සෙනෙට්වරයාට පාතාල උපදෙසක්

කිසිම විටක කිසිම සැලසුමක් වෙනුවෙන් ඕනෑවට වඩා සූදානම් වන්නට එපා යැයි තම සහෝදර හොර ජවාරම්කරුවන්ට උපදෙස් දුන් වෙයින්බර්ග් එවෙලේ හිතමින් සිටියේ එරිචෙට්ටි විසින් සෙනෙටර්ට කල් ඇතිව ලබාදුන් උපදෙස් යළිත් වරක් ආවර්ජනය කරවන්නට තිබේ නම් කියාය. වෙයින්බර්ග් මුලපටන්ම සිතාගෙන සිටියේ යසීර් හමුවීමට පෙර සෙනෙටර් සමඟ සංවාදයක යෙදෙන්නටය. නමුත් මේ පාන්දර යාමේ කල්පනා සාගරයේ ගැලෙද්දී වෙයින්බර්ග්ට සිතුණේ, කලින් එරිචෙට්ටි අකුරෙන් අකුරට ලබාදුන්නා යැයි කියූ උපදෙස් සෙනෙටර්ට අමතක වන්නට ඉඩ ඇති නිසා යළිත් ඒවා මතක් කරවීම නුවණට හුරු බවය. ඒ නිසා එරිචෙට්ටි සමඟ සෙනෙටර් විලියම්ස් නමෝ විත්තියෙන් මැරියොට් අවන්හලට ගොඩවදිද්දී වෙයින්බර්ග් සිටියේ ඔවුන් බලාපොරොත්තුවෙන් මඟබලමිනි.

සෙනෙටර් සහ එමීර් යසීර් අතර හමුවීමට දිනය ළංවෙද්දී වෙයින්බර්ග් මදින් මද නොසන්සුන් විය. යසීර් ඉදිරියේ සෙනෙටර් විලියම්ස් කටවරද්දාගනු ඇති බවට වෙයින්බර්ග්ට තිබුණේ සාධාරණ සැකයකි. වෙයින්බර්ග් පමණක් නොව නගරාධිපති එරිචෙට්ටිද එවැනිම සැකයකින් පෙළුණි. දෙදෙනා නිතර නිතර සාකච්ඡා කළේ යසීර්ට ඇසීමට අවශ්‍ය වචන කිහිපය සෙනෙටර් ලවා කියවා ගන්නේ කෙසේද යන්නයි. සෙනෙට්වරයා මෙල්ල කර ගැනීමේ උනන්දුව වැඩියෙන්ම තිබුණේ එරිචෙට්ටිටය.

“යසීර්ට කියන්න ඕනේ මොකද්ද කියලා දැන් එයා දන්නවා. මම මිනිහා වයින් කරලයි තියෙන්නේ. “මම තමයි මේ පතල් ජොබ් එක වැඩකරන්නයි ඉදිරියට ගෙනියන්නයි ඕනකරන මිනිහා. මම නැතුව මේක සිද්ධ වෙන්නේ නැහැ. කොන්ත්‍රාත් තියෙන්නේ මගේ අතේ. ඒවා ඔහේලාට අරන් දෙන එකයි, සාර්ථක කරගන්න එකයි ගැන මම ඇප වෙනවා.“ ඕන්න ඔය ටික මිනිහා ගාණට කියා ගත්තොත් යසීර් සුටුස් ගාලා අපිට සල්ලි පාස් කරාවි.“

“ඔව් ඉතින්, මිනිහාට ඔය ටික කියා ගන්න හරි කොන්ද පණ තිබුණොත් ඇති. මම මෙච්චර වදවෙන්නේ ඒකයි.“ එරිචෙට්ටිගේ සැනසිලිදායක වදන් හමුවේ වුවද වෙයින්බර්ග්ට හිත හදාගන්නට පුළුවන්කමක් තිබුණේ නැත.

හමුවට පෙරදින වෙයින්බර්ග්, ෆෙයින්බර්ග්, එරිචෙට්ටි හා කැට්ස් මැරියොට් අවන්හලේ කාමරයකට එකතු වුණේ අවසන් සැලසුම් සකස් කිරීමටය. දුරකතනයෙන් සෙනෙටර් විලියම්ස් ඇමතූ ෆෙයින්බර්ග් ඔහුට අවසන් දැනුම්දීම කළේ සෙස්සන්ගේ මාර්ගෝපදේශය ඇතිවය.

