අර්බුද සමයේ කාගෙත් යුතුකම | දිනමිණ


 

අර්බුද සමයේ කාගෙත් යුතුකම

අසේල කුරුළුවංශ

දිගන ප්‍රහාරයේදී අන්තවාදී ලෙස හැසිරුණු බෞද්ධ පිරිස් හික්මවා ගැනීමට මහා සංඝරත්නයට නොහැකි වූයේ ඇයිද යන ප්‍රශ්නය ඇසූ ජාත්‍යන්තරය එම ප්‍රශ්නය හෙට මෙරට ඉස්ලාම් ආගමික නායකයින්ගෙන් අසන්නට ඉඩ ඇත. ඒ සඳහා ලබා දිය හැකි හොඳම පිළිතුර ඔවුන් පෙරට පැමිණ මෙම සිදුවීම් මාලාවට එරෙහිව හඬ නැගීමය. මාවනැල්ල සිදුවීමේදී තමන් අතින් වූ අත්වැරැද්ද නිවැරදි කර ගන්නට දැන් ඉස්ලාම් ආගමික නායකයන්ට අවස්ථාව ලැබී ඇත. තමන් ජීවත්වන සමාජය සුරක්ෂිත කිරීම පිණිස සෑම පුරවැසියකුටම වගකීමක් තිබේ.

ත්‍රස්තවාදය නිමා කිරීමෙන් පසු අප හමුවේ පැවැති ප්‍රධානතම අභියෝගය වූයේ ජාතීන් අතර සාමය හා සංහිඳියාව ගොඩනැඟීමය. ත්‍රස්තවාදය පරාජය කිරීමටත් වඩා අසීරුවූ කරුණක් වූ මෙය සාක්ෂාත් කර ගැනීම පිණිස පසුගිය සිවු වසරක කාලය තුළ ආණ්ඩුව ප්‍රමාණාත්මක වෙහෙසක් ගත් බව මෙරට පමණක් නොව ජාත්‍යන්තර ප්‍රජාව පවා පිිළිගන්නා කරුණකි. අන්තවාදය පිටු දැක සියලු ජාතීන් සාමයෙන් හා සමඟියෙන් එකට අත්වැල් බැඳගත් සමාජයක් පිළිබඳ සැවොම සිහින දකිද්දී අන්තවාදී අදහස් දරන ආගමික කණ්ඩායමක් නොසිතූ මොහොතක එල්ල කළ ම්ලේච්ඡ ප්‍රහාරය හේතුවෙන් ලාංකික ජනතාව අන්ද මන්ද වී සිටින බව පසුගිය දින කිහිපය තුළ ජනතාවගේ හැසිරීම නිරීක්ෂණය කිරීමෙන් මනාව පැහැදිලි විය. දෙවන පාසල් වාරය සති දෙකක පමණ කාලයකින් කල් දැමීමේ සිට බොහෝ දේ ආපස්සට කැරකී ගියේය. බියෙන් හා සැකයෙන් තොරව නිදහසේ ජීවත් වූ ජනතාව අතරට යළිත් මරණ බිය පැමිණ තිබේ. බහුවාර්ගික රටක එකම සහෝදර කැලක් මෙන් ගොඩනැගෙන්නට උත්සාහ කළ පිරිස් අතර බෙදීම් නිර්මාණය වෙමින් ජාතියක් තවත් ජාතියක් දෙස සැකයෙන් බලන තත්ත්වයක් නිර්මාණය වී ඇත. විදේශ සංචාරකයින් ඉලක්ක කර ගනිමින් ආර්ථිකය ගොඩනැඟීමට ආණ්ඩුව තුළ වූ අපේක්ෂාව සැලකිය යුතු ප්‍රමාණයකින් බිඳ වැටීමට ලක්ව තිබේ. එල්.ටී.ටී.ඊ ත්‍රස්තවාදය පරාජය කිරීමෙන් පසු පැවැති ආණ්ඩුවට වඩා ඉදිරියට ගොස් ජාතීන් අතර සංහිඳියාව ගොඩනඟන්නට වත්මන් ආණ්ඩුව පියවර රැසක් ගත්තේය. යම් යම් ජාතිවාදී හා ආගම්වාදී කණ්ඩායම්වල සුළු ක්‍රියාකාරකම් ඉඳහිට ඉස්මතු වුවද සමස්තයක් ලෙස ශ්‍රී ලංකාව සාමකාමී රටක්ය යන පිළිගැනීම ජාත්‍යන්තරය තුළ ගොඩනැඟීමත් සමඟ ලෝකයේ බොහෝ රටවල් සංචාරය සඳහා ඉතා ආරක්ෂිත හා සුදුසු රටක් ලෙස ශ්‍රී ලංකාවට පිිළිගැනීමක් ලබා දුන්නේය. දැන් ඒ සියල්ල කණපිට හැරී තිබේ.

