චෙක්පත් මාරු කිරීමේ මගඩියක් | දිනමිණ

චෙක්පත් මාරු කිරීමේ මගඩියක්

එරිචෙට්ටිගේ අල්ලස් ලැයිස්තුවේ හුන් සාමාජිකයන් එකා බැගින් දැලට කොටුකර ගැනීමට පිඹුරුපත් සැකසීම ඇරඹී තිබුණේ එය වෙයින්බර්ග් හරහා ඇබ්ස්කැම් නියෝජිතයින්ට ලැබුණු දා පටන්ය. එරි­‍චෙට්ටි මෙන්ම ඔහු විසින් හඳුන්වා දෙන්නට යෙදුණු කෙනත් මැක්ඩොනල්ඩ්ද අල්ලස් ලබාගැනීමට පොළඹවා ගත්තේ අබ්දුල්ට හා යසීර්ට කැසිනෝ බලපත්‍ර ලබාදෙන පොරොන්දුව මතය. නිව් ජර්සි ප්‍රාන්ත නීති රීති අනුව, මුදලට ගිජු අරාබි එමීර්වරුන් දෙදෙනකුට එවැනි බලපත්‍රයක් ලබාගැනීමට අවශ්‍යතාවක් ඇතිවීම පිළිගත හැකිය. එමීර්වරුන්ට පමණක් නොව අනෙක් කාටත් අවශ්‍ය වූයේ මොනයම් ක්‍රමයකින් හෝ එවැනි බලපත්‍රයක් ලබාගැනීමටය.

වෙයින්බර්ග්ට කෙඳිරි ගෑවිණි. ඒ කසළ කොන්ත්‍රාත්තුවට අදාළ හඬපට වාදන සියල්ලේ පිටපත් අධිකරණ දෙපාර්තමේන්තුවට ඉදිරිපත් කරන්නේ ෆිලඩෙල්ෆියාවල නීතිපතිවරයා විසින් බව ජෝන් ගුඩ් කියා සිටි බැවිනි. වෙයින්බර්ග්ට ෆිලඩෙල්ෆියා බලධාරින් රිස්සුවේ නැත. අවශ්‍ය දේටත්, අනවශ්‍ය දේටත් හැමදේටම හොට දමන ෆිලඩෙල්ෆියාකාරයන් ඇබ්ස්කැම් මෙහෙයුමටත් ඈඳීම ගැන වෙයින්බර්ග් මුල සිටම සිටියේ දැඩි අකමැත්තකිනි. දැන් සිද්ධ වී තිබෙන්නේ තමන් කරන කියන දේත් ෆිලඩෙල්ෆියා නරුමයන්ට කියන්නටය.

“ගුඩ් මම මේ ඇත්තටමයි කියන්නේ මේකට තවත් බොස්ලා කොහොමටවත් ඕනේ නැහැ.“

“ඕකනේ මෙල්, ඔයත් එක්ක තියෙන ප්‍රශ්නේ. ඔයාට ඕනේ තනියම වැඩ කරන්න. ඔයා දක්ෂයි, මම පිළිගන්නවා. ඔයා නැත්නම් අපිට මේ තරම් දුරක් එන්න තියා හිතන්නවත් බැහැ. ඒත් ඉහළින් එන නියෝගවලටත් අපි නැවෙන්න ඕන. ඒත් ඔයාට පැවරෙන හැම වැඩක්ම පූචියෝ හරහා හරි, මම හරහා හරි මිසක් කොහොමටවත් එයාලගෙන් ඔයාට එන්න ඉඩ තියන්නේ නැහැ කියලා මම ඔයාට පොරොන්දු වෙනවා.“ ගුඩ්ගේ අස්වැසුම හමුවේ වෙයින්බර්ග් කට වසා ගත්තේය.

