කන්න හයක් පාළු වී ගොවියෝ අසරණයි
බිබිල මැතිවරණ බල ප්‍රදේශයේ මඩුල්ල ප්‍රාදේශීය ලේකම් කොට්ඨාසයේ උඩුමුල්ල ගමේ පිහිටි කෙහෙල්ලන්ද වැවේ ප්‍රතිසංස්කරණ කටයුතු ආරම්භ කර වසර තුනක් ගෙවී ගොස් ඇතත් වැඩ අවසන් නොකිරීම නිසා කන්න හයක් කුඹුරු අස්වැද්දීමට නොහැකි වීමෙන් ගොවීන් අන්ත අසරණ තත්ත්වයට පත්වී සිටිති. වැවේ ජල ධාරිතාව වැඩි කොට අලුතෙන් සොරොව්වක් ඉදිකිරීම සඳහා 2016 වර්ෂයේ දී වැවේ ප්‍රතිසංස්කරණ ආරම්භ කර ඇත. ඒ අනුව වැව් බැම්ම පළල්කොට වැව් බැම්ම අඩි 6 කින් උස් කිරීමට සැලසුම් කර තිබිණි. ඒ සඳහා රුපියල් මිලියන හතළිස් තුනක් වැය කිරීමටත් සියලු ඉදිකිරීම් වාරිමාර්ග දෙපාර්තමේන්තුව මඟින් සෘජු ශ්‍රමය මත කිරීමටත් නියමිතව තිබිණි. ප්‍රථමයෙන් සිදු කළේ වේල්ල කපා පැරැණි සොරොව්ව ඉවත් කිරීමය. සොරොව්ව අසල රැඳී තිබූ විශාල වැලි තට්ටුව ඉවත් කිරීමෙන් අනතුරුව වේල්ල උස් කරන ලදි. පසුගිය මාසයේ ප්‍රදේශයට ඇද හැලුණු මහ වැස්සත් සමඟ බැම්මේ විශාල කොටසක් ජල පහරට කඩාගෙන ගොස් කුඹුරු යාය සහ ඒ අවට නිවාස කිහිපයක් පස් හා රොන් මඩවලින් යටවිණි. මේ පිළිබඳ වැව ආසන්නයේ පිහිටි බිංගොඩ පුරාණ රජමහා විහාරයේ විහාරාධිපති ගලබැද්දේ රතනජෝති හිමිපාණන් වහන්සේ මෙසේ වදාළහ.
විහාරස්ථානය අසල පිහිටි කෙහෙල්ලන්ද වැව ඉතාමත් පැරැණි වැවක්. වැවේ සොරොව්ව අසලින් කාලයක් සිට සුළු ජල කාන්දුවක් තිබුණා. එයින් කිසිදු හානියක් වුණේ නැහැ. 2016 අවුරුද්දේ එවකට වාරිමාර්ග ඇමැතිව සිටි ගාමිණී විජිත් විජයමුණි සොයිසා මහතා වැව ප්‍රතිසංස්කරණය කිරීමට මුදල් වෙන් කළා. අලුතෙන් සොරොව්වක් සවිකිරීමට වේල්ල කැපුවා. සොරොව්ව අසල තිබුණු වැලි නිධිය ජාවාරම්කරුවෝ අරගෙන ගියා. බැම්මේ පස් වැඩ ටික කළා. බාගයක් වැඩ කරලා වාරිමාර්ග දෙපාර්තමේන්තුවේ මහත්වරු යන්න ගියා. පසුගිය මාසයේ මහ වැස්සට සොරොව්ව ළඟින් බැම්මේ විශාල කොටසක් කඩාගෙන ගියා. මගේ දායකයන්ට කන්න හයක් වැව යටතේ කුඹුරු අස්වැද්දීමට නොහැකි වුණා. ඒ අය අන්ත අසරණ තත්ත්වයට පත්වෙලා.
