තාක්ෂණය පෙරමුණෙහි තබාගෙන ශ්රී ලංකාව ඉදිරියට ගෙන යා යුතු යැයි අගමැති රනිල් වික්රමසිංහ මතා කියා තිබේ. තාක්ෂණික අභියෝග ජය ගැනීම සඳහා කැපවීමෙන් කටයුතු කළ යුතු යැයි ජනාධිපති මෛත්රීපාල සිරිෙස්න මහතා කියා තිබේ. අපේ නායකයන් මේ අයුරින් දුරදක්නා ඥානයෙන් යුතුව ක්රියා කිරීම හා අදහස් ප්රකාශ කිරීම ඉතා වැදගත් ය. මෙයින් කරුණු දෙකක් පැහැදිලි වෙයි. පළමුවන කාරණය වන්නේ අපේ නායකයන්ට නූතන ලෝකය ගැන හොඳ වැටහීමක් ඇති බව සනාථ වීම ය. දෙවන කාරණය වන්නේ අපේ නායකයන් රටේ අනාගතය ගැනත් තරුණ පරම්පරාව ගැනත් බලවත් හැඟීමකින් යුතුව ක්රියා කරන බව පෙන්නුම් කිරීම ය.
ලෝකය ජයගත හැකි ප්රධාන මාර්ගය ඇත්තේ විද්යාව හා තාක්ෂණය මත යැයි කිව හැකිය. අසල්වැසි ඉන්දියාව මේ තත්ත්වය වටහාගෙන බොහෝ කල්ය. ඒ අනුව අභ්යවකාශ තරණයට ද ඉන්දියාව එකතු විය. අභ්යාවකාශ තරණය සම්බන්ධයෙන් උනන්දු වන රටවල් හතරක් ඇත. ඒ අමෙරිකාව, රුසියාව, චීනය හා ඉන්දියාව යි. මේ රටවල් හතර ම ලෝකයේ ප්රබල රාජ්යයන් ලෙස සලකනු ලැබේ. අභ්යවකාශ තරණයෙන් විද්යාවේ හා තාක්ෂණයේ නව අවධියක් නිර්මාණය වී ඇත. ඉන්දියාව තව නොබෝ දිනකින් සඳ තරණය සඳහා යානයක් යවනු ඇත. මෙය දකුණු ආසියානු කලාපයේ ජයග්රහණයක් ලෙස ද සැලැකිය හැකි ය.
අපේ ඉතිහාසය ගතහොත් එය කෘෂිකර්මයට පමණක් නො ව; විද්යාව හා තාක්ෂණයට ද අභිවර්ධනයක් එකතු කළ කාල පරාසයකි. සීගිරිය නිර්මාණය කිරීමේ දී භාවිත කර ඇති තාක්ෂණය අදටත් අප විස්මයට පත් කරයි. යෝධ ඇළ නිර්මාණය කිරීමේ දී යොදාගෙන ඇති තාක්ෂණය නූතන ඉංජිනේරුවන්ගේ විමතියට කාරණයෙකි. අපේ ඉදිකිරීම් තාක්ෂණයේ මහිමය ජේතවනාරාමය, අභයගිරිය වැනි මහා ස්තූපවලින් මොනවට පැහැදිලි වෙයි. වාරි තාක්ෂණයේ විස්මිත න්යායන් පුරාණ වැව් පද්ධතියෙන් ඉස්මතු වෙයි. අතීත ශ්රී ලංකාව නැව් කර්මාන්තයට පවා නැඹුරු වී සිටි බව ඉතිහාසයේ කරුණුවලින් පැහැදිලි වෙයි.
ලෝකය කෘෂිකාර්මික යුගයෙන් කාර්මික යුගයට ගමන් කළේය. ඉනික්බිති කාර්මික යුගයෙන් තාක්ෂණික යුගයට ලෝකය ප්රවේශ වී ඇත. නූතන තාක්ෂණය නිෂ්පාදන ක්රියාවලිය ශක්තිමත් කර ඇති අතර මානව සම්බන්ධතා පුළුල් කර ඇත. ඒ අනුව මුළුමහත් ලෝකය ම විශ්ව ගම්මානයක් ලෙස විග්රහ කරනු ලැබේ. මේ යුගයෙන් ආපස්සට ගොස් කෘෂිකර්මයෙන් පමණක් රට ස්වයංපෝෂිත කළ හැකියැයි කිසිවකු කියත් ද එය මෝඩ අදහසක් ලෙස ප්රතික්ෂේප කරන්නට සිදුවනු ඇතැ’යි අගමැතිවරයා පෙන්වා දෙයි. එය සම්පූර්ණ සත්යයෙකි. තාක්ෂණයෙන් තොරව රට අඟලකින් හෝ ඉදිරියට තල්ලු කළ නො හැකි ය.
