දේශපාලනය කියන්නෙත් එක්තරා සමාජ ගැටලුවක් | දිනමිණ


 

දේශපාලනය කියන්නෙත් එක්තරා සමාජ ගැටලුවක්

බාර්බරා කින්ග්සොල්වර්

අමෙරිකානු ජාතික නවකතා රචිකාවියක, කිවිඳියක වන බාර්බරා කින්ග්සොල්වර් පසුගියදා ඇගේ අලුත් ම නවකතාව වන ‘Unsheltered’ ග්‍රන්ථය ප්‍රකාශයට පත් කළා ය. මේ එම ග්‍රන්ථය හා ඇගේ ග්‍රන්ථකරණ කටයුතු පිළිබඳ goodreads.com වෙබ් අඩිවියෙහි පළ වූ සාකච්ඡාවක පරිවර්තනයකි.

ඔබගේ නවකතා ආරම්භ කරන්නේ, ප්‍රශ්න ඇසීමෙන් බව පෙනෙනවා. ඔබ ඇයි එහෙම කරන්නෙ?

ඒක තමයි මගේ ලිවීමේ කලාව. නැතිනම් මගේ අනන්‍යතාව ඒක කිව්වොත් නිවැරැදියි. මගේ සෑම පොතක්ම මං ආරම්භ කරලා තිබෙන්නේ ප්‍රශ්නයකින්. උදාහරණයක් විදිහට මගේ මේ අලුත්ම පොතත් එහෙමයි. ‘Unsheltered’ කෘතිය ආරම්භ වෙන්නේ ‘What happens when you’ve done everything right, but you can’t pay your bills?’ යන ප්‍රශ්නයෙන්.

ඔබගේ මේ කෘතියෙන් කියැවෙන්නේ, ඉහත ඔබ මේ කෘතිය ආරම්භයේ අසන ප්‍රශ්නය සම්බන්ධ සිදුවීමක්ද?

ඇත්තටම ඔව්. මේ කෘතිය හරහා ගවේෂණය කරන එක් ප්‍රශ්නයක් තමයි ඒ. නිව් ජර්සි හි වයින්ලන්ඩ්වල ජීවත් වන, එකිනෙකට වෙනස් සංස්කෘති දෙකකට අයත් පවුල් දෙකක් අතර සිදු වී තිබෙන ඝට්ටනයක් නැතිනම්, අර්බුදයක් ගැනයි මේ කතාවෙන් කියැවෙන්නේ. ඒක අතීත සිදුවීම් හා වර්තමාන සිදුවීම් අතර දෝලනය වන්නක්.

මෙහි ප්‍රධාන චරිත ගැන කතා කළොත්?

‘විල්ලා’ සහ ‘ඉආනෝ’ යන මැදිවියේ යුවළක් වටායි මේ කතාව ගෙතෙන්නෙ. ඔවුන් රැකියා නොමැති ප්‍රශ්නයෙන් පීඩා විඳින යුවළක්. පැරැණි නිවෙසක වාසය කරන ඔවුන්, අතීතයේ සඟරා හා ශාස්ත්‍රීය කටයුතුවල යොමු වී සිට තිබෙනවා. ඔවුන්ගේ මේ පැරැණි නිවෙස දැන් කඩා වැටීමට ආසන්නවයි තිබෙන්නෙ. ඔවුන් සිය නිවෙසේ අතීතය කරා ගමන් කරනවා. එය වර්ෂ 1800 අගභාගය කරා දිවයනවා.

යම්කිසි දේශපාලනිකමය මාතෘකා පිළිබඳත් මෙහි සඳහන් වෙනවා නේද?

ඔව්. මෙය ගෝලීයකරණය සහ අමෙරිකානු සිහිනයේ පරිහානිය ඇතුළු දේශපාලනික වශයෙන් ආරෝපිත මාතෘකා කිහිපයක් ගවේෂණය කරන,කාලෝචිත නවකතාවක්.

ඔබ කොහොමත් පාඨකයන් අතර ප්‍රසිද්ධ, සමාජ ප්‍රශ්න පිළිබඳ ලියන්නියක් ලෙසයි. එහම නේද?

ඔබ නිවැරැදියි. මගේ පාඨකයන් ඉහත දේශපාලනමය මාතෘකා පිළිබඳ ලියා තිබීම සම්බන්ධයෙන් ඇතැම්විට පුදුම වෙනවා ඇති. ඒත්, ඔවුන් පුදුම වෙන එකකුත් නෑ. ඒකට හේතුව, දේශපාලනය කියන්නෙත් එක්තරා සමාජ ගැටලුවක් නිසයි.

ඔබ ‘අන්ෂෙල්ටර්ඩ්’ කෘතිය ලිවීම ආරම්භ කළේ කවදා ද?

වසර 3කට පමණ පෙර සිටයි. පොත ලිවීම පිළිබඳ දළ අදහසක් මගේ මනසේ මුල සිටම තිබුණා. ඒත්, ඇත්තටම මගේ අනෙක් කෘති සමඟ බැලුවහම,අදහස් ගළපා කතාව ගොඩනඟන්න මේ කෘතියට වැඩි කාලයක් ගත වුණා. මෙහි එක් චරිතයක් තිබෙනවා ‘බුල්හෝර්න්’ නමින්. ඒ චරිතය, මම සියැසින් දුටු පුද්ගලයෙක් සමඟ ගොඩනැඟුව චරිතයක්.