වෙයින්බර්ග්ට හිසරදයක් වන තරමට නිතර නිතර දුරකතන ඇමතුම් දෙමින් වද දුන් තවත් කරදරකාරයකු වුයේ බිල් රොසෙන්බර්ග්ය. නගරාධිපති එරිචෙට්ටිව ඇබ්ස්කැම් වෙත ගෙන ඒමේ ගෞරවය හිමිවන්නේ තමාට වුවත්, මේ වන විට කාටත් තමාව අමතකවී තිබීම රොසෙන්බර්ග්ගේ කෝපයටත්, කලකිරීමටත් හේතු වී තිබුණි. නගරාධිපති සම්බන්ධ ගනුදෙනුවලදී තමාට ලැබිය යුතු කොටස ගෙවීම අබ්දුල් නියෝජිතයින් මඟහරින බවට ඔහුට තිබුණේ සාධාරණ සැකයකි. කතාව ඇත්ත වුවත්, වෙයින්බර්ග් තම සලකුණු සම්බන්ධයෙන් අනුගමනය කරන සුපුරුදු න්‍යාය රොසෙන්බර්ග්ටද ක්‍රියාත්මක කළේය. රොසෙන්බර්ග්ගේ හිත වඩාත්ම තැලී තිබුණේ තමාටත් හොරා, සෙනේටර් විලියම්ස් සමඟ වෙයින්බර්ග් ඇතුළු පිරිස පැටලී සිටි ටයිටේනියම් පතල් ගනුදෙනුව හේතුවෙනි. මේ නම් තමාට මීට පෙර සම්බන්ධවීමට අවස්ථාවක් නොලැබුණු අමුතුම තාලේ වික්‍රමයක් බවට සැකයක් නැත.

“මෙල්, ඒක නියම ඩීල් එකක්. මම කවදාවත් එහෙම දෙයක් අහලා නැහැ. ඔයා කොහොමද මේ අමාරුකාරයන් මෙල්ල කර ගත්තේ ?“

“මෙල්ල කරගත්තා කියන්නේ මොකද්ද ? “ වෙයින්බර්ග් ඇසුවේ නොදරුවකු මෙනි.

“ඔන්න, ඔයත් මට කොළ කඩා පාන්න ගත්තා. මෙල්ල කරගත්තා කියන්නේ මෙල්, එරිචෙට්ටිවයි, විලියම්ස්වයි ෂේප්කරගන්න එයාලට ගෙවීම් කළේ කොහොමද ?“

“ ආ ඒකද ? මෙහෙමයි, අපි කිව්වා එයාලට පතල් සංස්ථාවේ කොටස් දෙන්නම් කියලා.“

“ඒකත් එහෙමද ? “ රොසෙන්බර්ග් කල්පනාකාරීව පැවසුවේ නිහැඬියාවකින් අනතුරුවය.

“මෙහෙමයි ඉතින්, දෙනවා කිව්වට තාම දීලා නැහැ. අඩුම තරමේ ඒක ගැන අපි තාම හරි තීරණයකටවත් ඇවිල්ලා නැහැ. ඒත් ඉස්සරහට මොනවා හරි කරගන්න බැරියැ.“ වෙයින්බර්ග් එවර කිව්වේ අවංකවමය. කොටස් බෙදාහදා ගන්නට පතල් සංස්ථාවක් නැති බැවින් ඒ ගැන අනාගතයට භාරදීම හැර වෙන කරන්නට යමක් නැත.

එම සංවාදයෙන් දින කිහිපයකට පසු ඇලෙක්සැන්ඩර් ෆෙයින්බර්ග්ගෙන් ඇමතුමක් ආවේ වෙයින්බර්ග්ව අසහනයට පත්කරන යෝජනාවක් ද සමඟය. අබ්දුල් පාර්ශ්වය විසින් මිලදී ගන්නට සැරසෙන සැවානාහි පිහිටි ඇමරිකන් සිනිමිඩ් කම්හලේ නිරීක්ෂණ චාරිකාවක යෙදීමේ වැදගත්කම අවධාරණය කළ ෆෙයින්බර්ග් ඒ සඳහා තෝරාගෙන තිබුණේ වෙයින්බර්ග්වය. ඔහුගේ සහායට කැට්ස් හා සැන්ඩි විලියම්ස්ද ගමනට එක්වන්නට කැමත්ත පළකොට තිබිණි. නමුත් කවදත් මෙවැනි ගමන් ගැන අලස ආකල්පයක් දැක්වූ වෙයින්බර්ග් ගමනට පස්ස ගැසුවේය. හේ ඇමරොසෝ හමුවී එකහෙළාම කිව්වේ, මෙවැනි ගමන් තමාට වහකදුරු මෙන් තිත්ත බවයි.