නිවැරදි මග පෙන්වීම

පවතින අර්බුදයයෙන් නැගී සිටීමට ජාතියක් ලෙස අප බොහෝ දේ කළ යුතුව ඇත. ඒ සඳහා මුලින්ම කළ යුතුව තිබෙන්නේ ජාතීන් අතර විශ්වාසය හා සහෝදරත්වය වර්ධනය කිරීමය. ගත වූ සිවු වසරක කාලය තුළ යම් තරමකට එය ගොඩනැඟෙමින් තිබිණි. සිංහල, දෙමළ හා මුස්ලිම් ජනතාව එකට එක්ව අවුරුදු උත්සව සංවිධානය කිරීම, වෙසක් දිනට මුස්ලිම් ජනතාව මූලීකත්වය ගෙන දන්සල් පැවැත්වීම ඇතුළු බොහෝ සමාජ ක්‍රියාකාරකම් නිර්මාණය වූයේ මෙම පසුබිම තුළය. මහනුවර දිගන කේන්ද්‍ර කර ගනිමින් පසුගිය වසරේ මාර්තු මස ඇති වූ ගැටුම් හේතුවෙන් ඇතැම් සිංහල හා මුස්ලිම් පිරිස් අතර ගොඩනැඟුණු යම් යම් අවිශ්වාසයන් සියල්ල තුනීවී ගියේ සිංහල හා මුස්ලිම් ජනතාව එක්ව සිදු කළ මෙම කටයුතු මෙන්ම බෞද්ධ හා ඉස්ලාම් ආගමික නායකයින්ගේ නිවැරදි මඟ පෙන්වීම නිසාය. දිගන සිදුවීමට පසුව ඇතිවූ මාවනැල්ල නගරයේ බුදුපිළිමවලට හානි කිරීමේ සිද්ධිය ජාතීන් අතර ගැටුමක් දක්වා දිග් නොගැසුණේ ආගමික නායකයන් මූලිකත්වය ගෙන ජාතික සමඟිය වෙනුවෙන් දැමූ ශක්තිමත් පදනම නිසාය. එසේ වුවත් දැන් ඒ සියල්ල දෙදරා ගොස් තිබෙන්නේ ඉස්ලාම් අන්තවාදී කණ්ඩායමක් විසින් පාස්කු ඉරුදින දියත් කළ ම්ලේච්ඡ ප්‍රහාරය හේතුවෙනි. එය ඇත්තෙන්ම කාලයක් පුරා විවිධ අභියෝග හා දුෂ්කරතා හමුවේ ගොඩනඟන ලද සංහිඳියාව නමැති දෙවොලට එල්ල කළ ප්‍රහාරයකි. තවත් ලෙසකින් කියන්නේ නම් සංහිඳියාව නම්වූ කිරි කළයට ගොම එක් කිරීමකි.

මෙම ප්‍රහාරයත් සමඟ ශ්‍රී ලංකාව දේශපාලනික වශයෙන් අවිනිශ්චිත තත්ත්වයට පත්වන්නා සේම සංහිඳියාවට එරෙහි මෙරට බලවේග ශක්තිමත් වීමක්ද සිදුවන බව පේරාදෙණිය විශ්වවිද්‍යාලයේ දේශපාලන විද්‍යා අංශයේ මහ­ාචාර්ය උපුල් අබේරත්න මහතා පවසයි. එක් පැත්තකින් රට අස්ථාවරත්වයට පත්වෙද්දී සහ තවත් පැත්තකින් සංහිඳියාවට බරපතළ තර්ජනයක් එල්ලවෙද්දී ජාතීන් අතර සාමය වෙනුවට වෛරය ගොඩ නැගෙන පරිසරයක් නිර්මාණය වීමට වැඩි ඉඩක් පවතින බවත් එය ඉතා බරපතළ තත්ත්වයක් බවත් ඔහු පෙන්වා දෙයි. උන්මත්තක තත්ත්වයෙන් කටයුතු කරන ත්‍රස්තවාදී කණ්ඩායමක් මේ ආකාරයෙන් රට තුළ ක්‍රියාත්මක වීමේදී ඊට සාර්ථකව මුහුණ දීම පිණිස ජාත්‍යන්තර බුද්ධි අංශවල සහය ලබා ගැනීමට සිදුවන බවත් සියලු ප්‍රශ්න දේශපාලනික කෝණවලින් බලා විග්‍රහ කිරීමට යාම මෙම අවස්ථාවේ එතරම් යහපත් නොවන බවත් හෙතෙම අවධාරණය කරයි. රට ස්ථාවර කරමින් ඉදිරියට පවත්වා ගෙන‍ යාමට විධායක ජනපති ක්‍රමය තරම් යහපත් දෙයක් නොමැති බව පැවසූ පිරිස් නිහඬ කරන්නට ද මේ ප්‍රහාරය හේතු වූ බව පවසන ඒ මහතා තනි පුද්ගලයකු වටා සියලු බලය කේන්ද්‍රව පවතින අවස්ථාවක ඒ වටා පවතින සෙසු පද්ධතිය අවුල් වන ආකාරය මෙම සිදුවීම තුළින් රටම දුටු බවද කීවේය.