ඩී.එම් ගුණපාල ගොවි මහතා - කෙහෙල්ලන්ද වැව ප්‍රතිසංස්කරණය කරන්න කියලා ඇවිත් කළේ මහා අපරාධයක්. ගොවි පවුල් දෙසීයකට පමණ කන්න හයක් ගොවිතැන් කරන්න බැරිවුණා. තඹරකැටිය ආර හරහා වැවට ජලය පිරෙනවා. ගොවියෝ කවුරුවත් ඉල්ලුවේ නැහැ වැව ලොකු කරන්න කියලා. වැවේ වේල්ල පළල් කරලා අඩි හයකින් වේල්ල උස්සලා ජල ධාරිතාව වැඩි කරලා දෙකන්නයටම ජලය දෙනවා කියලා තමයි වාරිමාර්ගයේ මහත්වරු කීවේ. පරණ සොරොව්ව ලඟින් බැම්ම කඩලා අලුත් සොරොව්ව හදනවා කිව්වා. වැවේ වැලි ටික ගොඩ දාගෙන පස් වැඩ විතරක් කරලා මහත්වරු යන්න ගියා. වරින්වර ඇවිත් ටික ටික වැඩ කළා. පසුගියදා ඇදහැළුණු මහ වැස්සට අලුත් සොරොව්ව හදන්න බැම්ම කඩපු තැනින් විශාල කොටසක් කඩාගෙන ගිහින්. පහළ කුඹුරු යායවල් යට වුණා. ගෙවල් දොරවල් ද ජලයෙන් යටවී විශාල හානියක් වුණා. අපි රජයෙන් ඉල්ලන්නේ කන්න හයක් කුඹුරු කරන්න බැරිවුණු ගොවීන්ට වන්දියක් දෙන්න, ඉක්මනටම වැවේ බැම්ම හදලා කුඹුරුවලට ජලය දෙන්න කියලයි.
මඩුල්ල ප්‍රාදේශීය සභාවේ සභාපති චමින්ද පුෂ්පකුමාර මහතා- කෙහෙල්ලන්ද වැවේ ප්‍රතිසංස්කරණය කරනවා කියලා සිදුකළේ මහා විනාශයක්. පැරැණි සොරොව්ව අසල ගොඩ ගැසී තිබුණු වැලි ටික ගොඩ දා ගත්තා ඇමැතිගේ හිතවතුන්. ගොවි සංවිධානයත් ඊට උදව් කළා. ඒ කාලයේ ප්‍රාදේශීය සභාව පාලනය වුණේ නිලධාරීන් යටතේ. වැවේ ඉදිකිරීම් සොයා බැලීමට මහජන නියෝජිතයින් සිටියේ නැහැ. ඒ නිසයි මෙවැනි අපරාධයක් වුණේ.
මොනරාගල වාරිමාර්ග ඉංජිනේරු එස්.පී අජන්ත ජයතිස්ස මහතා- පකෙහෙල්ලන්ද වැවේ සොරොව්ව අසලින් ජලය කාන්දු වෙන්න පටන් ගත්තා. දිනෙන් දින එය වැඩි වුණා. ගොවි සංවිධානයේ එකඟතාව මත පැරැණි සොරොව්ව ගලවා අලුත් සොරොව්වක් ඉදිකිරීමටත් වැව් බැම්ම පළල්කොට අඩි හයකින් උස් කිරීමටත් පිටවාන අඩි තුනකින් උස් කිරීමටත් අලුත් සොරොව්වක් ඉදිකිරීමටත් තීරණය කළා. ඒ සඳහා රුපියල් මිලියන හතළිස් තුනක් වැයවෙන ඇස්තමේන්තුවක් හැදුවා. සියලු ඉදිකිරීම් සෘජු ශ්‍රම පදනම මත වාරිමාර්ග දෙපාර්තමේන්තුව මඟින් සිදු කළා. වැඩ කරගෙන යන විට මූල්‍ය ප්‍රතිපාදන ලැබීම ප්‍රමාද වුණා. ඉදිකිරීම් කටයුතු ඉතාමත් මන්දගාමීව සිදුවුණා. පසුගියදා ඇදහැළුණු මහ වැස්සෙන් බැම්ම සොරොව්ව අසලින් කඩාගෙන ගිහින්. වැස්ස අඩු වූ වහාම බැම්ම හැදීමට කටයුතු කරනවා.2018/19 මහ කන්නයේ කුඹුරු අස්වැද්දීමට නොහැකි වේවි.
ඌව වෙල්ලස්ස විශේෂ ඩී.එස් ගුණතිලක
නව අදහස දක්වන්න