බඩවල් කෝටි දෙකක් වෙනුවට මොළවල් කෝටි දෙකකට කතා කරන සැලසුමක් ඕනේ | දිනමිණ

බඩවල් කෝටි දෙකක් වෙනුවට මොළවල් කෝටි දෙකකට කතා කරන සැලසුමක් ඕනේ

බඩවල් කෝටි දෙකකට නෙවෙයි, මොළවල් කෝටි දෙකකට කතා කරන ක්‍රමවේදයක් සකසා අපේ රටේ අනාගතයගොඩනැගීමට කටයුතු කළ යුතු යැයි ඇමැති පාඨලී චම්පික රණවක මහතා පවසයි.

මහානගර හා බස්නාහිර සංවර්ධන අමාත්‍ය පාඨලී චම්පික රණවක මහතා මෙම අදහස් පළ කර සිටියේ, දියුණුව, නවීකරණය, සංවර්ධනය සහ නවෝත්පාදනය තුළින් අනාගතය වෙනුවෙන් රට ගොඩනගන්නට ‘රටට හෙටක්, තිරසර මඟක් - හම්බන්තොට අපේ හෙට දවස’ මැයෙන් තංගල්ල සිලෝන් සී හෝටලයේ සංවිධානය කර තිබූ උත්සව අවස්ථාවකට සහභාගී වෙමිනි.

එහිදී අදහස් දැක්වූ අමාත්‍යවරයා, අපට සිටිනවා හොඳ උගත් ශ්‍රම බළකායක්. සෞඛ්‍ය සම්පන්න ජනතාවක්. මේ රටේ අද මනුෂ්‍යයෙක් අවුරුදු 80ක් ජීවත් වෙනවා. අමෙරිකා එක්සත් ජනපදයෙත් මිනිස්සු ජීවත්වන්නේ අවුරුදු 80යි. ළදරු මරණ අනුපාතය ගත්තත්, මාතෘමරණ අනුපාතය ගත්තත් ඒ අන්තර් ජාතික මට්ටමේ අපි ඉන්නවා. අධ්‍යාපනය මට්ටමින් අපි ඉතාම හොඳ තත්ත්වයක ඉන්නවා. අපේ පාසල් පද්ධතියේ දුර්වලතා මොනවා තිබුණත් හොඳ බුද්ධිමත් පිරිසක් අපට ඉන්නවා. එහෙම නම් අපි බලන්න ඕනේ මෙන්න මේ උගත්, නීරෝගී ජනතාව මේ රටේ ආයෝජනය කර ගන්න. අර හෝමාගම තාක්ෂණ නගරය ගොඩනැගීමේ අරමුණ වෙලා තිබෙන්නෙත් ඒකයි. නවෝත්පාදනය ගෙන එන්න. මේ හම්බන්තොට අනාගතයේ ගොඩනගනවා නම් ජලප්‍රශ්නයත් අපි විසඳගෙන මේ දරුවන්ගේ බුද්ධිය අපි කොහොමද පාවිච්චි කරන්නේ, ඒ දරුවන්ගේ නවෝත්පාදන දැනුම කොහොමද පාවිච්චි කරන්නේ කියන එක මතයි අපට ඉදිරි ගමනක් තිබෙන්නේ. නැත්නම් වීරකැටිය සෙන්ට්‍රල් එකෙන්, තංගල්ල බාලිකා එකෙන්, මේ පාසල්වලින් ඉතාම හොඳ විශිෂ්ඨ ගනයේ පිරිස් බිහි වෙනවා. ඒ අය උපාධි අරගෙන රට යනවා. ඒ අය මේ රටේ අනාගත දියුණුවට අභියෝගාත්මකව යොදා ගැනීම ගැනයි අපි බලන්න ඕනේ. අන්න ඒකට හරියන නගරයක් අපි නිර්මාණය කළ යුතුයි.

මොකද අපේ ළමයෙක්ගෙන් ඇහුවොත් රට යන්න තමයි බලන්නේ. මේ රටේ ඉන්න කල්පනාවක් නැහැ. මොකද විදේශ රටකට ගියහම ඒ රටේ පිළිවෙළ, පිරිසිදුකම ඒ අයට පේනවා. ඒකට කැමැත්තක් ඇති වෙනවා. වැඩක් කරගන්න ගියහම ඒ ක්‍රියාවලිය ඒ අයට පෙනවා. අන්න ඒ නිසා ඒ අය රට යන ප්‍රවණතාවයේ ඉන්නවා. දැන් අද කොළඹ ඇරුණහම වැඩිම සිංහල ජනතාවක් ජීවත් වන්නේ ගාල්ලෙවත්, මාතරවත් මහනුවරවත් නෙමෙයි මෙල්බර්න් නගරේ. යාපනය ඇරුණහම වැඩිම දෙමළ ජනතාවක් ජීවත්වන්නේ ති‍්‍රකුණාමලය, මඩකලපුවේ නෙමෙයි කැනඩාවේ ටොරොන්ටෝ නගරයේ. මොකද යම් යම් හේතු නිසා අපේ මිනිසුන් යනවා. එය ප්‍රවණතාවයක් වී තිබෙනවා. ලක්ෂ 30ක් අපේ ජනතාව අද විදේශ රටවල සේවය කරනවා හෝ ජීවත් වෙනවා. මේ පිරිසෙන් විශාල පිරිසක් මේ අපේ ගම්වල මධ්‍ය විද්‍යාල ආදියෙන් බිහිවෙලා හොඳ දැනුම් මට්ටමක් සහිතව ගිය අයයි.

ඒ නිසා අපේ විශ්ව විද්‍යාලවල අත්දැකීම්වලින් අපට කියන්න පුළුවන්, මේ අපේ හම්බන්තොටින් ආපු කී දෙනෙක් අද විදෙස් රටවල ඉන්නවාද කියා. අපි මෙය වෙනස් කළ යුතුයි. මෙය වෙනස් කරගෙන මේ අය මෙරටට ගෙනගන්න නම් හොඳ නගර සම්ප්‍රදායක්, වැඩ කෙරෙන තැනක්, සබුද්ධික ප්‍රදේශයක් වෙනවා. අනෙක් එක මේ පැතිවල අපට තව බලගතු අත්දැකීම් තිබෙනවා. ඒක තමයි කැරළි ගහලා තිබෙනවා, මිනිස්සු මැරිලා තිබෙනවා. ඒ නිසා අපිට තවත් මැරෙන්න බැහැ. ඒ නිසා අපි මේ සබුද්ධික ජනතාව ඉදිරියට ගෙනයා යුතුයි. ඒනිසා බඩවල් කෝටි දෙකකට නෙමෙයි මොළවල් කෝටි දෙකකට කතා කරන ක්‍රමවේදයක් අපේ රටේ අනාගතයේ ගොඩනැගීමට කටයුතු කළ යුතුයි.


නව අදහස දක්වන්න