මුල් ළමාවියේ දරුවන්ගේ සමස්ත සංවර්ධනය තහවුරු කිරීමට කටයුතු කරන ජාතික ආයතනය වන ළමා ලේකම් කාර්යාලය ඒ වෙනුවෙන් සුවිශේෂී පියවර ගණනාවක් ගෙන තිබෙන බව කාන්තා හා ළමා කටයුතු ඇමැතිනී චන්ද්රානි බණ්ඩාර මහත්මිය පැවැසුවාය.
ඇමැතිවරිය මේ බව පැවැසුවේ 'අරුණ දකින රටා– 2018' මුල් ළමාවිය දරුවන්ගේ සිතුවම් දැක්ම සහ ත්යාග ප්රදානෝත්සවයට සහභාගී වෙමිනි.
එහි දී වැඩිදුරටත් අදහස් දැක්වූ ඇමැතිවරිය මෙසේ ද පැවැසුවාය.
'අරුණ දකින රටා' සිතුවම් දැක්ම 8 වන වරටත් සාර්ථකව සංවිධාන කිරීමෙන් පෙර පාසල් දරුවන්, මවුපියන් මෙන්ම පෙර පාසල් ගුරුවරියන් මේ වැඩසටහන කෙරෙහි දක්වන උනන්දුව හා කැපවීම මනාව පෙන්නුම් කරනවා. ඒ පිළිබඳව අප අමාත්යාංශය වෙනුවෙන් ඔබ සියලු දෙනාටම මාගේ ස්තූතිය පිරිනමන්නට කැමතියි. මුල් ළමාවියේ දරුවන්ගේ නිර්මාණාත්මක හැකියාව හඳුනාගැනීමත්, එම හැකියාව වැඩිදියුණු කරගැනීමත්, ඔවුන් දිරිගැන්වීමත් මේ වැඩසටහනේ මූලික අරමුණ වෙනවා.
මල් වැනි කුඩා දරුවන්ගේ සිතුම් පැතුම්, සිහින හා බලාපොරොත්තු ඔවුන්ගේ සිතුවම්වලින් අපට ඉදිරිපත් කරනවා. මේ පිවිතුරු හැඟීම් තේරුම් ගෙන ඔවුන්ගේ අනාගතය පැහැබර හා ශක්තිමත් කිරීමටත්, ඔවුන්ගේ සිහින සැබෑ කිරීමටත් වැඩිහිටියන් වශයෙන් මෙන්ම රජයක් වශයෙන් අපි බැඳී සිටිනවා. එම වගකීමෙන් ප්රධාන කොටසක් කාන්තා සහ ළමා කටයුතු අමාත්යාංශය වෙත පැවරී තිබෙනවා. එම වගකීම ඉටුකිරීමට මගේ අමාත්යාංශය යටතේ දරුවන් වෙනුවෙන් කටයුතු කරන පරිවාස සහ ළමා රක්ෂක සේවා දෙපාර්තමේන්තුව, ජාතික ළමා රක්ෂක අධිකාරිය සහ ළමා ලේකම් කාර්යාලය යන ආයතන තුනක් පිහිටුවා තිබෙනවා. අද දවසේ මේ වැඩසටහන ඔබ වෙත ගෙන එන්නේ උපතේ සිට අවුරුදු 5 දක්වා දරුවන් වෙනුවෙන් කටයුතු කරන ළමා ලේකම් කාර්යාලයෙන්.
මුල් ළමාවියේ දරුවන්ගේ සමස්ත සංවර්ධනය තහවුරු කිරීමට කටයුතු කරන ජාතික ආයතනය වන ළමා ලේකම් කාර්යාලයෙන් ඒ වෙනුවෙන් සුවිශේෂී පියවර ගණනාවක් ගෙන තිබෙනවා. විශේෂයෙන්ම මුල් ළමාවිය රැකවරණය හා සවංර්ධනය පිළිබඳ ජාතික ප්රතිපත්තිය ක්රියාත්මක කිරීම, වයස අවුරුදු 3-5 සඳහා මුල් ළමාවිය සංවර්ධන ප්රමිති හඳුන්වා දීම හා ක්රියාත්මක කිරීම, මුල් ළමාවිය සංවර්ධන ප්රමිති ඇසුරෙන් ළමා තක්සේරුකරණය කිරීමේ වැඩසටහන, පෙර පාසල් ගුරුවරියන්ට විෂය මාලාවක් සකස් කිරීම, පෙර පාසල් දරුවන්ට විෂය මාලා රාමුව සකස් කිරීම, ගැබිනි මව්වරුන්ට රුපියල් 20,000ක පෝෂණ දීමනාවක් ලබාදීම ආදී වැඩසටහන් මෙහි දී විශේෂයෙන්ම මතක් කළ යුතුයි.
රටේ අනාගත ජීවනාලිය වන ළමා පරපුරට අත්තිවාරම සපයන මූලිකම අවධිය මුල් ළමාවියයි. මේ සියලු කටයුතු අතරේ දරුවන්ගේ ආරක්ෂාව, රැකවරණය, සංවර්ධනය හා සුබසාධනය තහවුරු කිරීමටත් විශේෂ අවධානයක් අප අද දිනයේ දී යොමු කළ යුතුයි. වර්තමානයේ දරුවන්ට සිදු වන ප්රචණ්ඩ ක්රියා වර්ධනයක් දක්නට ලැබෙනවා. එම නිසා ළමා පරපුර ආරක්ෂා කිරීමේ වගකීම අප අමාත්යාංශයට සහ රජයට පමණක් ඉටු කළ හැකි කාර්යයක් නොවේ. එය අප රටේ සමස්ත ජනතාවගේම වගකීමක් වෙනවා. විශේෂයෙන්ම මවුපියන්, ගුරුවරුන් වශයෙන් ඔබ සැමටත් විශාල වගකීමක් මේ වෙනුවෙන් පැවරී තිබෙනවා. ප්රධාන වශයෙන්ම පවුලේ, පවුලේ සාමාජිකයන් මෙන්ම සමීපතම ඥතීන්ගෙන් දරුවන්ට වන හානි වළක්වාගැනීමට මවුපියන් වශයෙන් ඉතාම අවධියෙන් කටයුතු කරන්න අවශ්ය වෙනවා. ඒ පිළිබඳවත් සියලු දෙනාගේම අවධානය යොමු කළ යුතුයි.
නව අදහස දක්වන්න