ඔබගේ මේ කතාව තුළ අතීතය හා වර්තමානය අතර සිදුවීම් ඇතුළත් වෙනවා. ඔබ මෙය ගළපා ගත්තේ කොහොමද?

ඒක තරමක් තේරුම් ගැනීමට අපහසු දෙයක්. මම මුලින්ම තේරුම් අරගෙන, පසුව පාඨකයන්ට තේරුම් ගැනීමට පහසු ලෙස ගළපා ලිව්වා. බැලූ බැල්මට හරි පහසු සිදුවීම් පෙළක් ලෙස පෙනුණත්, එහි අතීත හා වර්තමාන සිදුවීම්වල ගැඹුරු අර්ථයක් තිබෙනවා.

ඔබගේ ලේඛන වෘත්තීය ජීවිතයට දැන් කොපමණ කාලයක් වෙනවාද?

මම ලේඛන දිවිය ආරම්භ කළේ 1988 වසරේදීයි. ‘ද බීන් ට්‍රීස්’ නමින් පළමු නවකතාව ප්‍රකාශයට පත් කරලයි ලේඛන දිවියට පිවිසුණේ. එතැන් පටන් මේ දක්වා වසර 30කට අධික කාලයක් පුරා මං ලේඛන කලාව තුළ නිරත වෙනවා.

ඔබ මේ දක්වා කොපමණ ග්‍රන්ථ ප්‍රමාණයක් රචනා කර තිබෙනවාද?

මම ප්‍රබන්ධ නවකතා 9ක් , රචනා 2ක්, කවිපොත් 1 ක්, ප්‍රබන්ධ නොවන නවකතා 3ක් ඇතුළු ග්‍රන්ථ 15ක් පමණ මේ වනවිට රචනා කර තිබෙනවා. ‘ද බීන් ට්‍රීස්, හෝම්ලෑන්ඩ් ඇන්ඩ් අදර් ස්ටෝරීස්, ඇනිමල් ඩ්‍රීම්ස්, පිග්ස් ඉන් හෙවන්, ෆ්ලයිට් බිහේවියර්, අනදර් අමෙරිකා, හෝල්ඩින් ද ලයින්, ලාස්ට් ස්ටෑන්ඩ්, ඇනිමල්, වෙජිටබර්, මිරකල්; අ ඉයර් ඔෆ් ෆුඩ් ලයිෆ්, ස්මෝල් වොන්ඩර් ආදී ග්‍රන්ථ ඉන් කිහිපයක්.

ඔබ ප්‍රසිද්ධ ග්‍රන්ථ විචාර කරන්නියක් ලෙසත් ප්‍රසිද්ධි‍යක් උසුලනවා නේද?

ඇතැම් පාඨකයන් හා විචාරකයන් ඒ විදිහට හඳුන්වනවා. එයට බෙහෙවින්ම බලපෑවෙ ‘ලොස් ඇන්ජලීස් ටයිම්ස්’ හි අමෙරිකානු සැප්තැම්බර් 11 ප්‍රහාරය පිළිබඳ විවේචනයක් මං ඉදිරිපත් කර තිබුණු නිසයි. මට හිතෙන දේ මම ලියනවා. එපමණයි.

ඔබට ලැබී තිබෙන ගෞරව සහ සම්මාන පිළිබඳ කතා කළොත්?

‘නැෂනල් හියුමනටිස් සම්මානය, දකුණු අප්‍රිකානු ජාතික ග්‍රන්ථ සම්මානය, පුලිට්සර් ත්‍යාගය, PEN/Faulkner සම්මානය, ජේම්ස් බෙයාර්ඩ් සම්මානය, ලොස් ඇන්ජලීස් ටයිම්ස් බුක් සම්මානය ආදී සම්මාන හා ගෞරව මං ලබාගෙන තිබෙනවා.

ඔබ නිව්යෝර්ක් ටයිම්ස්හි හොඳ ම විකුණුම් වාර්තා තැබූ කතුවරියන් අතරත් සිටිනවා නේද?

ඔව්. 1993 වසරේ පටන් තමයි එම ලැයිස්තුව අතරට එක් වී සිටින්නෙ. මම දැනටමත් මගේ බොහොමයක් ඉලක්ක වෙත ගොස් හමාරයි. ඒ ගැන මට සතුටුයි. මම නිතර නිතර පොත් රචනා කරන අයෙක් නෙමෙයි. එක පොතක් එළි දක්වන්න මම බොහෝ කාලයක් ගන්නවා. කාලය අරගෙන, පාඨකයන්ට හොඳ නිර්මාණයක් ලබා දෙනවා.

ඔබ විවිධ විෂය ක්ෂේත්‍ර ඔස්සේ පොත් රචනා කරන කෙනෙක්?

ඔව්. සාමාන්‍යයෙන් බොහෝ‍දෙනා මා හඳුන්වන්නෙ, ඓතිහාසික ගණයේ නවකතා රචනා කරන්නියක් විදිහටයි. ඒත් ඊට අමතරව සමාජ සාධාරණය, පුරුෂාධිපත්‍ය, පරිසරය ආදී ක්ෂේත්‍ර පිළිබඳත් මං පොත් ලියනවා.

යශෝදා ඉන්දීවරී

නව අදහස දක්වන්න