එක්සත් ජාතික පක්ෂයේ නායකයන් වශයෙන් වරින් වර මේ රටේ පාලන තන්ත්‍රයේ සිටි රණසිංහ ප්‍රේමදාස, ලලිත් ඇතුළත්මුදලි හා වර්තමාන අගමැති රනිල් වික්‍රමසිංහ නායකයන් අධ්‍යාපනයේ දියුණුව සඳහා සුවිශේෂි වෙනස්කම් රැසක් ඉටුකිරීමට ප්‍රබල දායකත්වයක් ලබාදුන් බව, විදුලි බලශක්ති හා ව්‍යාපාර සංවර්ධන ඇමැති රවි කරුණානායක මහතා උතුරු කොළඹ බටහිර කොටහේන ප්‍රදේශයේ පැවැති ජන හමුවකදී ප්‍රකාශ කළේ ය.
නව පාසල් වාරය වෙනුවෙන් රෝයි යාඩ්ලි පදනම මගින් ප්‍රදේශයේ පාසල් දරුවන්ට අභ්‍යාස පොත් ප්‍රදානය කිරීම සඳහා පැවති උත්සව අවස්ථාවනට සහභාගිවෙමින් ඇමැති කරුණානායක මහතා මේ බව සඳහන් කළේ ය.
මේ නිමිත්තෙන් පැවති ජනහමුවේදී ඇමැතිවරයා මෙසේ ද කීය.
ළමයින්ගේ වටිනාකම තේරුම්ගත් එජාප රජය දරුවන් රක්ෂණය කිරීමේ වැඩපිළිවෙළක් ද ක්‍රියාත්මක කර තිබෙනවා. මේ ප්‍රදේශයේ දෙමළ ජනතාව වැඩිපිරිසක් සිටින බැවින් රටේ සියලු ජාතීන්ටම සාධාරණයක් හිමිවන බව ප්‍රකාශ කර සිටිනවා.
මේදිනවල රටේ ව්‍යවස්ථාව ගැන පක්ෂ විපක්ෂ හැම දෙනෙක්ම විවිධ මත ප්‍රකාශ කර සිටින බව මාධ්‍යවලින් කියැවෙනවා. සමහරු අන්තවාදය ගැන කතා කරමින් තමන්ගේ බලය තහවුරුවන අන්දමින් අදහස් ප්‍රකාශ කරනවා. අදහස් ප්‍රකාශ කරන්න කාටත් අයිතිය තියෙනවා. නමුත් අප හැමදෙනාම පවතින ව්‍යවස්ථාවට ගරු කළ යුතුයි. ඒ අනුව අපි ක්‍රියා කළ යුතු බවද ඇමැතිවරයා කීය.
පළාත් සභා මන්ත්‍රි අනුරාධ ගුණවර්ධන හා නාගරික මන්ත්‍රී සංජීව රොෂාන් මහත්වරුන්ද මෙහිදී කතා කළ අතර, පාසල් දරුවන්ට අභ්‍යාස පොත් බෙදාදීමද ඇමැති රවි කරුණානායක මහතා අතින් සිදු විය.
ඡායාරූපය - කෝට්ටේ මධ්‍යම සමූහ
නව අදහස දක්වන්න