සුමන්තිරන් මහතා ඇතුළු දෙමළ සන්ධානයේ මන්ත්රීවරුන්ට තමා ප්රමුඛ යහපාලන රජයට එකතු වී උතුරේ ජනතාවට සේවයක් කිරීමට ආරාධනා කරන බව මහ නගර හා බස්නාහිර සංවර්ධන ඇමැති පාඨලී චම්පික රණවක මහතා පැවැසීය.
ඇමැතිවරයා මේ බව පැවැසුවේ පෙරේදා (21) යාපනයේ ඉදි වන දුර ගමන් සේවා බස් නැවතුම සහ පොදු බස් නැවතුම නිරීක්ෂණය කිරීමෙන් අනතුරුව මාධ්ය වෙත අදහස් දක්වමිනි.
එහි දී වැඩිදුරටත් අදහස් දැක්වූ ඇමැතිවරයා මෙසේ ද කීය.
යාපනය නගරයත්, කිළිනොච්චියත් අපේ අනාගත ජාතික භෞතික සැලසුමේ එකම නාගරික කලාපයක් හැටියට දියුණු විය යුතුයි කියලා අපි විශ්වාස කරනවා. ඒ පිළිබඳව ජනතාවත් සමඟ සංවාදයක් අවශ්යයි. ඒ සඳහා අපි දැනට වෘත්තීය මට්ටමින්, විද්වත් මට්ටමින් අදහස් ලබාගෙන තිබෙනවා.යාපනය නගරයත් උපාය මාර්ගික නගරයක් ලෙස ගොඩනගන්න විදේශීය ආධාර ඉල්ලීමක් කළා. එම ආධාර අපට ලැබී තිබෙනවා. දැනට අපි ගාල්ල, මහනුවර, අනුරාධපුරය සහ යාපනය පමණයි කොළඹින් පිටත උපාය මාර්ගික නගර ලෙස දියුණු කරන්න බලාපොරොත්තු වෙනවා. ඉදිරි කාලයේ දී අපි ත්රිකුණාමලය, මඩකලපුව, මන්නාරම, මුලතිව් නගරත් උපාය මාර්ගික නගර හැටියට දියුණු කරන්න විදේශ ආධාර ලබාගන්න බලාපොරොත්තු වෙනවා. ඒ මඟින් සාමාන්ය සංවර්ධනයෙන් කරන්න බැරි ගැඹුරු නාගරික වෙනස්කම් කරන්න අපි බලාපොරොත්තු වෙනවා. විශේෂයෙන්ම ඒ උපාය මාර්ගික නගර ව්යාපෘතිය එක්ව එකට යන ආකාරයට නාගරික සංවර්ධන අධිකාරියත් යාපනය නගරයේ ගොඩනැඟීම් කරන්න බලාපොරොත්තු වෙනවා. විශේෂයෙන්ම වැසි ජලය බැස යන කාණු පද්ධතිය, මලාපවහන පද්ධතිය, අද තිබෙන විශාලම ගැටලුවක්. බස් නැවතුම සංවර්ධනය, මාර්ග සංවර්ධනය වගේම වැසි ජල සංවර්ධනය සිදු කිරීමට අපි බලාපොරොත්තු වෙනවා.
මම විදුලිබල බලශක්ති ඇමැති වෙලා ඉන්න කාලේ යාපනයේ ඉතා දුර්වල විදුලි සැපයුමක් තිබුණා. විදුලිය පැය 8ක් පමණයි තිබුණේ. ඒ වගේම අපේ බලාගාර හොඳ මට්ටමක තිබුණේ නෑ. මම වසර 15කට පසු 2010 දී ලංකා විදුලි බල මණ්ඩලය ලාභදායී ආයතනයක් කළා. එම ලාභයෙන් කළ එක ආයෝජනයක් ලෙස 'උතුරු ජනනී' නමින් යාපනයට වෙනම විදුලි බලාගාරයක් චුන්නාගම් ප්රදේශයේ ඉදි කළා. එමඟින් පුද්ගලික බලාගාර ගසා කෑ සෑහෙන මුදලක් ඉතිරි කරගන්න පුළුවන් වුණා.
ඒ වගේම අපි වව්නියාව ප්රදේශයේ සිට චුන්නාගම් දක්වා විදුලි පද්ධතිය ඉදිකිරීම කළා. 100%ක් යාපනයට විදුලිය ලබා දුන්නා. මේ වන විට මම හිතන්නේ යාපනයට විදුලි පිළිබඳ ගැටලුවක් නෑ. ඒ වගේම පුදුමාතලන්, මන්නාම, මුලතිව් ඇතුළු මුළු උතුරු පළාතටම විදුලිය ලබා දුන්නා. විදුලිය සේම ජලය ද අත්යාවශ්යයි. ඒ නිසා මේ විරෝධතා වෙනුවට අපි සමඟියෙන් යාපනයේ ජල ගැටලුව විසඳීමට කැපවිය යුතුයි. නැතිනම් මේ නගරය පවත්වාගෙන යා නොහැකියි. ජල සම්පාදන මණ්ඩලයට ජනතාවගේ සහාය ලබා දුන්නොත් මේ නගරය අපට ශක්තිමත්ව ගොඩනඟන්න පුළුවන්. ඒ වගේම යාපනයේ සංස්කෘතික අනන්යතාව වගේම ජනතාවගේ ආත්මාභිමානය නැංවෙන ආකාරයට අපගේ නාගරික සංවර්ධන කටයුතු සිදු කරනවා.
මේ නගරයට ඉතාම අත්යාවශ්ය දෙයක් ලෙස කසළ කළමනාකරණය හඳුන්වා දිය හැකියි. අද වන විට මේ නාගරික සංවර්ධනය ඉදිරියට ගෙන යෑමට විද්යාත්මක කසළ රඳවනයක් අත්යාවශ්යයි. නමුත් බොහෝ දෙනෙක් විරෝධතා පැවැත්වුවාට කසළ රඳවන අපි ගොඩනඟා ගන්නේ නැතිව නගර ගොඩනඟන්න බෑ. අනෙකුත් නාගරික දේවල් පෞද්ගලික අංශත් ගොඩනඟයි.
නමුත් මේ මූලික කාරණා රජය විසින් ඉෂ්ට කළ යුතුයි. යාපනයේ ප්රධාන දේශපාලන දහරාවේ අවසානයට ඇමැති කෙනෙක් හිටියේ තිරුචෙල්වම් ඇමැතිවරයා. ඒ 1968 දී. වසර 50ක් මේ වන විට ගෙවී තිබෙනවා. විවිධ ඇමැතිවරුන් හිටියත් ප්රධාන දේශපාලන දහරාවේ ඇමැති කෙනෙක් හිටියේ නෑ. ඒ නිසා අපේ රටේ තිබෙන්නේ අනුග්රාහක දේශපාලනය.
පාර්ලිමේන්තු මන්ත්රී එම්. ඒ. සුමන්තිරන්, යාපනය ආණ්ඩුකාර සුරේන් රඝවන් මහත්වරු ද මේ අවස්ථාවට සහභාගී වූහ.
නව අදහස දක්වන්න