“රසායනික කම්හල් ගැන මම මේ ලෝකේ දෙයක් දන්නේ නැහැ. දැනගන්න ඕනෙත් නැහැ. එහෙව් එකේ මාව මේ වගේ ඔලමොට්ටල ගමන්වලට තෝරගන්නේ ඇයි? ඔය ෆැක්ටරිවලට රිංගලා මම මොනවා කරන්නද ? “

“ගණන් ගන්න එපා මෙල්. ඔයා ඕකටත් අනික් ඒවට වගේම බොරුවක් කරන්න. ඔයා කොහොමටත් ඒ වගේ බොරු රඟපෑම් කරන්න දක්ෂයිනේ.“ ඇමරොසෝ පැවසුවේ වෙයින්බර්ගේ හිත සනසන අටියෙනි.

ඔයින් මෙයින් කෙසේ හෝ වෙයින්බර්ග් සිනිමිඩ් කම්හලේ සවාරිය ගියේය.

වෙයින්බර්ග් සිටියේ ඇමරිකන් සිනිමිඩ් සමාගමේ නෞකා අංගණයට වී හාත්පස නිරීක්ෂණය කරමිනි. හැඳ සිටි විශේෂ ආරක්ෂිත ඇඳුම් කට්ටලය නිසා බැලූ බැල්මට ඔහු හඳුනාගැනීම පවා අපහසු විය. රබර් මිශ්‍රිත තොප්පියකින්ද, කබායකින් හා බූට්ස් යුවළකින් සැරසුණු වෙයින්බර්ග්, ආරක්ෂක ආවරණයකින් දෑස් මුවාකරගෙන සිටියේ කම්හලේ විෂ සහිත දුමාරයෙන් ආරක්ෂා වීමටය. කම්හල නිරීක්ෂණයට පැමිණෙන කාට වුවද මෙබඳු ආරක්ෂක ඇඳුම්වලින් සැරසීම අනිවාර්ය නොවී නම් වෙයින්බර්ග් කිසිදා මෙවැනි විලංගු ඇඟේ දමා ගන්නේ නැත. දෙතොලට සිරවූ නොදැල්වූ සුරුට්ටුව තදින් විකමින් සිටි වෙයින්බර්ග්ගේ අවධානය යොමුව තිබුණේ, නැව්ගත කිරීමට සූදානම් කරන අවසන් බඩු තොගයත් අසුරා මලුවලට පටවමින් සිටි කළු ජාතික කම්කරුවා වෙතය.

කැට්ස් හා සැන්ඩි සමඟ මුලු කම්හලේම රවුම්ගසා විවිධ අංශ ගැන අධ්‍යයනය කරන බව කදිමට මවාපෑ වෙයින්බර්ග්ට ඊළඟට අවශ්‍යය වුනේ කම්හලේ ආදායම් වියදම් ගිණුම් වාර්තා පරීක්ෂා කිරිමට වුව පොත් පරික්ෂා කිරීමට ඩොලර් පනස්දහසක් ගෙවිය යුතු බව දන්වනු ලැබීම නිසා ඔහු සිටියේ නොරිස්සුමෙනි. කාට බොරු කළත් තමා ගොනාට ඇන්ඳවීමට මේ කොම්පැණිකාරයන් මැරී ඉපදිය යුතුය. හුදකලා කළු ජාතික කම්කරුවා දැකීමත් සමඟ වෙයින්බර්ග්ගේ උපාය ඥානය අවදි විය.

“ඒයි ජෝර්ජ්, මේ කම්හල ඔයාලා කියන තරම් මහා පරිමාණේ එකක් නම්, එක කල්ලෙක් විතරක් ඒකේ බඩු පැක් කරන්නේ ඇයි? හරි හමන් වැඩපළක් නම් පැකින්වලට විතරක් අඩුම ගාණේ දහයක් දොළහක්වත් ඉන්න එපායැ.“

“මම කොහොමද දන්නේ. “ කැට්ස්ගේ හඬේ තිබුණේ නොරිස්සුමකි. “මේක එයාලට වැඩ වදින්නේ නැති කාලේ වෙන්න ඇති. ගාමන්ට් ෆැක්ටරිවලටත් වැඩ නැතුව වේලෙන කාලයක් තියෙනවා. මේකත් එහෙම වෙන්න ඇති.“ කැට්ස් පැවසුවේ අඩමානයටය.

