ලබන මස මුල් භාගයේදී බටහිර ඉන්දීය කොදෙව් දූපත් හී ඇරැඹෙන ජාත්යන්තර ක්රිකට් කවුන්සිල කාන්තා විස්සයි20 ලෝක කුසලාන තරගමාලාව සඳහා චමරි අතපත්තුගේ නායකත්වයෙන් නම් කළ ශ්රී ලංකා කාන්තා ක්රිකට් පිලට ඕෂධී රණසිංහ සහ ඉනූෂි ප්රනාන්දු ඇතුළත් වී සිටිති.
ක්රීඩා අමාත්ය ෆයිසර් මුස්තාෆා මහතාගේ පූර්ණ අනුමැතිය යටතේ නම් කළ ක්රීඩිකාවන් 15 දෙනකුගෙන් සමන්විත ශ්රී ලංකා කාන්තා විස්සයි20 පිලට අත්දැකීම් බහුල ක්රීඩිකාවන් මෙන්ම යොවුන් ක්රීඩිකාවන් ද ඇතුළත් වීම කැපී පෙනේ.
රත්ගම දේවපතිරාජ විදුහල් පිලේ කවීෂා දිල්හාරි ලාබාලතම ක්රීඩිකාව ලෙස ලෝක කුසලාන තරග වරම් ලබන මේ තරගාවලිය නොවැම්බර් මස 9 වැනිදා සිට 24 දක්වා පැවත්වෙයි.
ඕෂධී සහ ඉනූෂි කණ්ඩායමට එක්වී සිටින්නේ පසුගියදා ඉන්දීය පිල සමග පැවැති විස්සයි20 තරගාවලියට ක්රීඩා කළ ඉමල්කා මෙන්ඩිස් සහ අනුෂ්කා සංජීවනී වෙනුවටය. කෙසේවෙතත් මේ ක්රීඩිකාවන් දෙදෙනා අතිරේක ක්රීඩිකාවන් ලෙස නම් කර තිබේ.
6 වැනි වරට පැවැත්වෙන අයි.සී.සී. කාන්තා විස්සයි20 ලෝක කුසලාන තරගාවලියේදී ශ්රී ලංකා පිල ‘ඒ’ කාණ්ඩයෙන් තරග වදින අතර ඊට එංගලන්තය, දකුණු අප්රිකාව, සත්කාරක කොදෙව් පිල සහ බංග්ලාදේශය ඇතුළත්ය. ඔස්ට්රේලියාව, ඉන්දියාව, නවසීලන්තය, පාකිස්තානය සහ අයර්ලන්තය ‘බී’ කාණ්ඩය යටතේ තරග බිමට පිවිසෙයි.
ශ්රී ලංකා කාන්තා විස්සයි20 කණ්ඩායම මෙසේය - චමරී අතපත්තු (නායිකා), යසෝධා මෙන්ඩිස්, ශෂිකලා සිරිවර්ධන, ඉෂානි ලොකුසූරිය, හසිනි පෙරේරා, අමා කාංචනා, රෙබේකා වැන්ඩර්ට්, දිලානි මනෝදරා, නිලක්ෂි ද සිල්වා, ශ්රීපාලී වීරක්කොඩි, උදේශිකා ප්රබෝධනී, සුගන්ධිකා කුමාරී, කවීෂා දිල්හාරී, ඕෂධී රණසිංහ, ඉනූෂි ප්රනාන්දු.
අතිරේක - ඉමල්කා මෙන්ඩිස්, අනුෂ්කා සංජීවනී, නිපුනි හංසිකා, හර්ෂිතා මාධවී, ඉනෝකා රණවීර
නව අදහස දක්වන්න