කා‍ටුන් පැයට එන රාක්ෂයන් | දිනමිණ

කා‍ටුන් පැයට එන රාක්ෂයන්

කාටූන් හෝ කොමික් කතා මාලා කුඩා දරුවන් සඳහාම නිර්මාණය කළ බවත් මට පෙනෙන්නේ නැත. - ජෙෆ් කිනී

කාටූන් පැය එනතුරු ඇත්තේ නොඉවසිල්ලකි. සියලු දඟකම් පසෙක ලා ඕනෑ එපාකම් පසෙක ලා පූස් පැටවුන් ගුලි වෙන්නා සේ හරි බරි ගැහී සිටින්නේ රූප පෙට්ටියට මානා ගන්නට ය. තවත් සුළු මෙහොතකින් ඇහේ කළු බබා එළියට පනින්නට ඔන්න මෙන්නා සේ ය. ඔවුන් නරඹන්නේ ගුණාත්මක අධ්‍යාපනයක්, විනෝදයක් ලැබිය හැකි දේ දැයි ඔබ නොසිතන්නට ඇත. මීට දශකයකට පමණ පෙරාතුව කාටුන් පැය ලෙස හඳුනාගත්ත ද අද කාටූන් පැය, දෙපැය තුන් පැය වෙලා ය. ඒ චැනලයෙන් මේ චැනලයට මාරු වන කාටූන් පමණක් නොව ඩීවීඩී පට හරහා කාටූන් නැරඹීම ද දැන් බොහෝ ජනප්‍රිය ය. ඒ අතර සිංහලට හඬ කැවූ කාටූන් මෙන්ම ඉංග්‍රීසි කාටූන්වලට වැඩි ඉඩක් හිමිව ඇත. පෙපා පිග්, බෙන් ඇන්ඩ් හොලී, ජන්ගල් බුක් ආදී තවත් බොහෝ ඉංග්‍රීසි කාටූන් නැරඹීමට ළමෝ බොහෝ ප්‍රිය ය.

එහෙත් ලොව පුරා ජනප්‍රිය පෙපා පිග් හා විනී ද පූ වැනි කාටූන් ඇතැම් සංවර්ධිත රටවල තහනමට ලක් වූ බව දන්නෝ කී දෙනා ද? චීනයේ බෙහෙවින් ජනප්‍රිය මෙම කාටුනය එරට ජනප්‍රිය සමාජ ජාලා මඟින් ඉවත් කර ඇති බව බීබීසී වාර්තා සඳහන් කොට ඇත. චීන පුවත්පතක් වන ග්ලෝබල් ටයිම්ස් පෙන්වා දෙන පරිදි පිරිමියකු ගැහැනියක සේ හැඩ වී සිටීම, ගිනි අවි, විවිධ ආගමික මත ආදී තවත් බොහෝ මතභේදාත්මක දේ මෙහි දර්ශන තලවල අඩංගු වෙයි. එසේම පිටපත් මිලියන දෙසියයකට වඩා අලෙවියක් වාර්තා කළ ලොව ජනප්‍රිය කාටූන් පෙළක් වූ ටින් ටින් ට එරෙහිව බෙල්ජියම් අධිකරණයේ නඩුවක් ගොනු කෙරුණේ එය වර්ගවාදය වපුරන්නේ යැයි කළු ජාතිකයන් චෝදනා කළ නිසා ය.

