රාගම හදමු | දිනමිණ

රාගම හදමු

රාගම ජනාකීර්ණ නගරය ගම්පහ දිස්ත්‍රික්කයේ කේන්ද්‍රස්ථානයකි. රාජ්‍ය ආයතන රාශියකි. කොළඹ ජාතික රෝහල තරම් නොවූවත්, උතුරු කොළඹ (රාගම) ශික්ෂණ රෝහල තරම් දියුණු රජයේ රෝහලක් ගම්පහ දිස්ත්‍රික්කයටම නැත. ප්‍රධාන දුම්රිය මාර්ගයේ උතුරකරා දිවෙන මාර්ගයේ ප්‍රථම දුම්රිය මංසන්ධිස්ථානය ඇත්තේද රාගම නගර මධ්‍යයේය. “රණවිරු සෙවණ” නගරාසන්නයේම ඇත. රක්තවේදය හෙද රෝහල (පුනරුත්ථාපන රෝහල) නගර ආසන්නයේ පිහිටා ඇත. වැලිසර ජාතික ශ්වසන රෝහල කිලෝමීටරයක පමණ දුරින් පිහිටා ඇත. කැළණිය විශ්වවිද්‍යාලයයේ රාගම වෛද්‍ය පීඨයද නගරයේ සිට කිලෝමීටරයකට අඩු දුරකින් පිහිටා ඇත. දිවයිනේ එකම කතෝලික බැසිලිකා සිද්ධස්ථානයට බසයකින් යතොත් විනාඩි 05කින් ළඟා විය හැකිය. කතෝලික කන්‍යාරාම රැසක් (තේවත්ත) ඒ ආශ්‍රිතව ස්ථානගතව ඇත. ඉහළගම ශ්‍රී සුගතාරාමය ඇතුළු බෞද්ධ විහාරස්ථාන කීපයක්ම නගරයට නුදුරින් පිහිටා ඇත. එයින් සුගතාරාම විහාරස්ථානයේ පූජ්‍ය තුරුවිල විමලධම්ම නායක හිමියන්ද රාගම ශු. පේදුරු හා පාවුළු දේවස්ථානයේ මීසම් පාලක ග්‍රෙගරි ජයන්ත ප්‍රනාන්දු පියතුමාද ප්‍රදේශයේ සමය සමයාන්තර සුහදතාවයට දෙන රුකුල අගය කටයුතුය. ප්‍රධාන පෞද්ගලික රෝහල් ‍දෙකක්ද තවත් වෛද්‍ය මධ්‍යස්ථාන රැසක්ද නගරයේ ඇත.

මෙසේ කිව නොහැකි තරම් රාජ්‍ය, ආගමික, පෞද්ගලික ආයතන රැසක්ද කේන්ද්‍රකරගත් රාගම නගරය දැන් දැන් අලංකාර වෙමින් පැවතීම සතුටට කරුණකි. වත්මන් බස්නාහිර පළාත් සභාවේ ප්‍රධාන ඇමැති ඉසුර දේවප්‍රිය මහතාගේ ප්‍රධානත්වයෙන් පැවැති උළෙලක් වෙනුවෙන් රාගම නගරය අලංකෘත කිරීමද අපි බෙහෙවින් අගයමු. ඊට මූලිකවූ බස්නාහිර පළාත් මන්ත්‍රී මෙරිල් පෙරේරා, ජාඇල ප්‍රාදේශීය සභා සභාපති චන්ද්‍රපාල මදුරප්පෙරුම, මහතා ඇතුළු ඊට දායක වූ සමස්ත රාගම නගරයට හිතැති “රාගම්පරපුර සංසදය” ප්‍රමුඛ ජනතාවගේ ප්‍රසාදය පිළිගන්වමු.

රාගම නගරය පිළිසකර කිරීමේ අවශ්‍යතාවය අපි කලෙක සිට පෙන්වා දුන්නෙමු. එහි යම් ආකාරයක ඵල දැරීමක් දකින අපි ඊට “අචාරය” පුද කරමු. රජය වේවා විපක්ෂය වේවා කවුරුත් කළද හොඳ හොඳයයි කීමට අපි පසුබට නොවෙමු. යහපාලන රජය ද රාගමට යම් යම් සංවර්ධන වැඩපිළිවෙළවල් ක්‍රියාත්මක කළ බව අප දකිමු.

එසේම දිවයිනේ ප්‍රථම පියාසර පාලම (ගුවන් පාලම) ඉදිකිරීමට දායක වූ සැමද, වර්තමානයේ එය අලංකාර කර රාගම පිවිතුරු නගරයක් බවට පත් කිරීමට අඩිතාලම දමා ඇති සැමද අපි බෙහෙවින් අගයමු. ස්වර්ගස්ථ කාදිනල් කුරේ අගරදගුරු හිමිපාණන් නමින් නම්කර ඇති එම ගුවන්පාලම රාගම රෝහලට රැගෙන එන රෝගී ජනතාවට කඩිනමින් එහි යාමට ඇති විකල්පය වුවද ඒ වාහන තදබදය අවම කළ යුතුව ඇත. ඊට විකල්පය බලධාරීන් විසින් විමසා සොයා ගැනීම වැදගත් වෙයි. රාගමට අරුණලු ගෙනෙන කාටත් අපේ ප්‍රසාදය.

සී.ආර්. ඩික්සන් ඇන්ටනි


නව අදහස දක්වන්න