“අපි හෙට උදේම ඔයා බලාපොරොත්තු වෙනවා. මෙහෙට ආපු ගමන්ම ඔයාට යසීර්ගේ මීටින් එක ගැන උපදෙස් හම්බවෙයි. කලිනුත් එරික් (එරිචෙට්ටි) ඔයාට විස්තර කරලා තියෙනවානේ. මේ මීටින් එක කොච්චර වැදගත්ද කියලා අලුතින් ඔයාට විස්තර කරන්න ඕනේ නැහැනේ. මේ මුලු ඩීල් එකම තීරණය වෙන්නේ ඔයා හෙට යසීර්ට කියන වචන ටික අනුව. තේරුණා ද. “

“හරි. එතකොට යසීර් ඇරුණම තව කවුද මීටින් එකට එන්නේ ? මම කිව්වේ යසීර්ගේ පැත්තෙන් මේකට කවුද වෙන සහභාගි වෙන්නේ“ සෙනේටර් වද වුණේ තමාගේ ආරක්ෂාව ගැනය.

“ඇයි වෙන කාවද ඔයාට ඕනේ? අපි හිතුවේ යසීර් එක්ක විතරක් තනියම මීටින් එක තියන එකට ඔයා උඩින්ම කැමති වෙයි කියලා. එතකොට ඔයාගේ පෞද්ගලිකත්වයත් රැකෙනවානේ. යසීර් හම්බවෙන්න කලින් එරික් ඔයාට ඔක්කොම කියලා දේවි. ඔයා යසීර්ට දෙන කතාව ටක්කෙටම කෙරෙන්න ඕන. ඩීල් එක හරියන්න නම් ඒක තමයි එකම විදිහ. ඊට පස්සේ අපි හැමෝගේම ජීවිත මල්.“

ෆෙයින්බර්ග් ඇමතුම නිම කළේ යසීර්ට ඕනෑ කරන ඇපවීම ලබාදෙන බවට සෙනෙටර් ගිවිස ගැනීමෙන් අනතුරුවය. ඉන්පසුව පිරිස යළිත් වරක් සාකච්ඡා කරන්නට ගත්තේ සෙනෙටර්ගේ කතාවේ අඩංගු විය යුතු අංග පිළිබඳවය.

“සෙනෙට්කාරයා උදෙන්ම එන තරමට හොඳයි. අපිට මිනිහාව වයින් කරලා මූඩ් එකට සෙට් කරගන්නත් වෙලාව ඕනේනේ.“ එරිචෙට්ටි කිව්වේ නොඉවසිල්ලෙනි.

“එයා දැන් බොන්නේ එහෙම නැහැ නේද ?“ වෙයින්බර්ග් එලෙස ඇසුවේ සෙනෙට්වරයා හොඳ සිහියෙන් සිටීම ගනුදෙනුවේ සාර්ථකත්වයට වැදගත් බව දත් බැවිනි.

“එයා ඒවා අතෑරලා හුඟක් කල්.“ සෙනෙටර්ගේ පෞද්ගලික වතගොත ෆෙයින්බර්ග්ට රහසක් වූයේ නැත.

“එහෙම නම් මිනිහා ටිකක් පණ ගහලා ගන්න කංසා ටිකක් දුන්නොත් මොකද?“ යෝජනාව වෙයින්බර්ග්ගෙනි.

