බුද්ධිය දිනන්න පොත් කියවන්න | දිනමිණ

බුද්ධිය දිනන්න පොත් කියවන්න

කාලීන සමාජයේ පොතට ඇලුම් කරන්නෝ කවුරුන්ද? පොතක ඇති වටිනාකම පිළිබඳ යමෙකුගෙන් විමසුව හොත් කුමන ආකාරයේ පිළිතුරක් ලැබේවිද කියා සිතාගත නොහැකිය. වත්මන් සමාජය තුළ පොත් කියවීම සඳහා මිනිසුන් රුචිකත්වයක් දක්වන්නේ ඉතාමත් අඩුවෙනි. පොත් කියවීම විනෝදාංශයක් කරගත් අයවලුන් ද සිටිති. පොත නැතුවම බැරි පරිසක් ද සිටිති. ඒ අතර මැද පොත් කියවීම කම්මැලිකමක් සේ සලකන පිරිසක් ද සිටියි. එමගින් පෙනී යන්නේ එකිනෙකා පොතට ලබාදෙන වටිනාකමයි. පොතක් කියවීමට නිදහස් වටපිටාවක් අවශ්‍යම නැත. නමුත් මානසික වටපිටාව අප විසින්ම ගොඩනගාගත් තැන පොතක් කියවීමට තරම් නිදහස් පරිසරයක් අප නොදැනුවත්වම නිර්මාණය වේ. බණ පොතක් අපි කියවනු ලබන්නේ මානසික නිදහසක් ලබාගැනීමේ අපේක්ෂාවෙනි. එබැවින් පොතක් කියවීම භාවනාවකට සමාන කළ හැකිය. මනස නිරවුල් නම් අප කියවන දේවල් අපගේ මනසේ තැන්පත් වන අතර නිදහස් මනසක් නොමැති වූ කල කොපමණ පොත් සංඛ්‍යාවක් කියවූවද කිසිදු කරුණක් මතකයේ රැඳෙන්නේ නැත. පොතක් කියවීම තුළින් මානසික නිදහසක් අප බලාපොරොත්තු වුවද අපගේ මානසික ඒකාග්‍රතාවය ද අනිවාර්ය වේ. ඔබ කිසිම විටෙක කාලය අපතේ අත් නොහරින්න. හැකි සෑම විටම පොතක් අතට ගන්න. රූපවාහිනිය, අන්තර්ජාලය, ජංගම දුරකථනය අභිමුව ඔබේ වටිනා කාලය බිලිනොදෙන්න. හැකි සෑම විටම ඔබට ප්‍රයෝජනවත් යැයි සිතන දෙයක් වෙනුවෙන් කාලය වැය කරන්න. පොතක් කියවීමට සිතේ උනන්දුව තිබීම අනිවාර්ය වේ. ඔබේ සිතෙත් උනන්දුව ඇති කරගන්න. පොතක් කියවීම තුළින් ඔබට නැතිවන්නට දෙයක් නැත. එමගින් ඔබට දැනුම, ආකල්ප, කුසලතා වර්ධනය කරගත හැකිය. එය ඔබේ ජීවිතයට යමක් එකතු කරගත හැකි තෝතැන්නකි. ඔබ කිසිම විටෙක පොතක පිටකවරය දෙස බලා පොතෙහි ඇතුළාන්තය නිගමනය නොකරන්න. හැකි සෑම විටම පොතෙහි හරය පමණක් ලබාගන්න. පොතෙහි අභ්‍යන්තර සාරය පමණක් උරා බොන්න. කියවීමෙන් ඔබේ ජීවිතයට පන්නරය ලබාගන්න. එමගින් ඔබ ඔබව දකින්න. ඔබ ඔබම නිර්මාණය කරගන්න. ඔබ තුළින් අනෙක් අයට ආදර්ශයක් මතු කර පෙන්වන්න.

“කියවීම මිනිසා සම්පූර්ණ කරයි”

නම් ඔබ තුළින් සම්පූර්ණ මිනිසෙකු ඉස්මතු කර ලෝකයාට පෙන්වන්න. ඔබ නිතර පොත් ගුල්ලෙකු වන්න. ඔබ පොතට ආදරය කරන්න. “පොත නුඹ හොඳයි මිතුරන දහසකට වඩා” යැයි සෑම විටම සිතන්න. පොත මිතුරෙකුව කරගන්න එතුළින් ඔබට සම්පූර්ණ මිනිසෙකු වියහැකි බව නොඅනුමානය.

පී. එම්. දීපිකා ප්‍රියදර්ශනි
සන්නිවේදන අධ්‍යයන පීඨය
නැ‍‍‍ඟෙනහිර විශ්වවිද්‍යාලය -
ත්‍රීකුණාමල මණ්ඩපය


නව අදහස දක්වන්න