ස්ත්‍රී දේහ | දිනමිණ

ස්ත්‍රී දේහ

පුරාණයේ සිටම ස්ත්‍රී දේහ ලක්ෂනවලින් නොයෙක් ආකාරයෙන් අනාවැකි පළ කර තිබේ. ඒ අනුව කාන්තාවන්ගේ ඇස්, කන්, නාස, දෙතොල් ආදී නොයෙකුත් අංගවලින් ඇයගේ ගති පැවතුම් හා ජීවන රටාව පිළිබඳව නොයෙක් තොරතුරු හෙළි වී ඇත.

මොලොක් පැතලි මස් වැඩුණු රත් පැහැ පාද ඇති ස්ත්‍රිය ගුණ ධර්මයන් වඩන රාජ භාර්යාවක් වන්නීය. රළු වියළි පා ඇති ස්ත්‍රිය අවාසනාවන්තියකි. පයේ මාපට ඇඟිලි උස්ව පිහිටා ඇත් නම් බොහෝ සැප ලබන්නියකි. ගමන් කරන කල්හී දූවිලි ඇවිස්සේ නම් අවකල් ක්‍රියාවෙහි යෙදෙන ස්ත්‍රියකි. පා ඇඟිලි එක පිට නැගී සිටීම වැන්දඹු ලක්ෂණයකි. මේ අකාරයට ස්ත්‍රී අංග ලක්ෂවලින් හෙළිවන රහස් කිහිපයක් පහතින් දැක්වේ.

පා, නියපොතු වටව උස්ව තඹවන් වුවහොත් ඈ බෝග සම්පත් ලබන්නීය. පිට පතුල නෙලුම් පෙත්තක පිට පැත්තේ හැඩයට සමානව පිහිටා ඇත්නම් පිනැතිය. පා මැද නහර ගැට ගැසුණේ නම් නිකරුණේ ඇවිදින්නියකි. උඩු පතුලේ ලොම් ගැවසුණේ නම් දාසියකි. විලුඹ, තඹ වූයේ නම් පිනැතිය. උස්ව පිහිටියේ නම් අසුබය.

කෙණ්ඩ, මස් වැඩි ලොම්නැති සිනිඳු සමින් වැසුණු කෙණ්ඩ ඇති කාන්තාව සැප ලබන්නීය. දණහිස, මස්වැඩි වට වූ දණහිස් ඇත්තී වාසනාවන්තියකි. උකුල මහත්ව ඉඟටිය සිහින්ව ඇත්තී පින්වන්තියකි. වැහැරී නැවී කුඩාව හෝ ලොම් ඇතොත් කණවැන්දුම් වීමේ ලක්ෂණයකි.

නිතඹ, බිම්බාකාරව උස්ව හෝ මස් අධිකව පළල් වුවහොත් කම් සැප ලබන්නීය. ලෙලෙන නිතඹ ඇත්තී කාමාධිකය.

උරහිස නැවුණු උරහිස පුතුන් ඇති ලක්ෂණයකි. කෙටි වුවහොත් සැප ඇත්තියකි. මස් වැඩුණොත් ඉතා කාමාධිකය. මස් රහිත වූයේ නම් වැන්දඹු වෙයි. සමව උරහිස් ඇත්තී පින්වන්තය.

අතේ මහපට ඇඟිල්ල පියුම් කැකුළක් බඳු වූයේ හා පිරිසුදු හා පැහැදිලි රේඛා අත්ලේ පිහිටියේ නම් ඇය පිනැත්තියකි. අත්ල පියුමක් මෙන් මොළොක් වූයේ නම් සැප ලබන්නියකි. කොඩි කුඩ මත්ස්‍ය ස්වස්තික දුනු ආකාර ලක්ෂණවලින් එකක් යම් කාන්තාවකගේ අත්ලේ පිහිටියේ නම් ඈ සැප ලබන්නියකි. චක්‍ර යුධායුද ජය සංකේත යන ලක්ෂණවලින් එකක් පිහිටියේ නම් ඇය කිසි ලෙසකින් දුක් නොවිඳින භාග්‍යවන්ත කාන්තාවකි. රෝම ගැවසුණු හා වළ ගැසුණු පිට අල්ල ඇති කාන්තාව ස්වාමියාට අපල වෙයි. නහර ඉලිප්පී ලොම් ගැවසුණු පිටි අල්ල ඇති ස්ත්‍රිය චිත්ත සන්තාපයෙන් කල් ගෙවන්නියකි. මහපට ඇඟිල්ල මුල සිට සුළැඟිල්ල දක්වා අල්ලේ රේඛා වැටී ඇති නම් ඇය ස්වාමියා නසන්නීය. පැතලි වැහැරී හැකිළුණු ඇඟිලි පුරුක් බිය රෝග ඇති කරයි. වකුටු වූ හෝ රළු වූ නියපොතුද රෝග බිය ඇති කරන අතර නියපොතුවල සුදු බින්ඳු වැටීම අධික කාමාශාව ඇති බවෙහි ලක්ෂණයකි.

