ලොව පුරා ෆේස්බුක් ගිණුම් හිමියන් අසීරුතාවට පත් කරමින් සිය ගිණුම් හිමියන්ගේ තොරතුරු තෙවන පාර්ශ්වයකට ලබා දෙන බවට හෙළි වී එම සමාගම එය පිළිගැනීමේ උණුසුම පහව යාමටත් මත්තෙන් තවත් තොරතුරු තාක්ෂණ ලෝකය අන්දමන්ද කරවන පුවතක් හෙළිදරව් විණි. ඒ ජීමේල් ගිණුම් හිමියන්ගේ තොරතුරු තෙවන පාර්ශ්වයකට ලබාදෙන බවයි. ගූගල් සමාගමේ මෙම දත්ත සොරා ගැනීමේ පහසුකම් සැලැසීමේ කූටෝපාය හෙළිදරව් කරනු ලැබුවේ සුප්රකට වෝල්ස්ට්රීට් ජර්නලය විසිනි. ගූගල් සමාගම විසින් තම ගිණුම් හිමියන්ගේ තොරතුරු තෙවන පාර්ශව මෘදුකාංග නිර්මාණකරුවන්ට ලබා දීමට ඉඩ ප්රස්ථාව ලබා ඇති බවට වෝල් ස්ට්රීට් ජර්නලය හෙළිදරව් කෙරිණි.
‘‘ගූගල් සමාගම පිටස්තර තෙවන පාර්ශ්වීය මෘදුකාංග නිර්මාණකරුවන්ට මිලියන ගණනක් වූ ජීමේල් ගිණුම් හිමියන්ගේ තොරතුරු ලබා ගැනීමට අවස්ථාව ලබා දී තිබෙනවා. භාණ්ඩ මිල ගණන් සැසදීම්, සංචාරක තොරතුරු සහ වෙනත් සේවාවන් හි තොරතුරු ඊමේල් හරහා ලබා ගැනීමට ලියාපදිංව සිටින ජීමේල් ගිණුම් හිමියන්ට පැමිණෙන විද්යුත් තැපෑලවල තොරතුරු මෙසේ ඒ හරහා තෙවන පාර්ශ්ව නිර්මාණකරුවන් අතට පත්වන බවට එම ජර්නලය හෙළිකර සිටියි. වෝල් ස්ට්රීට් ජර්නලයේ මෙම හෙළිදරව්ව සම්බන්ධයෙන් බිලියන 1.4 ක පරිශීලකයන් ප්රමාණයක් හිමි ජීමේල් විද්යුත් තැපෑලේ හිමිකරු වන ගූගල් සමාගම මේ වන තෙක් මෙම චෝදනාව සම්බන්ධයෙන් කිසිඳු ප්රතිචාරයක් දක්වා නොමැති වීමද විශේෂත්වයකි.
ගූගල් සමාගමට අනුව තමන් පිටස්තර මෘදුකාංග නිර්මාණකරුවන්ට කිසියම් තොරතුරක් ලබා දෙන්නේ නම් ඒ අදාළ විද්යුත් තැපෑල හිමියාගේ අවසරය අවශ්යය.
වෝල් ස්ට්රීට් ජර්නලයේ වාර්තාව අනුව ගූගල් සමාමේ සේවකයකුට වුවද පිටස්තර විද්යුත් තැපැල් ගිණුමට ඇතුළු විය හැක්කේ අදාළ ගිණුම් හිමියාගේ අවසරය මත එම ගිණුම අයුතු භාවිතයක දී හෝ කිසියම් වෛරස ප්රහාරයක් එල්ල වූ විටදී පමණය.
විද්යුත් තැපැල් දත්ත රැස් කරන්නන් විසින් නව පාරිභෝගික පිරිස් සොයා ගැනීමේ අරමුණින් දිනපතා අවසරයකින් තොරව දස ලක්ෂ ගණනින් විද්යුත් තැපැල් ගිණුම් පරීක්ෂා කිරීම සඳහා තෙවන පාර්ශව මෘදුකාංග භාවිත කරති. එම දත්ත රැස්කර ඔවුන් විවිධ වෙළෙඳ ආයතන වෙත එම තොරතුරු විකුණනු ලබති. බොහෝ විට අප නොදන්නා පිරිස් විසින් සිය භාණ්ඩ හා සේවා විකුණා ගැනීමේ තොරතුරු රැගත් විද්යුත් තැපැල් මෙන්ම විවිධාකාරයේ ආධාර ඉල්ලීම් මෙන්ම මුදල් ආයෝජනය කිරීමට සහය දෙන ලෙස ආරාධනය කරමින් පැමිණෙන විද්යුත් තැපැල් ද පැමිණෙන්නේ මෙසේ අනවසරයෙන් ලබාගන්නා දත්තයන් උපයෝගී කරගෙනය.
අති බහුතරයක් වූ ජීමේල් ගිණුම් හිමියන් තම ගිණුමේ තෙවන පාර්ශ්වයේ මෘදුකාංග පිහිටුවීමට අවසර ලබා දී ඇති බව නොදන්නා බව වාර්තා වේ. තම ජීමේල් ගිණුමට තෙවන පාර්ශ්වයේ මෘදුකාංග පිහිටුවා ඇත්ද යන්න නිරීක්ෂණය කර පිහිටුවා ඇත්නම් ඒවා අවහිර කිරීමේ හැකියාව පරිශීලකයාට හිමිය.
ඒ සඳහා තම ගිණුමේ Sign-in & Security වෙත ඇතුළු වී Apps with account access ක්ලික් කළ යුතුය. එවිට ඔබ දැන හෝ නොදැන අවසරය ලබා දී ඇති තෙවන පාර්ශ්වයේ මෘදුකාංග ඇත්නම් බලාගත හැකිය. එම මෘදුකාංග අතරින් ඔබට නොපිහිටුවන ලද මෘදුකාංග ඇත්නම් ඒවා Manage Apps වෙත පිවිස අවහිර කළ හැකිය.
පී.කේ. බණ්ඩාර
නව අදහස දක්වන්න