එකසිය දහතුන අපට තිබෙනවා | දිනමිණ

එකසිය දහතුන අපට තිබෙනවා

අනුර ප්‍රේමලාල් සහ රක්ෂණ ශ්‍රියන්ත

කුමන ආකාරයේ බලවේග පැමිණියත් කුමන තර්ජන එල්ල කළත් තැබූ පය ඉදිරියටම තබනවා මිස පසුපසට නොගන්නා බව ජනාධිපති මෛත්‍රීපාල සිරිසේන මහතා අවධාරණය කරයි.

අගමැති පත්කිරීම පිළිබඳ විසදා ගත යුතු ප්‍රශ්නයක් ඇත්නම් ඒ ඕනම අයෙකුට ශ්‍රේෂ්ඨාධිකරණයට ගොස් එය විසදා ගත හැකි බවත්, පාර්ලිමේන්තුවේ බහුතර බලය වන 113 ගැන කිසිවකු සැක නොහිතන ලෙසත්, එම බහුතර බලය දැනටමත් ලැබී තිබෙන බව ජනාධිපතිවරයා පෙන්වා දෙයි.

ජනාධිපතිවරයා එසේ පැවසුවේ ඊයේ (05) පාර්ලිමේන්තු වට රවුමේ පැවැති රටම රකින ජන මහිමය 113+ දැවැන්ත ඓතිහාසික ජන උද්ඝෝෂණය අමතමිනි

අපේ දේශපාලන දර්ශනය තුළ අපිට රට අරගෙන යන්න ඉඩ දෙන්න රනිල් වික්‍රමසිංහ මහතාගේ පීඩාකාරී දර්ශනයෙන් සියලු දෙනාම නිදහස් කර ගතයුතුව තිබෙන බවද ජනාධිපතිවරයා සඳහන් කළේය.

රනිල් වික්‍රමසිංහ ආණ්ඩුවේ තීන්දු තීරණ ගත්තේ කැබිනට් මණ්ඩලයවත් ජ්‍යෙෂ්ඨ ඇමැතිවරුන්වත් තමාවත් නොව රනිල් වික්‍රමසිංහගේ සමනල රෑහැණ බවද කියා සිටියේය.

අගමැති ධුරය වෙනස් කරේ නිකන්ම නිකම් මිනිසුන් දෙදෙනෙකු හෝ අවයව දෙකක් නොව රටට දේශයට අහිතකර දේශීය ජනතාව අගය නොකරන විදේශිය න්‍යාය පත්‍රයට වැඩ කරන දර්ශනයක් අයින් කර අපට රටට ගැලපෙන දේශයට ගැලපෙන විදේශ දේශපාලන න්‍යාය පත්‍රය ප්‍රතික්ෂේප කරන දර්ශනයක් තිබෙන අගමැතිවරයෙක් පත් කළ බවද ජනාධිපතිවරයා කියා සිටියේය. කිසිම ආගමික නායකයෙකු මෙතෙක් හමුවීමට නොගිය රනිල් වික්‍රමසිංහ මහතා සිදුකරන්නේ විදෙස් තානාපති කාර්යාල ඉදිරියේ දනින් වැටී සිටීම පමණක් බවත් ජනාධිපතිවරයා කියා සිටියේය. අපි සියලු දෙනාම එකතු වෙලා හොඳ රටක් හදමු හොඳ ගමනක් යමු අපේ වැරදි අපි හදාගමු . සාමය ශක්තිමත් කරමින් පොදු දේපළ ජාතික සම්පත් ආරක්ෂා කරමින් ඇතිවී තිබෙන දේශපාලන නොසන්සුන්තාවය සන්සුන් කරගෙන අපි සාමයට කැපවෙමු. කිසිම කෙනෙකුට හිරිහැරයක් කරන්න එපා. දේශපාලන ප්‍රතිවාදීන්ට කරදර කරන්න එපා යැයිද ජනාධිපතිවරයා වැඩිදුරටත් කියා සිටියේය.

ඡායාරූපය - සුදත් මලවීර


අදහස් 1ක් ඇත

එතුමා කියන දේවල් තවදුරටත් විශ්වාස කරන්න අපි හරක් නෙවෙයි. ජනතාව ගොනාට ඇන්ඳුවා කියලා ඔබ හිතුවාට අවසානයේ ඔබමයි මීහරකාට ඇඳගෙන ඉන්නේ.

පිටු

නව අදහස දක්වන්න

Or log in with...