පොදු මාධ්‍ය

වාර්ගික සමානත්මතාව පිළිබඳ බ්‍රිතාන්‍ය කොමිසන් සභාව පවා ඇතැම් විටෙක ටින් ටින් විවේචනයට ලක් කළේ ය. එහි එක් කාටූන් දර්ශනයක කළු ජාතික කාන්තාවක් "සුදු මිනිසුන් ශ්‍රේෂ්ඨයි" කියා කෑ ගසයි. මෙවන් අවස්ථා අගතිගාමී වර්ගවාදය පිළිබිඹු කරන්නේ යැයි විවේචනයට ලක් වෙයි. හුදෙක් සමස්තය අමතන පොදු මාධ්‍යය නැරඹීමේ දී එය පුද්ගලීකරණයට නතු වන්නේ ඒවායෙහි එන රූප රාමු, දෙබස්, ඈ සියල්ල තම තමන්ගේ පෞද්ගලික අත්දැකීම් හා බද්ධ වන හෙයිනි. දරුවන්ගේ විෂයෙහි ද එය එසේම ය. විනී ද පූ වැනි මනෝ මූලික සත්ත්ව චරිත හරහා දරුවන්ගේ ලෝකය ග්‍රහණය කර ගන්නා කාටූන් චීනය වැනි රටවල තහනමට ලක් වූ යේ එම කාටූන් චරිත එලෙස පුද්ගලිකත්වය හා බද්ධ වීම නිසා ය. පැණි මුලට කෑදර සුරතල් පූ එරට දේශපාලනට බලපෑම් කළ කාටූන් සත්ත්වයෙක් වූයේ එරට ජනාධිපතිවරයාගේ චරිතය පූ කෙරෙන් විද්‍යාමාන වූ නිසා ය. මෙනිසා සමාජ දේශපාලනික කතිකාවන් හෝ උපහාසාත්මක එවන් පණිවුඩ දරුවන්ගේ මාධ්‍ය හරහා ලෝකයට ගෙනයාම ඛේදණීය ය. දරුවන් හුදෙක් අනුකරණය හරහා අත්දැකීම් ලබන්නෝ වෙයි. එහෙත් ඔවුන් අනුකරණය කරන්නේ චීනයේ ජනපති හෝ කළු ජාතිකයකු හෝ සුදු ජාතිකයකු නොවේ. එය හුදෙක් ඔවුන් උදෙසා ප්‍රථමව කාටූන් චරිතයම වන්නේ ය. දෙවනුව කරුණු පැහැදිලිව දැන ගනු ඇත. තෙවනුව චරිත නිරූපණය සඳහා මෙම දරුවෝ පසුබට නොවෙති. මෙවන් අවස්ථා දරුවන්, මවුපියන් සේම සමාජයේ සෙසු අය ද අපහසුතාවට පත් කරන්නා සේ ම දරුවකු තුළ වැඩි වෙනත් ජාතියක්, ආගමක් හා හිටියකු කෙරේ වන ගෞරවය බිඳ දමන්නට සමත් වන බව පැහැදිලි ය.

කාටුන් තහනම

දරුවන් දැයේ අනාගතය යි. ඔවුන් උදෙසා ගුණාත්මක අධ්‍යාපනයක් ලබා දීම රජයේ සේම මවුපියන්ගේ ද වගකීමයි. අත්දැකීම් මූලික කර ගත් අධ්‍යාපනයක් දරුවන් උදෙසා වඩා යෝග්‍ය බව ...... මාරියා මොන්ටිසෝරි ප්‍රකාශ කළා ය. එය හුදෙක් දරුවකුගේ වටපිටාව, සංකල්ප මෙන්ම ක්‍රියාකාරීත්වයන් පිළිබඳ දැනුම වැඩි දියුණු කිරීම සඳහා ඉවහල් වන්නේ ය. එහෙත් වත්මන් ළමා පරපුරේ අත්දැකීම් බහුමාධ්‍ය කේන්ද්‍රීය වී ඇති සෙයක් බැලූ බැල්මට පෙනෙන්නට ඇත. විශේෂයෙන් දරුවන් සඳහා වන කාටූන් චිත්‍රපට ප්‍රදර්ශනයට පෙර ඇගයීමේ ක්‍රමවේදයක් හෝ දරුවන් ගේ මනස විනාස කර දමන ඇතැම් දර්ශන තල ඇතුළත් කාටූන් විෂයෙහි ක්‍රියාත්මක වීම සඳහා නීතිමය පදනමක් හෝ බොහෝ රටවලට ඇත්තේ නැත. ඇතැම් සංවර්ධිත රටවල් මේ පිළිබඳ උත්සුක වන අතර ඒ සඳහා ගත හැකි ක්‍රියාමාර්ග කෙරෙහි ද අවධානය යොමු කොට ඇත. චීනයේ Securities Times පුවත්පත දක්වන පරිදි දරුවන්ට අහිතකර ආකාරයේ පෙපාපිග් දර්ශන ඇතුළත් වීඩියෝ ක්ලිප් 30 000 ක් පමණ මුදාහැර ඇත. ළමුන් අතර ජනප්‍රිය මෙම කාටූන් පෙළ මේ වන විට වැඩිහිටියන්ගේ ද ප්‍රියතම කාටූන් පෙළ වී ඇත. ඔස්ට්‍රේලියාව වරෙක පෙපා පිග් තහනමට ලක් කෙරුණේ භයානක සතුන් සමඟ මිත්‍රකම් පැවැත්වීම දරුවන් පෙළඹවීම නිසා ය.