ඉස්ලාම් ධර්මය

මාවනැල්ල ප්‍රදේශයේ බුදු පිළිමවලට හානි කිරීමේ සිදුවීම හා මෙම ත්‍රස්ත ප්‍රහාරය අතර යම් සම්බන්ධතාවක් ගොඩනඟන්නට උත්සාහ කරන පිරිස් පෙන්වා දෙන්නේ මාවනැල්ල සිද්ධියේ සැකකරුවකු මරාගෙන මැරෙන බෝම්බ ප්‍රහාරයට සහය ලබාදී තිබෙන බවයි. එම සිදුවීම අවස්ථාවේ මෙරට මුස්ලිම් ජනතාව එකී සිද්ධිය හෙළාදකිමින් අදහස් දක්වන්නට වැඩි උනන්දුවක් නොදැක්වීමේ අවාසනාවන්ත ප්‍රතිඵල අද අත්විඳින්නට සිදුව තිබෙන්නේ ඔවුන්ටමය. එම අවස්ථාවේ අදාළ සිද්ධිය හෙළා දකිමින් අදහස් දැක් වූ මහනුවර ප්‍රධාන මවුලවී ෆස්රූල් රහ්මන් මවුලවී තුමා පවසන්නේ වෙනත් ආගම්වලට අපහාස කිරීම ඉස්ලාම් ධර්මය තරයේ හෙළාදකින බවයි. එය අල්කුරානයේද සඳහන් බව පෙන්වා දෙන මවිලවිතුමා අන් දහමකට නිගරු කිරීම අන්‍ය ආගමිකයකුට හිංසා කිරීම කිසිදු දහමක් කිිසිදු විටෙක පිිළි නොගන්නා බවද අවධාරණය කරයි. අල්ලාහ් හැර ඔවුන් අයදින දැයට නුඹලා බැණ නොවදින්නයි ශුද්ධ වූ අල් කුරානයේ සඳහන්ය. අන් ආගමිකයින් අදහන කිසිවකට බැණ වැදීම හෙළාදකින ඉස්ලාමය, අන් ආගමකට අපහාස වන අයුරින් හෝ අන් ආගමික හැඟීම් ඇවිස්සෙන අයුරින් ක්‍රියා කිරීම සඳහා කිසි විටෙකත් අනුබල නොදෙන බවද එතුමා කියයි. ඉතිහාසය පුරාවට ලාංකීය මුස්ලිම් ප්‍රජාව අනෙකුත් ප්‍රජාවන් සමඟ සාමයෙන් ජීවත් වෙමින් රටේ සංවර්ධනය උදෙසා නන් අයුරින් දායකත්වය පිරිනැමූහ. ආගමේ හෝ ජාතියේ නාමයෙන් අන් ආගමක් අපහාසයට පත්කරන කිසිදු ක්‍රියාදාමයක් මුස්ලිම් ප්‍රජාව කිසි විටෙකත් අනුමත නොකරන බව පවසන මවුලවී තුමා ඉස්ලාමයේ නාමයෙන් සිදු කෙරෙන කවර හෝ අන්තවාදී ක්‍රියාවක් මුස්ලිම් ප්‍රජාව තරයේ හෙළා දකින බවද කීය. මුස්ලිම් ජාතිකයකු ලෙස උපත ලැබ ඇති නමුත් ඉස්ලාම් ධර්මය නිවැරදිව ඉගෙන නොගත් සුළු පිරිසක් ඉස්ලාම් ධර්මය ඉදිරියට දමමින් සිදු කරන මෙම ම්ලේච්ඡ ක්‍රියා ඉස්ලාම් භක්තිකයින් තරයේ හෙළාදකින බවද එතුමා ප්‍රකාශ කරයි.