“පිස්සු යක්කු! මේ තරම් ලොකු ෆැක්ටරියකටත් වැඩ නැතුව වේලෙන සීසන් එකක් තියෙනවා නම්, එයාලගේ පොත්වල තියෙන කුණුහරුප බලන්න මම ඩොලර් පනස්දහක් ගෙවන්නේ නැහැ. අපිත් එයාලා වගේ ඔලමොට්ටලයෝ කියලා හිතාගෙන ඇති. “

වෙයින්බර්ග්ගේ වාග් ප්‍රහාරයට පිටුපා යාමට සිනිමිඩ් සේවකයන්ට හයියක් තිබුණේ නැති නිසාම වැඩි වෙලාවක් යන්නට පෙරම ගිණුම් පොත් වෙයින්බර්ග්ගේ අතට ආවේය.

නගරාධිපති එරිචෙට්ටිගෙන් වෙයින්බර්ග්ට බේරුමක් තිබුණේම නැත. දිනපතාම පාහේ දුරකතන ඇමතුම් දී, හොර පාරෙන් මුදල් ගරන ව්‍යාපෘති හා යෝජනා හඳුන්වාදීම එරිචෙට්ටි සැලකුවේ තමාගේ යුතුකමක් ගාණටය. යසීර්ගෙන් ණය ලබාගැනීම හැකිතාක් කඩිනම් කිරීමේ දැවෙන අවශ්‍යතාවයෙන් පෙළුණු එරිචෙට්ටි නිතර නිතර වෙයින්බර්ග්ට කරදර කළේ, පතල් සංස්ථාවේ වගකිව යුත්තන් සමඟ හමුවක් සූදානම් කරන ලෙසටය. ඉන් ණය ලබාදීම ඉක්මණ් වනු ඇතැයි ඔහුට දැඩි විශ්වාසයක් විය. තමා කලින් වෙයින්බර්ග් අතට පත්කළ අල්ලස් ලැයිස්තුවේ හුන් රාජ්‍ය හා නාගරික බලධාරීන් වෙයින්බර්ග්ට හඳුන්වාදීමටත් නගරාධිපතිට තිබුණේ පුදුමාකාර උනන්දුවකි. ඒ සියල්ලන්ටමත් වඩා එරිචෙට්ටි නිතර දෙවේලේ මන්තරයක් මෙන් වෙයින්බර්ග්ට ජප කළේ ජර්සි සිටි නගරාධිපති තෝමස් (ටොමී) ස්මිත්ව හමුවිය යුතුම බවයි.

එරිචෙට්ටිගේ අල්ලස් ලැයිස්තුවේ හුන් සාමාජිකයන් එකා බැගින් දැලට කොටුකර ගැනීමට පිඹුරුපත් සැකසීම ඇරඹී තිබුණේ එය වෙයින්බර්ග් හරහා ඇබ්ස්කැම් නියෝජිතයින්ට ලැබුණු දා පටන්ය. එරිචේට්ටි මෙන්ම ඔහු විසින් හඳුන්වා දෙන්නට යෙදුනු කෙනත් මැක්ඩොනල්ඩ්ද අල්ලස් ලබාගැනීමට පොළඹවා ගත්තේ අබ්දුල්ට හා යසීර්ට කැසිනෝ බලපත්‍ර ලබාදෙන පොරොන්දුව මතය. නිව් ජර්සි ප්‍රාන්ත නීති රීති අනුව, මුදලට ගිජු අරාබි එමීර්වරුන් දෙදෙනකුට එවැනි බලපත්‍රයක් ලබාගැනීමට අවශ්‍යතාවක් ඇතිවීම පිළිගත හැකිය. එමීර්වරුන්ට පමණක් නොව අනෙක් කාටත් අවශ්‍ය වූයේ මොනයම් ක්‍රමයකින් හෝ එවැනි බලපත්‍රයක් ලබාගැනීමටය. නමුත් නිව් ජර්සි හැරුණු විට ජර්සි සිටි හෝ වෙනත් නගර ගැන උනන්දු වෙන්නට අරාබිකාරයන් දෙදෙනෙකු පෙළඹෙන්නේ කවර හේතුවක් නිසාද ? කෙටියෙන් කියනවා නම් වෙයින්බර්ග් ඇතුළු පිරිසට දැන් අවශ්‍යව තිබුණේ ඇබ්ස්කැම් මෙහෙයුම වඩාත් පුළුල් පරාසයකට ව්‍යාප්ත කිරීමට හොඳ හේතු ටිකක් සොයා ගන්නටය.