නැවත නැවතත් කිව යුතුව ඇත්තේ දරුවන් අනුකරණයේ දක්ෂයෝ ය. ටාසන්, ස්පයිඩර් මෑන් වැනි කාටූන් දර්ශන අනුකරණය කිරීමෙන් දරුවන්ට වූ අනතුරු බොහොමයක් ලොව පුරා වාර්තා වෙයි. ඒ අතර ඇමරිකාවේ වයස අවුරුදු හයක දරුවකු ස්පයිඩර් මෑන් රඟ දැක්වීමට ගොස් උඩුමහලකින් බිමට වැටීමෙන් රෝහල් ගත කිරීමේ සිද්ධිය බෙහෙවින් කනගාටුදායක ය. Superhero-related injuries in paediatrics: a case series පර්යේෂණ පත්‍රිකාව මඟින් මෙවන් අවස්ථා අධ්‍යයනට ලක්කර තිබූ අතර දරුවන් අවධානමට බිය නොවීම හා කාටූන් මඟින් දකින රූප රාමු කෙරෙන් අවදානම පිළිබඳ දැනුවත්කම ඔබ්බෙන් ගිය කුකුස වඩවාලීම නිසා දරුවන් මෙවන් අනතුරුවලට ලක් වෙයි. පෙපා පිග් මකුළුවකු සමඟ ජීවත්වීම මිත්‍රකම් පැවැත්වීමත් මෙවැනිම අවස්ථාවක් වූ බව ඔස්ට්‍රේලියාව පවසන්නේ එරට විෂ සහිත මකුළුවන් දහස් ගණනක් සිටින නිසා ය. සිංහලේ මෙවන් අවස්ථා ජනශ්‍රැතියෙහි දැක්වෙන්නේ "විෂ ඝෝර සර්පයා දැක නෑර මෝඩයා"ලෙසිනි.