ලෝක ආර්ථිකය සමඟ ගනුදෙනු කිරීම සඳහා නූතන තාක්ෂණය අත්යවශ්ය බව අගමැතිවරයා කියා සිටින්නේ කාලයක සිට ය. වෙළෙඳපොළ ආර්ථිකය, සාගර ආර්ථිකය, ප්රති-අපනයන ආර්ථිකය, සේවා ආර්ථිකය යන සෑම ක්ෂේත්රයක් ම රැඳී ඇත්තේ නූතන තාක්ෂණය මත ය. නූතන තාක්ෂණය යනු තොරතුරු තාක්ෂණය පමණකැ’යි සමහරුන් තුළ මතයක් පවතී, එහෙත් එය වැරැදිය. තොරතුරු තාක්ෂණය නූතන තාක්ෂණයේ එක් අංශයක් පමණි. කෘෂිකර්මයට, වෙළෙඳපොළට, කාර්මික නිෂ්පාදනවලට යොදා ගනු ලබන අනන්ය තාක්ෂණ විධික්රම අනන්තවත් තිබේ. අගමැතිවරයාගේ අදහස වන්නේ ඒවා හඹා ගොස් ලෝකය ජය ගත යුතුය යන්න ය. ඊට අදාළ ප්රදර්ශනයක් විද්යා හා තාක්ෂණ අමාත්යාංශය විසින් මේ දිනවල කොළඹ දී පවත්වනු ලැබේ. එය හඳුන්වා ඇත්තේ ‘ශිල්ප සේනා’ යන නමින් ය.
ඉහත ප්රදර්ශනය ලබන ඉරිදා දක්වා පැවැත්වේ. අපේ පාසල් ශිෂ්ය ප්රජාව මෙන් ම තරුණ පරපුර ද මෙයින් ප්රයෝජන ගත යුතු ය. නවෝත්පාදනවලට වෙනදාට වඩා සැලැකිල්ලක් රජය දක්වයි. පාසල් ශිෂ්යයන් විසින් නිර්මාණය කරන ලද නවෝත්පාදන ගණනාවකට මූල්ය පහසුකම් හා උපදේශන ලබාදීමට රජය ඉදිරිපත් වී ඇත. ජනාධිපතිවරයා මෑතක දී කියා සිටියේ අපේ දරුවන් නව තාක්ෂණය ජය ගැනීම සඳහා පෙරමුණ ගත යුතු බව ය. එය අපේ දරුවන්ට කළ හැකි බව ද, ශ්රී ලංකාව කුඩා රාජ්යයක් වුව දීර්ඝ ඉතිහාසයක් ඇති රටක් බව ද ජනාධිපතිවරයා සිහිපත් කළේ ය. ඓතිහාසික වශයෙන් අපට ඇති ප්රෞඪත්වය ආරක්ෂා කිරීමට නම් අප ලෝකය ජය ගත යුතු ය. එය කළ හැක්කේ තාක්ෂණය සමඟ ඉදිරියට ගමන් කිරීමෙන් ය.
තාක්ෂණය මිනිසාගේ චර්යාවන් වෙනස් කර ඇති බවට ද, මිනිසා සංකර කර ඇති බවට ද මත පළවෙයි. මේ අනුව ගමේ සරල කෘෂිකර්මයට යොමුවීමෙන් මිනිසාගේ සංස්කෘතිය හා සදාචාරය ආරක්ෂා කර ගත හැකිය යන මතය සමහරු ඉස්මතු කරති. මධ්යස්ථ මතධාරීන්ගේ විවේචනයට අනුව එය ළිං මැඬි අදහසකි. නූතන ලෝකය තාක්ෂණය ඔස්සේ එකට ගැට ගැසී ඇති අතර හුදෙකලාව කිසිඳු රාජ්යයකට දියුණු විය නො හැකි බව සනාථ වී තිබේ. ඉතිහාසය විමසන විට පෙනී යන්නේ ශ්රී ලංකාව හුදෙකලා රාජ්යයක් නො වන බව ය. ඈත අතීතයේ දී පවා මිසරය, ග්රීසිය, චීනය, ඉරානය වැනි රටවල් සමඟ ආර්ථික ගනුදෙනු ශ්රී ලංකාවට තිබුණු බව පැහැදිලිය. අතීතයේ දී ද ශ්රී ලංකාව ආර්ථික මධ්යස්ථානයකි.
ශ්රී ලංකාව දිළිඳු රාජ්යයක් බවට ද අසමත් රාජ්යයක් බවට ද ලේබල් කර තිබුණේ අතීතයේදී ය. නූතන ශ්රී ලංකාව යනු මැදි ආදායම් සහිත ශීඝ්ර දියුණුවක් අපේක්ෂා කරන රාජ්යයකි. අප සතු භෞතික සම්පත් සේ ම මානව සම්පත් ද ලෝකය සමඟ තරඟ කිරීමට තරම් ශක්තිමත් ය. මේ බව පාලකයන් පමණක් නොව; පාලිතයන් ද වටහාගැනීම වැදගත් ය. අමතක නොකළ යුතු කාරණය වන්නේ ඊළඟ දසක කිහිපය තුළ ආසියාව ලෝකයේ ප්රධාන ආර්ථික කලාපය වන බව ය.
නව අදහස දක්වන්න