වට්මෝර් යළිත් එයි | දිනමිණ

වට්මෝර් යළිත් එයි

පසුබෑමකට ලක්ව තිබෙන බවට හඳුනාගෙන තිබෙන මෙරට දෙවැනි පෙළ ක්‍රිකට් කණ්ඩායම නගා සිටුවීමේ අරමුණ පෙර දැරිව 1996 ලෝක කුසලාන ක්‍රිකට් ශූරතාව දිනාගත් කණ්ඩායමේ පුහුණුකරු ලෙස කටයුතු කළ ඩේව් වට්මෝර් මහතාව නැගී එන කණ්ඩායමේ හෝ සංවර්ධන සංචිතයේ පුහුණුකරුවකු ලෙස බඳවා ගැනීම කෙරෙහි ශ්‍රී ලංකා ක්‍රිකට් ආයතන බලධාරීන්ගේ අවධානය යොමු වී තිබේ.

මේ සඳහා ඉකුත් සති දෙක තුනක පමණ කාලයේදී දෙපාර්ශ්වය අතර සාකච්ඡා වට කීපයක්ම පැවැත්වී තිබෙන අතර අවස්ථා කීපයකදීම වට්මෝර් මහතා ක්‍රිකට් ආයතන පරිශ්‍රයට පැමිණ සාකච්ඡා කීපයක්ම පවත්වා තිබෙන බව කියැවේ.

මේ සම්බන්ධව ක්‍රිකට් ආයතන ප්‍රධානියකුගෙන් කරන ලද විමසීමේදී, “වට්මෝර් වගේ කෙනෙක්ගේ සේවය ලබා ගැනීමට හැකිවුවහොත් ශක්තිමත් දෙවැනි පෙළ කණ්ඩායමක් හදා ගත හැකි කියන මතයේ හැමෝම හිටියා. අන්න ඒකයි අපි ඔහු සමඟ සාකච්ඡා කිරීමට තීරණය කළේ. කොහොම වුණත් ඒ සඳහා ඔහු ගාව හොඳ සැලැසුම් තියෙනවා. ඒ පිළිබඳව ඔහු කතා කරපු අවස්ථාවේදී අපිට තේරුම් ගියා. බොහෝ විට ගොඩක් වෙලාවට ඔහු ශ්‍රී ලංකා සංවර්ධන සංචිතයේ හෝ නැගී එන කණ්ඩායමේ පුහුණුකරු තනතුරට පත් වේවි” යැයි පවසා සිටියේය.

1996 වසරේ පැවැති ලෝක කුසලාන ක්‍රිකට් තරගාවලිය ජය ගැනීම සඳහා තිරස පිටුපස මෙහෙවර කළ පිරිස අතර ඩේව් වට්මෝර් මහතාගේ නම නිරන්තරයෙන්ම කියැවෙයි. වත්මන් ඉන්දීය කණ්ඩායම් නායක විරාත් කෝලි වයස අවුරුදු 19න් පහළ කණ්ඩායමේ නායකත්වය දරද්දී ඉන්දීය වයස අවුරුදු 19න් පහළ කණ්ඩායමේ ප්‍රධාන පුහුණුකරුවා ලෙසින් කටයුතු කරන ලද්දේ වට්මෝර් මහතාය. ශ්‍රී ලංකාවේ පුහුණුකරු ධුරයෙන් ඉවත්ව යෑමෙන් පසු ඔහු බංග්ලාදේශය සහ පාකිස්තානය ඇතුළු ජාත්‍යන්තර රටවල් කීපයකම ප්‍රධාන පුහුණුකරු ලෙස කටයුතු කළේය. කෙසේ වෙතත් එම කොන්ත්‍රාත්තු අවසන් වීමෙන් පසු මීට වසර 2 කට පමණ ඉහතදී ගල්කිස්ස ශාන්ත තෝමස් විදුහල් ක්‍රිකට් කණ්ඩායමේ උපදේශකවරයකු ලෙසද වට්මෝර් මහතා කටයුතු කළේය.

නව අදහස දක්වන්න