ශ්රී ලංකා වරාය සංවර්ධනය සම්බන්ධයෙන් තීරණ ගැනීමේ දී එහි සේවකයන් රට හා ජනතාව මූලික කර ගනිමින් ඉතා වගකීමෙන් කටයුතු කිරීම තම මූලධර්මය බව වරාය නාවික හා දක්ෂිණ සංවර්ධණ ඇමැති සාගල රත්නායක මහතා පැවැසීය.
ඇමැතිවරයා මේ බව පැවැසුවේ පෙරේදා (21) ශ්රී ලංකා වරාය අධිකාරිය සහ වරාය, නාවික කටුතු හා දක්ෂිණ සංවර්ධන අමාත්යාංශය එක්ව ආරම්භ කළ news.slpa.lk වෙබ් අඩවිය එළිදැක් වු අවස්ථාවේ දීය.
අමාත්යාංශයේ නිල වෙබ් අඩවියට අමතරව පුවත් වෙබ් අඩවියක් ලෙස සාමාන්ය ජනතාවට තොරතුරු දැන ගැනීමට මෙය විවෘත විය. මෙසේ ජනගත කෙරුණු වෙබ් අඩවියෙන් වරාය හා සමුද්රීය ක්ෂේත්රයේ ප්රවෘත්ති, විශේෂාංග සහ වරාය ආශ්රිත ලිපි ප්රවෘත්ති වටිනාකමින් යුතු, නිවැරැදි, විශ්වාසනීය අයුරින් ලබා දීමට පියවර ගැනේ.
එහි දී වැඩිදුරටත් අදහස් දැක්වූ ඇමැතිවරයා මෙසේ ද කීය.
අවස්ථාව සහ ස්ථාන අනුව සංවර්ධන ක්රියාදාමයට ගන්නා තීරණ වෙනස් විය හැකියි. නමුත් මගේ මූලධර්මය වෙනස් නොකර මධ්යස්ථව ක්රියා කරනවා. ලෝකය සමඟ ගමන් කිරීමේ දී සංවර්ධනය ආපසු හැරවිය නොහැකියි. ප්රමාදය සංවර්ධනය කඩා වැටීමට හේතුවක්.
ආණ්ඩුව ආරම්භ කර ඇති සියලු වරාය ව්යාපෘති, නව සංවර්ධන කටයුතු, ජගත් නාවික හා සමුද්රීය දර්ශකවල කොළඹ වරාය සහ අනෙකුත් වරායන් ස්ථානගත කිරීම, කොළඹ වරාය ලැබූ ගෝලීය ජයග්රහණ සම්බන්ධ සංවර්ධන ප්රවෘත්ති ආදිය පිළිබඳව රටේ සහ ඉන් පිටත සිටින වරාය හා සමුද්රීය ක්ෂේත්රයේ වෘත්තිකයන්ට අවශ්ය දැනුම ලබාගැනීම පහසු කිරීමට වේදිකාවක් නිර්මාණය කිරීම මේ news.slpa.lk වෙබ් අඩවියේ මුඛ්ය පරමාර්ථයයි. එම ක්ෂේත්රයේ සංවර්ධන පුවත්, තොරතුරු හුවමාරු කර ගැනීම, දැනුම කළමනාකරණයට උත්ප්රේරකයක් ලෙස මේ වෙබ් අඩවිය ක්රියාත්මක වෙනවා.
වරාය අධිකාරිය සංවර්ධනය කිරීමේ ජාතික සැලසුම සම්බන්ධයෙන් අදාළ සියලු අංශ ප්රධානීන් සමඟ සාකච්ඡා කළා. එහි දී නැඟෙනහිර පර්යන්තය යනු කොළඹ වරායේ එක් කොටසක් පමණයි. මුළු වරාය සංවර්ධනයට ආසියානු සංවර්ධන බැංකුව සමඟ එක්ව ක්රියාත්මක වීමට නියමිතයි. සංවර්ධන සැලසුම අනුව 2050 දක්වා වරායේ ඉදිරි කටයුතු ක්රියාත්මක කිරීම සම්බන්ධයෙන් දීර්ඝ ලෙස සාකච්ඡා සිදු කළා. ඒ අනුව අදාළ සංවර්ධන ක්රියාදාමය සම්බන්ධයෙන් මූලිකව යෝජනා කිහිපයක් ඉදිරිපත් වුණා. 2050 වන විට පවතින තත්ත්ව හා ඉල්ලුම අනුව සැලසුම් ක්රියාත්මක කිරීමත්, එම ප්රමාණයට වඩා ඉල්ලුමක් ආවොත් ක්රියාත්මක වීම සම්බන්ධයෙනුත් එහි දී විවිධ ආකාරයේ සංවර්ධන ක්රමවේද ඉදිරිපත් වුණා.
කොළඹ වරායේ දකුණු ප්රධාන පර්යන්ත තුනක් දැනටමත් ක්රියාත්මකයි. නැඟෙනහිර පර්යන්තයේ තවමත් කොටසක් පමණයි සංවර්ධනය කර තිබෙන්නේ. එක් නැවක් නැවැත්වීමට එහි සංවර්ධනය වී තිබුණත් තවත් නැව් දෙකක් එකවර නැවැත්වීමට හැකි ලෙස සංවර්ධනය කෙරෙනවා.
