස අවශ්ය ආකාරයට වෙනස් කරගත හැකිය. තමා රූපාන්තරණය විය ආකාරය කුමක් දැයි වටහා ගැනීම සහ සිතේ මවා ගැනීම ඉතා සංකීර්ණ මනෝ-ස්නායුවේදී කරුණක් වන අතර ක්රමානුකූල ස්නායු ප්රතිපෝෂණ(Neurofeedback) ක්රියාවලියක් මඟින් පුද්ගල මනසට එම නව ස්වයං-ප්රතිරූපය එන්නත් කරනු ලැබේ. ඉන් පසුව ට්රාන්ස්එෆ් 4002 එන්නත් කිරීම මඟින් එහි නැනෝ පරිගණක ස්නායුගත නව ස්වයං ප්රතිරූපය අධිශක්ති ක්වොන්ටම් ව්යුහකාරක යොදවා ජීව රසායනික වෙනස්කම ශරීරය තුළ සිදු කරයි. එහෙත් මෙහි ඵලදායකතාවය පූර්ණ පරිගණක අධීක්ෂණය යටතේ වුව 24% ඉක්මවා නැත. ඒ නිසා ද ඉන් සිදුවන ආචාර ධර්මීය සහ සමාජයීය බලපෑම නිසා ද 2178 දී ට්රාන්ස්එෆ් 4002 අන්තර්ජාතික තහනම් ඖෂධ ලැයිස්තුවට එක්කරන ලදී. එහෙත් එය රහසිගත ලෙස තව දුරටත් නිෂ්පාදනය වෙමින් පවතියි. වසරකට මිලියනයක් පමණ මේ ඖෂධය අවභාවිතය නිසා මිය යයි.’
‘මෝඩ ගෑනි … මෝඩ ගෑනි …’මෙලාවියෝ කාමරේ වටේ ඇවිද්දා. මොනාලිසා ගෑනි මොනාලිසා වගේ වෙන්න හිතේ මවාගෙන තියෙන්නෙ ද්වීමාන ශරීරයක් විදියට. මොනාලිසා කැන්වස් එකක ඇඳපු චිත්රයක් නෙව. ඒ නිසා ඇඟ පැතලි නොවී තියෙයි ද?
මෙලාවියෝ තමන්ගෙ පෞද්ගලික හොලෝග්රෑම් තිරය දල්ව ගත්තා. මොනාලිසා ගෑනිගෙ ලිපිනය හොයා ගත්තා. වාහනේට නැග්ගා. කැලණිය පැත්තෙ මුඩුක්කු ගොඩනැගිල්ලක පහළ ම තට්ටුවේ ලිපිනයක්. දොරට තට්ටු කරනකොට ම මොනාලිසා ගෑනි දොර ඇරියා. ප්රති ඖෂධ නිසා තත්ත්වය පාලනය වෙලා තිබුණත් ගෑනිගෙ මූණ තවත් පැතලි වෙලා තිබුණා. ඔළු කට්ටෙ පිපිරීම් සහ ශ්ලේෂ්මල පටල තැලී ඉරී යාම නිසා නහයෙන් නිතරම ලේ ගලනවා. ලෙයින් පෙඟුණු ලොකු ලේන්සුවකින් එයා හොටු හූර හූර හිටියා.
මෙලාවියෝ කිව්වා එයාට ට්රාන්ස්එෆ් 4002 ඕනෙ කියල. ගත්ත තැන කිව්වොත් රුපියල් බිට් දාහක් දෙන්නම් කිව්වා. ගෑනි කිව්වා බිට් දාහත් ඕනෙ එයත් එක්ක නිදාගන්නත් ඕනෙ කියල. මෙලාවියෝ කාමරේ විදුලි බල්බ නිවල එයාගෙ කණ්ණාඩියෙ අසභ්ය චිත්රපටයක් දර්ශනය වෙන්න දීල ට්රාන්ස්එෆ් 4002 විකුණන තැන අහගත්තා. උදේ වෙනකොට කොළඹ පාතාලෙ එක එක මූණු ගාණක් ඉස්සරහ උත්තර බැඳල අන්තිමට ඉතුරු කරගෙන හිටපු සල්ලි ඔක්කොමත් දීල වාහනෙත් දීල ඖෂධ සිරිංජරය අරගත්තා. ටැක්සියක් අරගෙන ගෙදර ගියා. හොඳටම මහන්සියි. සෝපාව උඩ වැටිල නිදා ගත්තා. එලාම් එක වැදුණා. මූණ හෝද ගත්තා. අඳින්න ඇඳුමක් නෑ. කෑම දෙන්න පූසා ඉන්නවද කියල බැලුවා. ඌ නෑ. ටැක්සියක් අරගෙන ඉන්ටලෙක්ට් කෝර්ප් එකට ආවා. කාමරේ දොර වහගත්තා. කිසිම දේකට වැඩි කාලයක් නෑ.