පුරවැසි වගකීම

මෙම ප්‍රහාරයත් සමඟ මල්වතු අස්ගිරි උභය මහ විහාරීය මහනායක ස්වාමින්ද්‍රයන් වහන්සේ දෙනම හා දියවඩන නිලමේවරයා එක්ව නිවේදනයක් නිකුත් කරමින් පවසා සිිටියේ ජාති, ආගම් දේශපාලන හා පක්ෂ බේද සියල්ල අමතක කර විපතට පත්වූවන්ට පිහිට වන ලෙසත් යළි මෙවැනි විපතක් රට තුළ ඇති නොවීම පිණිස සියලු දෙනා එක්ව වැඩ කරන ලෙසත්ය. ප්‍රහාරය හෙළා දකිමින් මවුලවී තුමන්ලාද අදහස් දැක්වීමට පෙළඹීම සුබවාදී තත්ත්වයකි. දිගන ප්‍රහාරයේදී අන්තවාදී ලෙස හැසිරුණු බෞද්ධ පිරිස් හික්මවා ගැනීමට මහ සංඝරත්නයට නොහැකි වූයේ ඇයිද යන ප්‍රශ්නය ඇසූ ජාත්‍යන්තරය එම ප්‍රශ්නය හෙට මෙරට ඉස්ලාම් ආගමික නායකයින්ගෙන් අසන්නට ඉඩ ඇත. ඒ සඳහා ලබා දිය හැකි හොඳම පිළිතුර ඔවුන් පෙරට පැමිණ මෙම සිදුවීම් මාලාවට එරෙහිව හඬ නැගීමය. මාවනැල්ල සිදුවීමේදී තමන් අතින් වූ අත්වැරද්ද නිවැරදි කර ගන්නට දැන් ඉස්ලාම් ආගමික නායකයින්ට අවස්ථාව ලැබී ඇත. තමන් ජීවත්වන සමාජය සුරක්ෂිත කිරීම පිණිස සෑම පුරවැසියකුටම වගකීමක් තිබේ. එම වගකීම අප කොතෙක් දුරට ඉටු කර තිබෙන්නේද කියන කාරණය අපගෙන්ම අසන්නට තරම් මෙම ප්‍රශ්නය තුළින් අපට ඉඩකඩ විවර වී තිබෙන බව පේරාදෙණිය විශ්වවිද්‍යාලයේ මහාචාර්ය මුවඇටගම ඥනානන්ද හිමියෝ පවසති.

සාමය, සමඟිය හා සහෝදරත්වය පිළිබඳ ජනතාව හමුවේ අදහස් දක්වන පිරිස් එවැනි ප්‍රකාශ කරනු ලබන්නේ සමාජය කෙරෙහි විශ්වාසය තබා බවත් පෙරළා සමාජය තුළින් ඊට පටහැනි දේ සිදු වන්නේ නම් ඉන් සමාජ අවමානයට හා උපහාසයට ලක්වන්නේ අදාළ ප්‍රකාශ කළ අයම බවත් උන්වහන්සේ පවසති. මේ නිසා සාමය, සංහිඳියාව පිළිබඳ කතා කරන පිරිස් ප්‍රායෝගිකය. ඒ වෙනුවෙන් කැපවිය යුතුව තිබෙන බවත් ඉස්ලාම් ආගමික නායකයින් හමුවේ එම අභියෝගය පවතින බවත් ඥානානන්ද හිමියෝ අවධාරණය කරති. පවතින අර්බුදකාරී වාතාවරණය තුළ සිංහල ජනතාව මුස්ලිම් ජනතාව දෙස යළිත් සැකයෙන් බලන්නට යොමුව තිබෙන බැවින් එය හැකි තරම් නිවැරදි කළ හැක්කේ මුස්ලිම් ජනතාවටම බව පෙන්වා දෙන උන්වහන්සේ ඉස්ලාම් අන්තවාදී කණ්ඩායම් අනුගමනය කරන සමාජ ප්‍රශ්නවලට තුඩු දෙන සංස්කෘතික උපාංග බැහැර කිරීම පිණිස තම ආගමිකයින් යොමු කිරීම ඉස්ලාම් ආගමික නායකයින්ගේ වගකීම බවද අවධාරණය කරති.

මෙම මහා ඛේදවාචකය අප මෙතෙක් ගොඩනඟාගෙන පැමිණි ජාතික සුහදතාවට හා අන්තර් ආගමික සංහිඳියාවට මරු පහරක් වුවත් ඉන් අධෛර්යමත් නොවී එය හැරවුම් ලක්ෂයක් බවට පත්කර ගැනීමට සියලු ශ්‍රී ලාංකිකයින් උනන්දු විය යුතු බව ශ්‍රී ලංකා කතෝලික රදගුරු මණ්ඩලයේ සභාපති, බදුල්ල රදගුරු ජේ.වින්ස්ටන්.එස් ප්‍රනාන්දු හිමිපාණෝ පවසති. මතුපිට පමණක් අධ්‍යයනය නොකර සෑම ආගමිකයකුම තමන් අදහන ආගමේ හරය සොයා යා යුතුව තිබෙන බවත් එවිට මෙවැනි ම්ලේච්ඡ ක්‍රියා ආගමික නායකයින් කිිසිදු විටෙක අනුමත නොකරන බව සියලු දෙනාට පසක් වනු ඇති බවත් උන්වහන්සේ පවසති.

නව අදහස දක්වන්න