“අපොයි ඒවා ඕනෑ නැහැ. සෙනෙටර් කතා කරන වෙලාවට මම මිනිහාගේ ළඟින් හෙලවෙන්නේ නැහැ. මං ගාව ඉඳිකටුවක් ලෑස්ති පිටයි තියෙන්නේ. බැරිවෙලාවත් මිනිහා යසීර්ට අර මැජික් වචන ටික කියන්නේ නැතිව පස්ස ගැහුවොත් මිනිහාට ඉඳිකටු පාරක් වදිනවා ෂුවර්. මම මිනිහා ගාව රැකගෙන ඉන්නේ අනින්න කියලා සෙනෙටර්ත් දන්නවා. ඒ නිසා ඔයාලා කලබල වෙන්න එපා.“

එරිචෙට්ටි ඉන්පසුව විස්තර කළේ තමා සෙනේටර් විලියම්ස් ලවා යසීර්ට අවශ්‍ය දේ කියවා ගන්නේ කෙසේද කියාය. එම පැහැදිලි කිරීම සුපුරුදු පරිදි අව්‍යක්ත, අසභ්‍ය වදන්වලින් පිරීතිරී ගොස් තිබුණද, ඉඳිකටුවෙන් අනින අපබ්‍රංසය තෝරා බේරා ගත නොහැකිව වැඩිදෙනකු කන් උල්කරගෙන උනන්දුවෙන් ඊට සවන්දෙන බව පෙනුණි.

“මිනිහා යසීර්ට කතා කරන හැටි බලන්නත් එක්ක මම එදා සෙනෙටර්ට පොඩි රිහර්සල් එකක් දුන්නා, එච්චර උගන්නලත් මිනිහා ‘ඇප වෙනවා‘ කියන වචන දෙක තුන කිව්වේ නැහැනේ. මට යකා නැග්ග පාර බෙල්ලෙන්ම අල්ලගෙන මම කිව්වා ‘ කියන දේ කරන්නේ නැතිව, තමුසේ ඒ ඔක්කොම අවුල් කරන්නයි යන්නේ. තමුසේ හින්දා මට මිලියන ගාණක චාන්ස් එකක් නැති කරගන්න බැහැ. තමුසේ මෙතන පස්ස ගහලා වැඩේ කෑවොත් මම තමුසේව ඉතුරු කරන්නේ නැහැ. යසීර් ගාවට ගිහිල්ලා කියන්න ඕනේ දේ කියන්නේ නැතිව ලිස්සලා යන්න හැදුවොත් අමතක වෙන්නේ නැති වෙන්න මගෙන් හොඳවැයින් ඉඳිකටු පාරක් හම්බ වේවි. මීටින් එක වෙලාවේ මම ඔහේ ගාව රැකගෙනයි ඉන්නේ. මගෙන් බේරෙනවා බොරු. දෙන පොරොන්දු ඉෂ්ට කරන එක ගැන වද වෙන්න එපා.“ ඒ වෙලාවේ මගේ ඔළුවේ තිබ්බේ මිනිහාට තර්ජනය කරන එකම විතරයි. මම බෙල්ලෙන් අත ගත්තේ මිනිහා හුස්ම හිරවෙලා සුදුමැලි වේගෙන එනකොටයි. “

එරිචෙට්ටිගේ කතාව අතිශයෝක්තියෙන් ගහණ බව වෙයින්බර්ග්ට සැණෙකින් අවබෝධ වූ නමුත් සෙනේටර් ලවා අවශ්‍ය දේ කියවා ගන්නේ කොහොමද යන්නත්, සෙනේටර්ගේ ළඟ හිඳගෙන එරිචෙට්ටි, ඔහු ලවා එය හොඳින් හෝ නරකින් කියවා ගන්නා බවත් වෙයින්බර්ග්ට ප්‍රත්‍යක්ෂ විය. දැන් සෙනෙටර්ට ගැලවීමක් නැත. මැරියට් අවන්හලේ යසීර් සමඟ පැවැත්වීමට නියමිත හමුවට එන්නට ඔහු එකඟව සිටින්නේ, සෙනෙට් අසුන මුදලට විකුණන ලෙසට ඔහුගේම හෙංචයියන්ගෙන් එල්ලවන පීඩනයට හිස නවාය. ධන ලෝභයෙන් අන්ධව සිටින තමාගේම යටත්වැසියන්ගෙන් වුවද බේරිගත නොහැකි තත්වයකට සෙනේටර් විලියම්ස් පත්ව සිටියේය.

