සමෘද්ධි නිලධාරීන් තම වෘත්තීය අයිතිවාසිකම් දිනා ගැනීමට කටයුතු කරනවා සේම ලක්ෂ 14ක් පමණ වන සමෘද්ධිලාභීන් සවිබල ගන්වා සමාජගත කිරීමට සමෘද්ධි නිලධාරීන් කැප වී ක්රියා කළ යුතු බව ප්රාථමික කර්මාන්ත සහ සමාජ සවිබල ගැන්වීම් ඇමැති දයා ගමගේ මහතා පැවසීය.
ඇමැතිවරයා මේ බව ප්රකාශ කළේ සමෘද්ධි සංවර්ධන දෙපාර්තමේන්තුවේ අමාත්යාංශ ශ්රවණාගාරයේ පසුගියදා (16) වෘත්තීය සමිති සමඟ පැවති සාකච්ඡාවකට එක්වෙමිනි.
මේ වන විටත් විධිමත් ලෙස පත්වීම් ලිපියක් ලබා දී නොමැති සේවකයන් වෙනුවෙන් පත්වීම් ලිපියක් ලබාදීමට ඇමැතිවරයාගේ අවධානයට ලක් කළ වෘත්තීය සමිති නියෝජිතයන් මේ වන විටත් බොහෝ නිලධාරීන් වයස අවුරුදු 60ක් සම්පූර්ණ කර විශ්රාම යාමට සූදානම් බව වෘත්තීය සමිති ඇමැතිවරයාට කීය.
සේවයේ නිරත වී සිටි සමහර නිලධාරීන් මේ වනවිටත් මිය ගොස් ඇති අතර ඒ කිසිවෙකු වෙනුවෙන් විශ්රාම වැටුප හෝ වැන්දඹු අනත්දරු විශ්රාම වැටුප නොලැබීම පිළිබඳව මෙහිදී අමාත්යවරයාගේ අවධානයට ලක් විය.
මෙහිදී වැඩිදුරටත් ඇමැතිවරයා මෙසේද කීය.
මේ වනවිට සමෘද්ධි ව්යාපාරය ආරම්භ කර දශක දෙකකට වැඩි කාලයක් ගතවී තිබෙනවා. මේ දශක දෙක පුරාම සමෘද්ධි සහනාධාර ලබාගන්නා ප්රතිලාභීන් සිටිනවා. සියයට අසූ තුනකට වැඩි පිරිසක් වසර 15 කට වඩා වැඩි කාලයක් සමෘද්ධි සහනාධාරය ලබනවා. අැත්තටම ඒකෙන් අර්ථ දක්වන්නේ සමාජය සවිබල ගැන්වීමක් කර නොමැති බවයි. දැනට සමෘද්ධි සහනාධාරය ලබන පිරිස ලක්ෂ 14 ක් පමණ වෙනවා. තවදුරටත් සමෘද්ධි සහනාධාරය බලාපොරොත්තුවෙන් ලක්ෂ අටකට ආසන්න පිරිසක් සිටිනවා. මෙයින් ගම්ය වන්නේ රටින් භාගයක් දරිද්රතාවෙන් පෙළෙන අය සිටින බවයි.
පුද්ගලික අංශයේ රැකියා අවස්ථා ඇතත් බොහෝ තරුණ පිරිස උනන්දු වන්නේ රජයේ රැකියා ලබා ගැනීමටයි. රටට සේවය කිරීමට වඩා රැකියා සුරක්ෂිතතාව, විශ්රාම වැටුප මෙන්ම නිවාඩු සම්බන්ධයෙන් ඔවුන් උනන්දු වෙනවා. ඒ හේතුව නිසා රටට නිර්මාණශීලී තරුණ ශ්රමය අහිමි වී තිබෙනවා.
සමෘද්ධි සේවක පිරිස දැනට මුහුණ දී සිටින සියලු වෘත්තීය ගැටලුවලට විසඳුම් ලබාදීමට මැදහත්ව කටයුතු කරනවා. ඒ ක්රියාමාර්ගවලදී රජයේ අණපනත් සහ රෙගුලාසි උල්ලංඝණය වන කිසිම දෙයක් කිරීමට මැදහත් වන්නේ නැහැ. ඉදිරි වසර 03 තුළ දී සමෘද්ධිලාභී පවුල් ලක්ෂ 08 ක් නිසි ලෙස සවිබල ගන්වා සමාජගත කළ හැකි සුදුසු ව්යාපෘති වාර්තා ඉදිරි සති 02 ක තුළ දී ලබාදීමට කටයුතු කරන්න ඒවා නිසි අධ්යයනයකින් පසු සුදුසු ව්යාපෘති ක්රියාත්මක කරන්න මූලික පිරිවැය ලබා දෙන්න රජය සූදානම් බව ද ඇමැතිවරයා මෙහිදී වැඩිදුරටත් ප්රකාශ කළේය.
සමස්ත ලංකා සමෘද්ධි කළමනාකරණ සංගමය, සමස්ත ලංකා සමෘද්ධි සංවර්ධන නිලධාරී සහ කෘෂිකර්ම පර්යේෂණ නිලධාරීන්ගේ සංගමය, සමස්ත ලංකා එක්සත් නිලධාරීන්ගේ සංගමය, ශ්රී ලංකා නිදහස් සමෘද්ධි පොදු කම්කරු සංගමය, රැකියාලාභී උපාධිධාරී සමෘද්ධි සංවර්ධන නිලධාරීන්ගේ සංගමය, වෘත්තීය සමිති සංගම්හි නිලධාරීන් හා අමාත්යාංශ ලේකම් ගාමිණී සෙනෙවිරත්න, සමෘද්ධි අධ්යක්ෂ ජනරාල් නිමල් කොටවෙලගෙදර මහත්වරු ඇතුළු නිලධාරීහු පිරිසක් මේ අවස්ථාවට සහභාගි වූහ.
නව අදහස දක්වන්න