ලංගමට අලුතින් බස් රථ 1500ක් | දිනමිණ

ලංගමට අලුතින් බස් රථ 1500ක්

සිතාරා සේනානි

ශ්‍රී ලංකා ගමනාගමන මණ්ඩලය සඳහා මේ වසරේ තවත් බස් රථ 500ක් ඉන්දියාවෙන් ආනයනය කිරීමට බලාපොරොත්තු වන බව ප්‍රවාහන හා සිවිල් ගුවන් සේවා නියෝජ්‍ය ඇමැති අශෝක් අබේසිංහ මහතා පවසයි. ඉන්දියානු ණය යෝජනා ක්‍රමය යටතේ අමෙරිකානු ඩොලර් මිලියන 20ක වියදමින් මෙම බස්රථ ගෙන්වීම සඳහා කැබිනට් මණ්ඩල අනුමැතිය ලැබී තිබෙන බවද ඒ මහතා කීය. ඉන්දියාවෙන් ගෙන්වන මෙම බස් රථ 500ට ආසන 54 බස්රථ 400ක් සහ ආසන 35 බස් රථ 100ක් ඇතුළත් බවද ප්‍රවාහන නියෝජ්‍ය ඇමැතිවරයා සඳහන් කළේය.

එසේම, මෙම බස්ර, 500ට අමතරව කාලයට ඔබින ආයුරින් පා පුවරුව පහතින් සකසා ඇති බස් රථ 1000ක් හංගේරියාවෙන් ගෙන්වීමට බලාපොරොත්තු වන බවද, හංගේරියානු රජයේ ප්‍රදානයක් ලෙස ලැබීමට නියමිත එම බස් රථ ගෙන්වීම ඒ සඳහා රජයට හෝ ශ්‍රී ලංකා ගමනා ගමන මණ්ඩලයට කිසිදු මුදලක් වැය නොවන බවද අශෝක් අබේසිංහ මහතා පෙන්වා දෙයි.

මෙම බස් රථ 1000ට හයිබ්‍රිඩ් වර්ගයේ බස් රථ, 750ක් සහ විදුලියෙන් ක්‍රියා කරන බස් රථ 250ක් ඇතුළත් වන බවද, ඒවා බොහෝ දුරට ලබන වසරේ අප්‍රේල් මාසය වනවිට මෙරට ධාවනය සඳහා යෙදවීමට හැකි වෙතැයි අපේක්ෂා කරන බවත් සඳහන් කරයි.

එසේම හංගේරියාවෙන් මෙම බස්රථ ගෙන්වීම සඳහා කැබිනට් පත්‍රිකාවක් ඉදිරිපත් කර ඇති බවත්, ඒ සඳහා මුදල් අමාත්‍යාංශයේ අනුමැතිය මේ සතියේ ලැබෙනු ඇති බවත් නියෝජ්‍ය ඇමැතිවරයා පවසයි. ප්‍රවාහන හා සිවිල් ගුවන් සේවා නියෝජ්‍ය ඇමැති අශෝක් අබේසිංහ මහතා මේ බව පැවසුවේ සිරිකොත එක්සත් ජාතික පක්ෂ මූලස්ථානයේ ඊයේ (16) පැවැති මාධ්‍ය හමුවේදී ය.


අදහස් 1ක් ඇත

bus gennanakota lankawe tiyena paarawal wala palala gena selakilimath una num hondai . lankawe den tiyena bus paarawal walata wada lokui. drivers la anthimai drive karana widiha. widimath riya puhunuwak saha strict rules bus driverslata demma num hondai.. nethnam paare marena minissu gaana thamai dawasin dawasa wedi wenne..

පිටු

නව අදහස දක්වන්න

Or log in with...