N.T.J සැකකරු නිදහස් කරන්නැයි පොලීසියට අල්ලස් | දිනමිණ


 

N.T.J සැකකරු නිදහස් කරන්නැයි පොලීසියට අල්ලස්

ජාතික තව්හීද් ජමාත් සංවිධානයේ රැඳවුම් නියෝග මත සිටින සැකකරුවෙකු නිදහස් කර ගැනීම සඳහා හොරොව්පතාන පොලිස් ස්ථානාධිපතිවරයාට අල්ලස් මුදලක් ලබා දීමට යම් පුද්ගලයෙක් උත්සහ දරා තිබේ.

එම පුද්ගලයාගේ සමීපතමයෙක් බවට සැකකරන හොරොව්පතාන ප්‍රදේශයේ පදිංචි වයස අවුරුදු 26 ක් වු මොහොමඩ් ෂිෆාන් නැමැති පුද්ගලයා රුපියල් ලක්ෂ 05ක අල්ලස් මුදලක් රැඳවුම් බාරයේ සිටින පුද්ගලයා නිදහස් කර ගැනීම වෙනුවෙන් පොලිස් ස්ථානාධිපතිවරයාට ලබා දීමට කැමැත්ත පළ කර ඇත.

අත්අඩංගුවට පත් පුද්ගලයා සැකකරුට ඇප ලැබීමෙන් අනතුරුව සම්පූර්ණ මුදල ලබා දෙන බවට පොලිස් ස්ථානාධිපතිවරයා වෙත දන්වා ඇති අතර එහි දී හොරොව්පතාන පොලිස් ස්ථානාධිපතිවරයා විසින් අදාළ අංශ දැනුවත් කර මෙම පුද්ගලයා අත්අඩංගුවට ගැනීමට සමත්ව තිබේ.

ඒ අනුව රුපියල් ලක්ෂ 02 හමාරක මුදලක් අද උදෑසන පොලිස් ස්ථානයේ දී ලබා දීමට යෑමේ දී මෙම පුද්ගලයා අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අත්අඩංගුවට ගෙන තිබේ.

පසුගිය අප්‍රේල් මස 21 දින කොළඹ ෂැංග්‍රිල්ලා හෝටලයේ පිපිරීමට අදාළව ජාතික ජව්හීද් ජමාත් සංවිධානයේ සැකකරුවෙකු වන අබ්දුල් මජීඩ් මොහොමඩ් නියාස් නැමති පුද්ගලයා මේ වන විට රැඳවුම් නියෝග මත සිටියි.

නව අදහස දක්වන්න