ඛෙල්ල, වට වූ පිරුණු දිග් වූ ඛෙල්ල ඇති ස්ත්‍රිය ස්වාමියාට සැප ගෙන දෙයි. ඛෙල්ල කෙටි වීම ස්වාමියාට සැප අඩු කරයි. ඛෙල්ලේ රේඛා 3ක් පෙනේ නම් එය ඉතා සුබ ලක්ෂණයක් වෙයි. ඛෙල්ල පැතලි නම් ස්වාමි සැප අඩුය. කම්මුල් මස් ඇති පිරුණු සිනා පිරි කම්මුල ඇත්තී වාසනාවන්තියකි. මස් අඩු රළු වකුටු කම්මුල ඇත්තී දුක් ලබන කාන්තාවකි. සිනාසෙන විට මැදි වළ ගැසුණු කම්මුල් ඇති කාන්තාව නිතර ප්‍රීතියෙන් සිටින්නීය. යටි තොළ වටව සිනිඳුව බඳු වදමල් මෙන් පැහැපත්ව තිබේ නම් උතුමන් ප්‍රිය කරන කාන්තාවකි. රළුව එල්ලා වැටෙන මස් රහිත කළු වූ යටි තොල ඇති කාන්තාව ස්වාමි සැපය අඩු කරයි.

සමව කුඩාව කිරිවන් පැහැ දත් දෙතිස ඇත්තී පින්වත් කාන්තාවකි. කසාවන් හෝ කළුව මහත්ව පලල්ව සක් කැබලි වැනි දත් පිහිටියේ නම් පින් අඩු කාන්තාවකි. යටි ඇන්දේ දත් වැඩි කාන්තාව මවගෙන් වෙන්වෙයි. විකෘති ආකාර දත් ඇති කාන්තාව වැන්දඹු වෙයි. කුඩා සිදුරු ඇති සම වට වූ පටු නාසය ඇති ඇත්තී පින්වන්තය. අගින් වක් වූ නාසය ඇත්තී වැන්දඹු වේ. පැතැලි නාසය ඇත්තී දාසියකි. එල්ලෙන නාසය ඇතිනම් ඇය කළහා ප්‍රියකරයි.

මුවන්ගේ ඇස් වැනි ඇස් ඇති නම් පින්වන්තය. මී, කොඛෙයි යන සතුන්ගේ ඇස් වැනි ඇස් ඇති නම් ඇය නපුරුය. දකුණු ඇස වපර වූයේ නම් වැන්දඹු වෙයි. වම් ඇස වපර වූයේ නම් පරපුරුෂයන් සොයයි. බිඟුවන් ඇස් ඇත්තී ස්වාමියා ධනවත් කරයි. කළු පැහැ ගන සැහැල්ලු ඇසිපිය ඇත්තී හිමියාට ප්‍රියවනසුලුය. නිතර ඇසිපිය ගසන්නේ මානය වැඩි ගුණ හීන කාන්තාවන්ය. නීලවර්ණ ඇස්බැම ඇත්තී වාසනාවන්තය. ඇස් බැම දෙක හාවී නම් නිතර දුක් ලබන කාන්තාවකි. කන් දෙක එල්ලෙන ස්වභාව ඇත්නම් ඉතා යහපත්ය.

නළල් තලය උස්ව මොලොක්ව අගල් 3ක ප්‍රමාණවත්ව අඩ සදාකාරව ඇතිනම් වාසනාවන්තය. කෙස් වැටිය ඇතකුගේ කුම්භස්තලය වැනි වූයේ නම් පුණ්‍ය ලක්‍ෂණයකි. මී මැසි මෙන් පැහැතිව අගින් නැවුණු සිහින්ව කෙස් ඇති වූයේ නම් එයද පුණ්‍ය ලක්‍ෂණයක්වේ. ඝන වූ රළු වූ හිස කෙස් ඇති නම් දුක් විඳින කාන්තාවකි.

නළල මැද හෝ බැමි දෙක අතර මැස්සකු වැනි ලපයක් ඇතිනම් හිමියාගේ සහකරුගේ හා මෙහෙකරුවන්ගේ සැප ලබන කාන්තාවකි. කම්මුල් මැද ලපය රතු නම් මහ පින් ඇත්තියකි. පියවුරු දෙක අතර රතු ලපයක් ඇති නම් අවට ලෝකයාගේ ආදරය දිනාගනිමින් රජ සැප ලබන කාන්තාවකි. නාසයේ අග රතු ලපයක් ඇතොත් ඕ තොමෝ ධනවන්තියකි. එය කළු වුවහොත් පරපුරුෂයන් කරා යයි. නාභියෙන් පහත ලප කැළලක් ඇතොත් ඈ පින්වන්තයි. නළල් ත්‍රිශූල ලක්‍ෂණයක් ඇතොත් ඈ සේනාධිපතිනියක් වන්නීය.

මාලනී විතානගේ


නව අදහස දක්වන්න