එයාට අවශ්යයි අවධානය. ඒ නිසා ට්රාන්ස්එෆ් 4002 සමඟ ප්රතික්රියා නොකරන ADHD ඖෂධයක් එන්නත් කරගත්ත මෙලාවියෝ චිත්ත රූප මවා ගැනීමේ පහසුව සඳහා LSDx48 ස්වල්ප මාත්රාවක් එන්නත් කරගත්තා. දැන් සූදානම්. අතත්ය යථාර්ථ බාහිකය ඔළුවට දාගත්ත එයා වැදගත් ම ප්රශ්නය මුලින් ම කල්පනා කළා.
‘ඇතීනා කැමති මොනවගේ පිරිමියෙකුට ද?’
සාමාන්ය පිරිමියෙකුට! බොරු උත්තරයක්. මෙලාවියෝ දන්නවා. ඒ වගේ ගැහැනියකගේ හිත ගන්න පුළුවන් පිරිමියෙක්. ඔව්, හිතේ මවාගත යුතු යි. අවිඥාණයට ම දැනෙන පරිදි හිතේ මවාගන්න ඕනේ, ඇත්තට ම කිව්වොත් අවිඥාණයේ ඉන්න ෆැන්ටසි පිරිමියා යාවත්කාලීන කරන එක තමා හොඳම දේ.
අවුරුදු විසිපහක තරුණයෙක්. කඩවසම්. මෙලාවියෝ ත්රිමාණය තුළ තමා විය යුතු ආකාරය නිර්මාණය කරගත්තා.
බුද්ධි ඵලය 180ක්? එය භයානක වෙන්න ඉඩ තියෙනවා. ඒ නිසා 170ක් හොඳයි. මෙලාවියෝ තීරණය කළා. ස්නායු ප්රතිපෝෂණ යන්ත්රයෙන් 180 අදහස කඩල දාලා 170 ස්ථාවර කරගත්තා.
පෞර්ෂ ආකාරය. සරල පෞර්ෂ ආකාර දහසයක් ඔස්සේ ම මෙලාවියෝ කල්පනා කළා. තමා විද්යාඥයෙක් ආකාර විය යුතු ද? නැත. ඇතීනා විද්යාඥවරියක්. එයා එයාට ඇති අඩුව ආදරය ලෙස තෝරාගනු ඇත. එහෙනම් තමා චින්තකයෙකු වෙන්න ඕනෙ. මෙලාවියෝ දාර්ශනික ආකාරයේ පෞර්ෂය තෝරා ගත්තා. ත්රිමාණය තුළ කඩවසම් දාර්ශනික තරුණයා වර්ධනය වෙන ගමන් මෙලාවියෝගේ සියලු ස්වයං-කථනයන්වල නිශේධනාත්මක ප්රතිචාර ස්නායු ප්රතිපෝෂක යන්ත්රයෙන් විනාශ කරල දැම්මා.
එයා හොඳට ම දැනගෙන හිටියා, ට්රාන්ස්එෆ් 4002න් රූපාන්තරණය වෙන්නෙ කෙනෙකුට නිකමට හිතෙන කෙනෙකුට නෙවෙයි ඇත්තට ම වෙන්න ඕන කෙනෙකුට කියල. ඒ නිසා හදාගත්ත නව ප්රතිරූපය අවිඥාණයට ම දැනෙන්න භූමිකා රංගනයක් පටන්ගත යුතු යි. එයා හදාගත්ත අලුත් ප්රතිරූපය චරිතයක් විදියට බාර අරගෙන අතත්ය යථාර්ථයෙන් මවන සිදුවීම් සිය ගාණකට මුහුණ දුන්නා.
මතු සම්බන්ධයි
තාරක කල්දේරා
නව අදහස දක්වන්න