කොළඹ උතුරු වරායේ සංවර්ධන කටයුතු තවම ආරම්භ කර නෑ. බටහිර පර්යන්තයට හානියක් නොවන පරිදි දකුණු වරාය තාක්ෂණික වශයෙන් තවදුරටත් සංවර්ධනය කිරීමට හැකි ආකාරය සොයා බලනවා. බටහිර සහ බටහිර පර්යන්තය කෙළවර කොටස ද වෙන් වශයෙන් සංවර්ධනය කිරීමට බලාපොරොත්තු වෙනවා. මේ සඳහා ප්රාග්ධනය යෙදීමට හැකි ආකාරය ගැන ද අප සාකච්ඡා කරමින් යනවා. මේ සංවර්ධන ක්රියාදාමය සම්බන්ධ වාර්තාව ඉදිරිපත්වීමෙන් පසු ජනාධිපති, අගමැති සහ කැබිනට් මණ්ඩලය වෙත ඉදිරිපත් කර තීරණය කිරීමට කටයුතු කරනවා.
වරාය අමාත්යාංශය සතු ඔළුවිල් වරාය වාණිජ ආකාරයෙන් දියුණු කිරීම අසීරුයි. එය ධීවර වරායක් ලෙස දියුණු කිරීමට ධීවර අමාත්යාංශයට ලබාදීමට තීරණය කළා. කන්කසන්තුරේ වරාය සංවර්ධනයට ඉන්දීය රජය ඩොලර් මිලියන 47ක් ලබාදීමට නියමිතයි. එහි වාණිජ සහ නාවික කටයුතු සංවර්ධනය කිරීමටත්, ඊට සමගාමීව එම වරාය ආශ්රිතව කර්මාන්ත පුරයක් ස්ථාපිත කිරීමටත් තීරණය කර තිබෙනවා. ත්රිකුණාමල වරාය සංවර්ධනය කිරීමට ජපානයෙන් යෙන් මිලියනයක් ( රුපියල් බිලියන එකහමාරකට ආසන්න ප්රමාණයක්) ආධාර ලෙස ලබාදීමට යෝජිතයි. එය රාත්රී කාලයේ ද ක්රියාත්මක වරායක් ලෙස සංවර්ධනය කිරීමට තීරණය කර තිබෙනවා. ගාලු වරාය ද එවැනිම රාත්රී ක්රියාත්මක වරායක් ලෙස සංවර්ධනය කෙරෙනවා. හම්බන්තොට වරාය සම්බන්ධයෙන් මේ වන විට ක්රියාත්මක වීම ගැන කඩිනමින් සොයා බැලීමට පියවර ගන්නවා.
මේ අනුව මෙරට වරාය සහ නාවික ක්ෂේත්රය ප්රතිපත්තිමය ලිහිල් කිරීමක් සිදු කර තරගකාරීත්වයට මුහුණ දීමට හැකි වන ලෙස සංවර්ධනය කිරීමට යෝජනා වී තිබෙනවා. මේ සම්බන්ධයෙන් වන යෝජනා ජනාධිපති සහ අගමැති සමඟ සාකච්ඡා කර කැබිනට් මණ්ඩලයට ඉදිරිපත් කිරීමෙන් පසුව තීරණය කරනවා. කෙසේ වුවත් මේ සම්බන්ධ තීන්දු තීරණගැනීමේ දී වරාය සේවකයන් රට සහ ජනතාව මූලික කරගෙන කටයුතු කරන බව ඉතා වගකීමෙන් කිව යුතුමයි.
ශ්රී ලංකා වරාය අධිකාරිය සඳහා වූ ප්රධාන වෙබ් අඩවියට අමතරව මේ වෙබ් අඩවිය අතිරේක වෙබ් අඩවියක් ලෙස සංවර්ධනය කර පවත්වාගෙන යෑමට තීරණය කර තිබෙනවා. මෙයින් පාසල් සහ විශ්වවිද්යාල දරුවන්ට මෙරට නාවික සහ වරාය කටයුතු සම්බන්ධයෙන් තොරතුරු ලබාගැනීමටත්, විවිධ පර්යේෂණ සඳහා කරුණු ලබාගැනීමටත්, සාමාන්ය ජනතාවට මෙරට වරාය අධිකාරිය හා අමාත්යාංශයෙන් සිදු වන සේවා සම්බන්ධයෙන් දැනුවත් වීමටත් මේ වෙබ් අඩවියෙන් හැකියාව ලැබෙනවා. ඒ අනුව ශ්රී ලංකා වරාය හා නාවික ක්ෂේත්රය පිළිබඳ තොරතුරු ජාත්යන්තරයට සහ රටේ ජනතාවට දැනගැනීමට මේ වෙබ් අඩවියෙන් හැකියාව ලැබෙනවා. විශේෂයෙන් ජාත්යන්තර වෙළෙඳාම ප්රවර්ධනය කිරීමේ කටයුතු, සංවර්ධනයට වරායෙන් ලැබෙන දායකත්වය, ඒ අනුව ලබා ඇති ජයග්රහණ රටේ ජනතාවට දැනගැනීමට හැකියාව තිබෙනවා. වරාය හා නාවික ක්ෂේත්රයේ ඉතිහාසය, සංවර්ධනය සහ අනාගත සැලසුම් සම්බන්ධ තොරතුරු සියල්ල මේ වෙබ් අඩවියෙන් ලබාගැනීමේ හැකියාව තිබෙනවා.
වරාය, නාවික සහ දක්ෂිණ සංවර්ධන අමාත්යාංශයේ ලේකම් ආචාර්ය පරාක්රම දිසානාක මහතා ද මෙහි දී අදහස් දැක් වීය. ශ්රී ලංකා වරාය අධිකාරියේ සභාපති කාවන් රත්නායක, කළමණාකාර අධ්යක්ෂ කපිතාන් අතුල හේවාවිතාරණ මහත්වරු ද මේ අවස්ථාවට සහභාගි වූහ.
චන්ද්රිකා පෙරේරා සහ තරුෂි බෝපෙආරච්චි
ඡායාරූපය -විමල් කරුණාතිලක
නව අදහස දක්වන්න