අර්ජුන් මහේන්ද්‍රන් ගෙන්වන්න සියලු ලිපිලේඛන බාරදීලා | දිනමිණ

අර්ජුන් මහේන්ද්‍රන් ගෙන්වන්න සියලු ලිපිලේඛන බාරදීලා

සිංගප්පූරු මාධ්‍ය උපුටා දැක්වීයැයි කියන ශ්‍රී ලංකාවේ මාධ්‍ය වාර්තා බොරු

සිංගප්පූරුවේ විදේශ කටයුතු අමාත්‍යාංශයේ ප්‍රකාශකයකු සිදුකළ බවට එරට මාධ්‍ය පළ කර තිබූ වාර්තාවක් උපුටා දක්වමින් ශ්‍රී ලංකාවේ මාධ්‍ය පළ කර ඇති වාර්තාව සම්පූර්ණයෙන් සත්‍යයෙන් තොර වාර්තාවකි. සිංගප්පූරුවේ පිටුවහල් නීතියට අනුව යම් පුද්ගලයකු එරටින් පිටුවහල් කිරීම සඳහා ඉල්ලීම් කිරීමට පදනම් වන ලිපි ලේඛන කිසිවක් ශ්‍රී ලංකා රජයෙන් ලබාදී නොමැති බව එම පුවත් පත් වාර්තාවල සඳහන් කර තිබුණි.

එරට විදේශ කටයුතු අමාත්‍යාංශයේ ප්‍රකාශකයකු එවන් ප්‍රකාශයක් සිදුකරන ලද්දේ, මෑතකදී ජනාධිපති ගරු මෛත්‍රීපාල සිරිසේන මහතා මහ බැංකු බැඳුම්කර වංචාවට සම්බන්ධ, සිංගප්පූරුවේ වෙසෙන බවට පැවසෙන අර්ජුන් මහේන්ද්‍රන් මහතා ශ්‍රී ලංකාවට උදර්පණය කරන ලෙස සිංගප්පූරු රජයේ අවධානයට යොමු කරමින් එරට අග්‍රාමාත්‍ය ලී ෂියැන් ලූන්ග් මහතාගෙන් කරන ලද ඉල්ලීම පිළිබඳ නිල ප්‍රකාශය පදනම් කොටගෙනය. කෙසේ නමුත් මේ වනතෙක් ඒ පිළිබඳ කිසිදු නිල ප්‍රකාශයක් සිංගප්පූරු රජය මඟින් ශ්‍රී ලංකා රජයේ අදාළ බලධාරින් වෙත ලබාදී නොමැත.

අර්ජුන් මහේන්ද්‍රන් මහතා ශ්‍රී ලංකාවට උදර්පණය කරන ලෙස ශ්‍රී ලංකා රජය විසින් ආරක්ෂක අමාත්‍යාංශයේ ලේකම්වරයා හරහා රාජ්‍ය තාන්ත්‍රික මට්ටමින් නිල ඉල්ලීමක් 2018 මැයි මස 28 වන දින සිදුකර තිබේ. එසේම එම ඉල්ලීම් දැනටමත් සිංගප්පූරු නීතිපතිවරයාගේ අවධානයට යොමුවී ඇති බවට එරට විදේශ කටයුතු අමාත්‍යාංශය විසින් ශ්‍රී ලංකාවේ ආරක්ෂක අමාත්‍යාංශයේ ලේකම්වරයා ඇතුළු අදාළ අංශ වෙත දන්වා ඇත.

සිංගප්පූරුවට අදාළ උදර්පණ නීතිය වන්නේ එරට ක්‍රියාත්මක වන උදර්පණ පනතයි. එකී පනතේ දෙවන පරිච්ඡේදයට අනුව 18 වන වරදට සමාන වරදක් අර්ජුන් මහේන්ද්‍රන් මහතා සිදුකර ඇති බව කොටුව මහේස්ත්‍රාත්වරයාට අපරාධ පරීක්ෂණ දෙපාර්තමේන්තුව විසින් කරුණු වාර්තා කරන ලද 8266/2018 B වාර්තාවේ සඳහන් කර ඇත.

එකී වාර්තාව පදනම් කරගෙන 2018.04.19 වන දින ජාත්‍යන්තර පොලිසිය විසින් රතු වරෙන්තුවක් නිකුත් කර ඇති අතර, එකී රතු වරෙන්තුව ද ඉහත කී සිංගප්පූරු රජය වෙත ඉදිරිපත් කරන ලද උදර්පණ ඉල්ලීම් සමඟ ඉදිරිපත් කර තිබේ.

ජනාධිපති මෛත්‍රීපාල සිරිසේන මහතා පසුගියදා සිංගප්පූරුවේ සිදුකරන ලද නිල සංචාරයේදී ද අර්ජුන් මහේන්ද්‍රන් මහතා ශ්‍රී ලංකාවට උදර්පණය කරන ලෙස සිංගප්පූරුවේ අගමැතිවරයාගෙන් ඉල්ලා තිබුණේ එකී පදනමෙනි. ඒ අනුව අර්ජුන් මහේන්ද්‍රන් මහතා උදර්පණය කිරීමට අවශ්‍ය හරයාත්මක තොරතුරු ශ්‍රී ලංකා රජය මඟින් මේ වනවිට සිංගප්පූරු රජයට ලබාදී ඇති බවත්, එම පදනමෙන් සිංගප්පූරු රජයේ බලධාරින් මඟින් අර්ජුන් මහේන්ද්‍රන් මහතාට නොතිසි නිකුත් කිරීම සිදුකළ යුතුව ඇති බවත් කියා තිබුණි.

අර්ජුන් මහේන්ද්‍රන් මහතාට අදාළ චෝදනා සම්බන්ධයෙන් තවදුරටත් කරුණු පැහැදිලි කරන ලෙස සිංගප්පූරු නීතිපතිවරයා විසින් ශ්‍රී ලංකාවේ විදේශ කටයුතු අමාත්‍යාංශය හරහා ශ්‍රී ලංකාවේ නීතිපතිවරයා වෙත දන්වා ඇති අතර මෑතකදී ලැබුණු එම ලිපියට අදාළ කරුණු සිංගප්පූරුව වෙත යැවීම සඳහා මෙරට නීතිපතිවරයා මේ වනවිට විධිමත් ලෙස කරුණු සකස් කරමින් පවතී. ඉහත සිද්ධිය සම්බන්ධයෙන් සිංගප්පූරු විදේශ අමාත්‍යාංශ ප්‍රකාශකයකු කරන ලදැයි කියන වාර්තාවක් පදනම් කරගනිමින් එරට මාධ්‍ය පළකර තිබූ වාර්තාවක් උපුටා දක්වමින් මෙරට මාධ්‍යවල පළවී තිබූ ප්‍රකාශ කිසිසේත් සිංගප්පූරු රජයේ නිල ප්‍රකාශ වශයෙන් පිළිගත නොහැකි බව අප රජයේ අදහසයි.


නව අදහස දක්වන්න