කඩුවෙල මහ නගර සභා බල ප්‍රදේශයේ ග්‍රාමීය පාරවල් කාපට් කිරීම සඳහා, පසුගිය පාලක මණ්ඩලය මඟින් රුපියල් මිලියන 66ක් වැය කර මිලදී ගත් කාපට් කිරීමේ යන්ත්‍ර 6න්, 4ක් වර්තමාන පොහොට්ටු පාලන මණ්ඩලය මඟින් විකුණා දැමීමට කටයුතු කරන බව, කඩුවෙල නගර සභාවේ නාගරික මන්ත්‍රී හා කඩුවෙල ආසන බලමණ්ඩලයේ සභාපති, අසිත නිරෝෂණ (ජවිපෙ) මහතා පැලවත්තේ දී පැවැති මාධ්‍ය හමුවක දී ප්‍රකාශ කර සිටියේය. පළාත් පාලන අමාත්‍යාංශ උපදේශක කාරක සභාවේ නිර්දේශය මත එවකට පැවැති පාලන සභාව මඟින් 2016.04.26 වැනි දින මිල දී ගත් මේ කාපට් කිරීමේ යන්ත්‍රවලින් 4ක් 2018.09.05 වැනි දින පුවත්පත් දැන්වීමක් පළකර විකිණීමට සූදානම් වන බව ද වර්තමාන පාලක මණ්ඩලයේ රාජ්‍ය දේපළ විකිණීම දැඩි සේ හෙළා දකින බව ද අසිත නිරෝෂණ මහතා කීය.
පාරවල් කාපට් කිරීම පෞද්ගලික කොන්ත්‍රාත්කරුවන්ට ලබා දී එමඟින් කොමිස් මුදලක් ලබාගෙන මන්ත්‍රීවරුන් සතුටු කිරීම මෙහි යටි අරමුණ බවද, වර්තමාන පාලකයන් වරිපනම් බදු මුදල 9% දක්වා වැඩි කර ඇති අතර, රනාල, හබරකඩ වැනි ග්‍රාමීය ප්‍රදේශවල ජනතාවට මෙය දරාගත නොහැකි කාරණයක් බවද, නිරෝෂණ මහතා කීය. ශ්‍රී ජයවර්ධනපුර කෝට්ටේ මහ නගර සභාව තවමත් 8% ක් වරිපනම් බදු අය කරන අතර, බොරලැස්ගමුව 6%ක් බව ද කීය.
නිවාස 705කින් යුත් ජයවඩනගම නිවාස සංකීර්ණයේ පොදු පහසුකම් සඳහා වූ සමිති ශාලාව පෞද්ගලික උත්සව ශාලාවක් ලෙස කුලියට දී ඇති බව ද නිවාස සංකීර්ණයේ දරුවන්ට හා වැඩිහිටියන්ට මෙයින් අසාධාරණයක් සිදු වී ඇති බව ද නිරෝෂණ මහතා වැඩි දුරටත් ප්‍රකාශ කර සිටියේය.
නාගරික මන්ත්‍රී සාන්ත ජාගොඩආරච්චි මහතා ද මෙහි දී අදහස් පළ කළ අතර, කඩුවෙල මහ නගර සභාවේ ජනතා විමුක්ති පෙරමුණේ මන්ත්‍රීවරුන් වන ගයන්ත රුක්ෂාන්, දමයන්ති බාලසූරිය, ඉන්දු සේනාරත්න යන මහත්ම මහත්මීහුද මේ අවස්ථාවට සහභාගි වූහ.
මේ අතර කඩුවෙල හිටපු නගරාධිපති ජී. එච්. බුද්ධදාස මහතා ද සිය නිවෙසේ දී පැවැති මාධ්‍ය හමුවක දී අදහස් ප්‍රකාශ කරමින් කොන්ත්‍රාත්කරුවන් ලවා පාරවල් කාපට් කිරීමේ දී අති විශාල මුදලක් වැය කිරීමට සිදුවන බැවින්, එවකට කොළඹ මහ නගර සභාවේ සිටි නාගරික කොමසාරිස්වරයාගේ නිර්දේශය මත කාපට් කිරීමේ යන්ත්‍ර 6ක් මිලදී ගෙන, අප නගර සභාවේ සේවකයන් දසදෙනකුට නිසි පුහුණුවක් ලබා දී පාරවල් කාපට් කිරීමට තමා කටයුතු කළ බව ද කීය.
වර්තමාන පාලක සභාවේ ගත වූ මාස 8ක කාලය තුළ දී නගර සභාවේ කටයුතු උඩු යටිකුරු කර ඇති බව ද මේ පිළිබඳ දැඩි සංවේගයක් ඇති වන බව ද කීය.
කෝට්ටේ මධ්‍යම සමූහ - නන්ද ඒකනායක
නව අදහස දක්වන්න