තීරණාත්මක හමුවට පෙරදා රාත්‍රියේ වෙයින්බර්ග් කවදාවත් නැති හොඳ නින්දක් ලැබුවේය. පාන්දර තුනට පමණ අවදි වූ වෙයින්බර්ග් රූපවාහිනිය ක්‍රියාත්මක කළේ කරන්නට අන් යමක් නොතිබුණු නිසා නොව හිතේ අසහනය දුරු කරගන්නටය.

“ටී.වී. එක බලන්න හිතනකොට පෙන්නන්න හරිහමන් දෙයක් මුන්ට නැති හැටි.“

අන් අය කොතෙක් කිව්වද, යසීර් ඉදිරියේ සෙනේටර්ගේ ‘ජාතිය ඇමතීමේ දේශනය‘ අකුරටම සිදුනොවනු ඇති බවත්, ඔහු වැඩ වරද්දා ගනු ඇති බවත් වෙයින්බර්ග්ගේ හිත කියමින් තිබුණි. ඇඳේ කොනක වාඩිවු හේ අසාමාන්‍ය තීරණයක් ගත්තේය. කිසිම විටක කිසිම සැලසුමක් වෙනුවෙන් ඕනෑවට වඩා සූදානම් වන්නට එපා යැයි තම සහෝදර හොර ජවාරම්කරුවන්ට උපදෙස් දුන් වෙයින්බර්ග් එවෙලේ හිතමින් සිටියේ එරිචෙට්ටි විසින් සෙනෙටර්ට කල් ඇතිව ලබාදුන් උපදෙස් යළිත් වරක් ආවර්ජනය කරවන්නට තිබේ නම් කියාය. වෙයින්බර්ග් මුලපටන්ම සිතාගෙන සිටියේ යසීර් හමුවීමට පෙර සෙනෙටර් සමඟ සංවාදයක යෙදෙන්නටය. නමුත් මේ පාන්දර යාමේ කල්පනා සාගරයේ ගැලෙද්දී වෙයින්බර්ග්ට සිතුණේ කලින් එරිචෙට්ටි අකුරෙන් අකුරට ලබාදුන්නා යැයි කියූ උපදෙස් සෙනෙටර්ට අමතක වන්නට ඉඩ ඇති නිසා යළිත් ඒවා මතක් කරවීම නුවණට හුරු බවය. ඒ නිසා එරිචෙට්ටි සමඟ සෙනෙටර් විලියම්ස් නමෝ විත්තියෙන් මැරියොට් අවන්හලට ගොඩවදිද්දී වෙයින්බර්ග් සිටියේ ඔවුන් බලාපොරොත්තුවෙන් මඟබලමිනි. පසුකලක ඇබ්ස්කැම් මෙහෙයුම අධිකරණයේ විභාග වූ කාලය පුරාවටම එදා සෙනෙටර්ට දුන් දේශනය වෙයින්බර්ග් සසල කළේය. එදා සෙනෙටර් ඉදිරියේ වීරයකු මෙන් කළ දෙඩවිල්ල, විත්තියේ නීතිඥයින් සිය වාසියට හරවා ගනු ඇතැයි වෙයින්බර්ග්ට එවෙලේ තුන්හිතකින්වත් හිතුණේ නැත. දූෂිතයන් දැලේ දාගැනීමට රජය බලහත්කාරයෙන් හා වුවමනාවෙන්ම දූෂිතයන් වරදේ පටලවා ඇති බවට විත්තිය ගෙනා තර්කය තහවුරු කිරීමට ඉදිරිපත් කළ සාක්ෂිය වූයේ වෙයින්බර්ග් එදා සෙනෙටර් විලියම්ස්ට දුන් හරබර දෙසුමයි.

“සෙනෙටර්ටත් කටට වචන දීලා එයාව වරදේ පැටලෙව්වා නම්, අනික් අයට කොහොම කරන්න ඇද්ද?“

නමුත් වෙයින්බර්ග් කළේ, ෆෙයින්බර්ග් හා සෙනෙටර්ගේ සෙසු ව්‍යාපාරික සගයන් දුන් උපදෙස් අනුව වැඩ කරන්නට ඔහුට අවවාද කිරීම පමණි. සංවාදය පටන් ගත්තේ, රජයේ කොන්ත්‍රාත්තු ලබාගැනීමට සෙනෙටර් අත්‍යවශ්‍ය බව සහ පතල් සංස්ථාවේ කොටස් වෙනුවෙන් තමාගේ වගකීම වන්නේ එම කොන්ත්‍රාත්තු ලබා දීම බව යසීර්ට ඒත්තු ගැන්වීමෙනි.

