අම්පාර උහන තිස්සපුර ගම්මානයට කාලයක සිට වන අලි ගම්වැදීම හේතුවෙන් එම ප්‍රදේශයේ ගම්වාසීන්ට නිවෙස් අතහැර දමා ආරක්ෂක ස්ථාන කරා යාමට සිදු වී ඇතැයි ගම්වාසීහු පවසති. දිනපතාම ගම් වදින අලි තම ගෙවතු වගාවන් මෙන්ම නිවාස ද විනාශ කරන බව ඔවුහු සදහන් කරති.
මේ පිළිබද ප්‍රදේශවාසීහු මෙසේ කීහ. ඩබ්ලිව්. වික්‍රමපාල- තනි අලියා තාප්පය කඩලා අපේ වත්තට ආවා. වත්තේ තිබුණු කෙසෙල් වගාව සම්පූර්ණයෙන්ම විනාශ කළා. රාත්‍රී කාලයේ වැසිකිළියටවත් යන්න බයයි. ඉස්සර අලි ආවත් මේ වගේ කරදරයක් වුණේ නැහැ. මේ දවස්වල දිගටම වන අලි ගම් වදිනවා. අලි එළවන්න වෙඩිල්ලක්වත් නැත. හදිසියේ රාත්‍රී කාලයේ අසනීපයක් වුණොත් රෝගියා රෝහලට රැගෙන යන්නත් බයයි.
ඩබ්ලිව්. ඩබ්ලිව් . මනෝරි - හැමදාම අපේ වත්තට ගේට්ටුව පිටිපස්සෙන් අලියා ඇවිත් යනවා.
ආනන්ද අතුකෝරාල - මේ කන්නයේ අපේ කුඹුරු වගා කර තිබෙනවා. අලි එන නිසා රාත්‍රි කාලයේ ගහක් උඩ පැළක් හදාගෙන තමයි ඉන්නේ. අලි ගම්වලට ආවත් අපට අලි වෙඩිල්ලක්වත් හම්බවෙලා නැහැ. අලි වැට නම් දවල්ට හදනවා. නමුත් ඒක රෑට වන අලි ඇවිත් කඩා දානවා.
අම්පාර අලි පාලන ඒකකයේ අඩවි ආරක්ෂක එම්.ඩී.එස්. සංජීව මහතා මෙසේ කීවේය. ඔය කියන ප්‍රදේශයෙන් මාස තුනක් තුළ අපිට පැමිණිල්ලක් ලැබුණේ නම් නැහැ. කලින් නිලධාරීන් පිරිසක් උහන තිස්සපුර ප්‍රදේශයට යවලා මේ පිළිබඳ සොයා බලා වන අලින් ගම් වැදීම නතර කිරීමට අවශ්‍ය කටයුතු කළා. ඒ වාගේම සිවිල් ආරක්ෂක නිලධාරීන් විසින් අලි වැට නිතරම පරීක්ෂා කරනවා. නඩත්තු කරනවා.
රවීන්ද්‍ර මැදගෙදර - අම්පාර සමූහ
නව අදහස දක්වන්න