දෘශ්‍යමය තොරතුරු

දරුවන් සඳහා වූ බොහෝ කාටූන් දර්ශනයන්ට උපසංස්කෘතීන් අන්තර්ග්‍රහණය වී ඇති අතර භාෂාව, වර්ණ, සංගීතය, නර්තනය, චරිත ඈ සියල්ලක්ම එකී උප සංස්කෘතීන් නියෝජනය කරයි. එහි ඉලක්ක කණ්ඩායම සමස්ත දරු පරපුරයි. මෙය තරමක් විචාරශීලීව විමසා බැලිය යුතු ය. සන්නිවේදන විද්‍යාඥ ඇල්බර්ට් මෙහ්රාබියන් සඳහන් කරන පරිදි මිනිසාගේ සන්නිවේදන ක්‍රියාවලියේ සියයට 93% සිදු වන්නේ සංඥා සංකේත ඇතුළත් නිර්වාචික සන්නිවේදනය හරහාය. ඒ අතුරින් දෘශ්‍ය සන්නිවේදන ක්‍රියාකාරීත්වයන් 38% කි. තිමොති ගැන්ග්වර් නම් අධ්‍යාපනඥයා සඳහන් කරන පරිදි මිනිසා 65% උගන්නේ දෘශ්‍යමය තොරතුරු හරහා ය. එසේම මොළය ගබඩා කරගන්නා තොරතුරු සමුදායෙන් 90% ක්ම ඇත්තේ දෘශ්‍යමය තොරතුරු ය. මෙනිසා දෘශ්‍ය මාධ්‍යයන් හරහා දරුවන් ඇමතීමත් මෙවන් මාධ්‍යයන් ඇසුරු කිරීමට දරුවන්ට අවස්ථාව දීමේදීත් බෙහෙවින් කල්පනාකාරී විය යුතු ය. තවත් අතෙකින් රූපවාහිනිය වැනි දෘශ්‍ය මාධ්‍යය ආලෝකය සහ අදුර ගුරු කොට ගත් මාධ්‍යය වෙයි. බොහෝ මවුපියන් දරුවන්ට උපදෙස් දෙන්නේ බොහෝ වේලාවක් රූපවාහිනිය නැරඹීමෙන් වළකින ලෙස ය. නමුත් පසුගිය දසකයකට ආසන්න කාලයක් කාර්යය බහුල මවුපියන් සොයා එන දරුවන්ගේ කරදරයෙන් බේරෙන්නට ආකර්ශනීය උපක්‍රමය ලෙස සැලකූවේ රූප මාධ්‍යය.

එවන් වකවානුවක ජපානය පෝක්මොන් කාටූනය තහනමට ලක් කළේ මෙම කාටූනයේ තීව්‍ර නිල් සහ රතු ෆ්ලෑෂ් ලයිට් සහිත දර්ශන නැරඹීමෙන් දරුවන් 600ට ආසන්න සංඛ්‍යාවක් රෝහල් ගත කිරීමත් සමඟ ය. එය හඳුනා ගන්නට එරට පර්යේෂකයන් සමත් වූයේ දරුවන් කෙරෙහි බොහෝ අවධානයක් යොමු කිරීම නිසා වුවද මෙරට කාටුනයක් නිසා එවැන්නක් සිදු වුව ද එය හඳුනා ගැනීමේ ක්‍රමවේදයක් නැත. අවධානය යොමු කරන්නෙක් ද නැත. කාටූන් පිළිබඳ විවේචන ද නැත. ප්‍රචණ්ඩත්වයට දඩුවම් නොදෙන ටොම් ඇන්ඩ් ජෙරී වැනි කාටූන් ලොව පුරා තහනමට ලක් වෙද්දී මෙරට එය එසේ වූයේ නැත. මත්ද්‍රව්‍ය භාවිතය නිසා ලුනි ටියුන්ස් කාටූනය ලොව පුරා තහනමට ලක් විය. එහි එක් දර්ශනයක් නම් කොට තිබුණේ ONE BEER ලෙසිනි. ඩොනල්ඩ් ඩක් ලොව පුරා බෙහෙවින් ජනප්‍රියත්වයට පත් කාටූන් පෙළක් වුව ද එය ‍ෆින්ලන්තය තහනම් කර දැමුවේ සමාජය හා මානව ගතිකයන් පිළිබඳ බොරු වටිනාකම් හුවා දක්වන නිසා ය. තවත් අවස්ථාවක ඊශ්‍රායලය 'ෂ්‍රෙක් 2' තහනම් කළේ ය. ඒ අන් කිසිවක් නිසා නොව ලිංගිකත්වය හුවා දක්වන ඉඟි එහි අන්තර්ගත වූ නිසා ය. කෙසේ නමුත් මෙවන් හේතු කාරණා සලකා දරුවන් ගේ මනස පිළිබඳ අවධානය යොමු කරමින් තහනමට ලක් වූ කාටූන් පිළිබඳ කතිකාවතක් අපේ රටේ ඇත්තේ නැත.