“ඔයා නැතිව මේ පතල් බිස්නස් එක සාර්ථක වෙන්නේ නැහැ කියලා ඔයා යසීර්ට කියන්න ඕනේ. ඒ කියන්නේ ඔයා නැත්නම් රජයේ කොන්ත්‍රාත්තු ගන්න වෙන්නේ හීනෙන් කියලා අරාබිකාරයාගේ ඔළුවට කවලා තියන්න. “ වෙයින්බර්ග් පැවසුවේ ස්ථිරසාරවය.

“ඒ හින්දා තමයි ආණ්ඩුව ටයිටේනියම් ගැන මෙච්චර උනන්දු වෙන්නේ. සෙනෙටර් නිරන්තරව උත්සාහ කළේ මාතෘකාවෙන් ලෙස්සා යන්නටය.

“කෙහෙම්මල් ටයිටේනියම් ගැන නෙවෙයි මම කියන්නේ සෙනේට්තුමෝ. යසීර්ට ඕනේ ඔයාව. වෙන කාවත් නෙවෙයි, ඔයාවමයි. ඔයා එයාට කියන්න ඕනේ ඔයා කවුද, ඔයා කොච්චර වැදගත් කෙනෙක්ද, ඔයාට මොනවද කරන්න පුළුවන්? මෙන්න මේ ටිකත් අනිවාර්යයෙන්ම කියන්න. “මම නැතුව කිසිම ගනුදෙනුවක් සිද්ධ වෙන්නේ නැහැ. මම තමයි වැඩේට ගැලපෙන නියම මිනිහා. මම තමයි ඔයාලට ජයග්‍රහණයේ දොරවල් ඇරලා දෙන්නේ. මම කියන විදිහට කළොත් ඔක්කෝමලා ගොඩ.“ ආන්න එහෙමයි සෙනේට්තුමෝ කතාව තියෙන්න ඕනේ. තේරුණානේ. “

ඇමරිකාවේ නමගිය ජාවාරම්කරුවකුගෙන් උත්තරීතර සෙනෙට් මණ්ඩලයේ සභිකයකුට පාතාල භාෂාවෙන්ම උපදෙස් ලැබුණේ එලෙසය. සෙනෙටර් විලියම්ස් ඊට කිසිදු විරුද්ධත්වයක් පෑවේද නැත. ඔහු යසීර් හමුවිමට අංක 1104 දරන කාමරයට යාමට එරිචෙට්ටි සමඟ සෝපානයට ගොඩවුණේ වෙයින්බර්ග්ගේ උපදෙස් පිළිගත් බව අඟවමින් ආචාර ද කරමිනි.

වෙයින්බර්ග් මිලදීගෙන දුන් ඩොලර් පන්සියයේ ජේත්තුකාර ඇඳුමින් සැරසී අරාබි තලප්පාවක් හිසේ දරාගෙන, සුවපහසු හාන්සි පුටුවක් අරා සිටි එෆ්.බී.අයි. නිලධාරි ෆාර්හාට්, හැබෑම අරාබි එමීර්වරයකු නොවේ යැයි කීමට කිසිවකුටත් පුළුවන්කමක් තිබුණේ නැත. ඔහුගේ පැත්තකින් ඇමරොසෝද සිටියේ ඉංග්‍රීසි කතා නොකරන එමීර් වෙනුවෙන්ම සංවාදය මෙහෙයවීමටය. දෙපාර්ශ්වය කෙළින්ම මාතෘකාවට බැස්සෝය.

රොබට් ඩබ්. ග්‍රීන් විසින් රචනා කළ මෙල්වින් වෙයින්බර්ග්ගේ

චරිතාපදානය ‘ස්ටිං මෑන්‘ කෘතියේ

පරිවර්තනය

රුක්ලන්ති පෙරේරා

හෙට - එකම කොක්කට දෙන්නෙක් පැමිිණෙති