විසඳුමට ආවේ ‘චෙක්පත් මුදලට මාරු කිරීමේ ව්‍යාපාරක් ඇරඹීමයි. ලැයිස්තුවේ හුන් විවිධ නිලධාරින් නියෝජනය කළ ප්‍රාන්තවල චෙක්පත් මාරුකිරීමේ ව්‍යාපාර පවත්වාගෙන යන්නට අදාළ පාර්ශ්වයන්ගෙන් අනුමැතිය ලබාගෙන දෙනවාට, එම නිලධාරින්ට අල්ලස් ලබාදීම සිත්ගන්නාසුළු උපක්‍රමයක් විය. කැසිනෝ බලපත් මෙන් නොව චෙක්පත් මුදල් කිරීම ඕනෑම නගරයක් සම්බන්ධයෙන් ක්‍රියාත්මක කළ හැකි න්‍යායක් වීමද වාසියක් විය. කැසිනෝවලින් උපයාගත් මුදල් දියකර හැරීමට චෙක්පත් මාරුකර දෙන බව පැවසූ විට කතාව තවත් තාත්විකය.

එරිචේට්ටිට චෙක්පත් මුදල් කිරීමේ සැලැස්ම හෙළිකළ පමාවෙන් හේ නගර පීරා මතුකර ගත් තවත් අල්ලස් මරුවෝ පිරිසකගේ ලැයිස්තුවක් වෙයින්බර්ග් අතට පත්කළේය. ඒ සියල්ලෝම එමීර්වරු දෙපළට චෙක්පත් මුදල් කිරීමේ ව්‍යාපාර අරඹන්නට තම තමන්ගේ නගර පේකර දෙන්න පෙළගැසී සිටියේ පගාවේ රස දැන සිටි නිසාය. ඒ අතර අංක එකට සිටියේ ඩිමොක්‍රටික් පක්ෂ සභාපති රිඩච් කොෆීය. ඒ තවත් දුෂිතයක් රැලක් ඇබ්ස්කැම් නියෝජිතයින්ගේ පාමුලට ගෙනා වික්‍රමයක ඇරඹුම විය.

1979 මැයි මස 23දා හොලිඩේ ඉන් හෝටලයේදී සතරකන් සම්මන්ත්‍රණයක් පැවැත්විණි. ඒ වෙයින්බර්ග්, ඇමරෝසෝ, කැට්ස් හා එරිචෙට්ටි අතරය. පිරිසට කතා කරගන්නට කසළ ව්‍යාපාරය, පතල් සංස්ථාව, නිව් ජර්සි ප්‍රාන්තය ගිලගෙන තිබෙන දූෂණය වැනි සෑහෙන දේවල් තිබුණු අතර අලුතින්ම පටන්ගන්නට යන චෙක්පත් මුදල් කිරීමේ ජාවාරමට වැඩි ඉඩක් වෙන්ව තිබිණී. කෙසේ හෝ හමුවන ලෙස ඉල්ලමින් එරිචෙට්ටි නිතර දෙවේලේ වෙයින්බර්ග්ට කරදර කරන ටොමී ස්මිත්, සෙනේටර් විලියම්ස්, ඇලෙක්ස් ෆෙයින්බර්ග් වැනි පැරණි සගයන් මෙන්ම රාජ්‍ය මන්ත්‍රණ සභාවේ ඩේව් ෆ්‍රීඩ්ලන්ඩ් හා ඩිමොක්‍රටික් පක්ෂ සංවිධායකවේලි ෂීල්ඩ් වැනි අලුත් සළකුණූද සාකච්ඡාවේ මාතෘකා විය.

රොබට් ඩබ්. ග්‍රීන් විසින් රචනා කළ මෙල්වින්

වෙයින්බර්ග්ගේ චරිතාපදානය
‘ස්ටිං මෑන්‘ කෘතියේ
පරිවර්තනය රුක්ලන්ති පෙරේරා

හෙට - හඬපටයේ කුරුකුරුවෙන් කුරුමානම වරදී


නව අදහස දක්වන්න