වත්මන් කාටුන්

වර්තමාන නිර්මාණ හරහා එළි බසින අමුකම පසුගිය දශකයකට අධික කාලයක් තිස්සේ ළමා නිර්මාණ කෙරෙන් ද ඉස්මතු වී ඇතැයි නොකිවමනා ය. "බෝම්බෙකට නොදෙවෙනි කෙල්ලගෙ නම නිල්මිණී" මේ දිනවල නිතර අසන්නට ලැබෙන කාටූන් ගීතයක ඛණ්ඩයකි. මෙවැනි කාටූන් ගීත, නිර්මාණශීලීත්වය, ළමා මනස අවබෝධයෙන් යුතුව හසුරුවමින් කූඹිච්චී, දොස්තර හොඳ හිත වැනි කාටූන් මෙරටට හඳුන්වා දුන් ටයිටස් තොටවත්තයන්ගේ නිර්මාණ හා සැසඳිය යුතු ය. කෙසේ නමුත් මෙරට බොහෝ දරුවන්ට නැරඹීමට අවස්ථාව ලැබෙන්නේ හඩ කැවූ කාටූන් ය. හඩ කැවීම් පිළිබඳ මුලික ගෞරවය ටයි මාමාට හිමි වෙයි. එතුමා භාෂාව, දේශීයත්වය, ළමා මනස කියැවූවෙකි. එහෙත් අද හඬ කවා රුපියල් 100ට වෙළෙඳපොළට එන කාටූන් පෙර පැවැති උසස් තත්ත්වයේ නැත. මේවායෙහි භාෂාව පිළිබඳ වැඩි අවධානයක් යොමු කළ යුතු ය. ළමුන් උදෙසා ගුණාත්මක බවින් යුත් නිර්මාණයක් ලෙස නොව වෙළෙදභාන්ඩයක් ලෙස අතට පත්වන මෙවන් කාටූන් මිලදී ගැනීමේ දී වැඩිහිටියන් සැලකිලිමත් විය යුතු ය.

ළමා කාටූන් පිළිබඳ පර්යේසණ අධ්‍යයනයන්ගේ යෙදෙන්නන් සඳහන් කරන්නේ ලොව පුරා ළමුන් 41% කාටූන් නරඹනුයේ විනෝදය සඳහා වන අතර සියයට 21% ළමුන් කාටූන් නරඹන්නේ ඒවායෙහි වන ක්‍රියාකාරකම් නිසා වන අතර තවත් 17% ළමෝ ඉගෙනීම අරමුණු කර ගන්නා බවයි. එසේම මෙම කාටූන් හි භාවිත භාෂාවේ තත්ත්වය හා දරුවන්ගේ මුල් කාලීන සංවර්ධනයට බලපාන අතර ඇතැම් අවස්ථාවල මෙම දරුවන් තමන්ගේ සහෝදර සහෝදරියන් සමඟ මෙන්ම මිතුරන් සමඟ ද ආවේගශීලි ලෙස කලහ කර ගැනීම සිදු කරයි. රූපවාහිනිය මඟින් හෝ වෙනත් මාධ්‍යයන් මඟින් කාටූන් නැරඹීම සඳහා දිගු කාලයක් ගත කිරීම නිසා පර්යේෂකයන්ට අනුව 70% පමණ දරුවන් මෙම කාටූන් අනුකරණය කිරීමටත් කාටූන් තුළින් දකින දෑ සැබෑ ජීවිතය ලෙස සිතීමටත් පෙළෙඹෙයි. මෙම වයසේ දි හොඳ හා නරක වෙන් කොට හඳුනා ගත නොහැකි වීම නිසා ළමා මනසෙහි මනා පෝෂණයකට නිසි මාර්ගෝපදේශකත්වය අවැසි ය.

නිලූකා ඩී තිලකරත්න

 

 

නව අදහස දක්වන්න