සංස්කෘතික හුවමාරුව SOORIYA VILLAGE | දිනමිණ


 

සංස්කෘතික හුවමාරුව SOORIYA VILLAGE

සොකරි, කෝලම්, නාඩගම්, නූර්ති, ටීටර් ආදියෙහි සිට වර්තමාන වේදිකා නාට්‍ය දක්වා විහිදී හා ලාංකේය වේදිකා නාට්‍ය කලාවට විවිධ ආභාෂයන් සහ මගපෙන්වීම එක් වෙමින් වර්තමානය දක්වා දිගු ගමනක් පැමිණ තිබේ.

සාමූහික කලා මාධ්‍යයක් වන වේදිකා නාට්‍ය කලාව අධ්‍යයනය කිරීම පහසු කටයුත්තක් නොවන්නේ ආනුශාංගික කලා රාශියකින් සැදුම්ලත් කලා මාධ්‍යයක් වීම හේතුවෙනි. ප්‍රේක්ෂකයා වෙත සජීවීව සමීප විය හැකි වේදිකා නාට්‍ය කලාවේ විවිධ පරාස ස්පර්ශ කරමින් අධ්‍යනයක යෙදෙන්නට අවකාශ ලැබීම කලාවේ පෝෂණය සහ උන්නතිය කෙරෙහි ඍජු බලපෑමක් බවට පත්වෙයි.

පාන්තික භේදයකින් තොරව යුරෝපානු නාට්‍ය කලාව කෙරෙහි වන අවධානය පුළුල් කරමින් රසඥතාවය වර්ධනය කරනු වස් අරවින්ද සංස්කෘතික සමාජය මඟින් සිදුකරන "සූරිය විලේජ්" ඉංග්‍රීසි නාට්‍ය වැඩමුළුව මගින් ඉංග්‍රීසි භාෂාව බහුලව භාවිතා කරන ඉහළ මධ්‍යම පාන්තික ප්‍රජාවත්, සිංහල භාෂාවෙන් කටයුතු කරන බහුතර ශ්‍රී ලාංකේය ප්‍රජාවත් එකට එක් කරන්නට එම සංස්කෘතික සමාජයෙහි නිර්මාතෘ අරවින්ද හෙට්ටිආරච්චි වෑයම් දරයි.

" අරවින්ද සංස්කෘතික සමාජය මඟින් පවත්වන මේ වැඩමුළු මාලාව, අලුත් ඉංග්‍රීසි නාට්‍යයක් නිර්මාණය කිරීම දක්වා රැගෙන යන්නට අප බලාපොරොත්තු වෙනවා. පාසල් සහ වෙනත් ආයතන වෙත මෙම නාට්‍ය වැඩමුළුව නොමිලේ රැගෙන යමින් ඒ අනුසාරයෙන් අප නිර්මාණය කරන්නට අදහස් කරන නාට්‍ය සඳහා පිරිස් තෝරාගැනීමටත් අදහස් කරනවා."

මේ වන විට සෑම සෙනසුරාදාවකම උදෑසන 9.00 සිට 12.00 දක්වා සුරිය විලේජ්හී මෙම නාට්‍ය වැඩමුළුව පැවැත්වේ. ඉංග්‍රීසි භාෂාව වැඩිපුර භාවිතා කරන පිරිස සහ බහුතර සිංහල භාවිතා කරන පිරිස අතර අන්තර් සංස්කෘතිකමය හුවමාරුවක් සිදු කරමින් සබඳතා පුළුල් කිරීම ද මෙහි එක් අරමුණකි.

මූල්‍යමය දායකත්වය ලබාදෙමින් අධ්‍යයන කටයුතු කරන්නට යම් ශක්තියක් ඇති ඉහළ පෙළේ සිසුන්ගෙන් ලැබෙන මුදල් දායකත්ව භාවිතා කර වැඩමුළුවලට සහභාගි වීමට කැමැත්තෙන් පසුවන නමුත් ඒ සඳහා ආර්ථික ශක්තියක් නැති අය සඳහා ද සහභාගිත්වයට ඉඩ පහසුකම් ලබාදීමට සංස්කෘතික සමාජය මෙහිදී උත්සාහ දරයි.

"මෙම වැඩමුළුව හරහා ආරම්භ කරන කාර්යභාරය තුළ සියලු කලා සහ සංස්කෘතික අංග පිළිබඳ නිවැරදි දැනුම ලබාදීමට ගුරු පිරිසක් පුහුණු කිරීම අපේ එක් අරමුණක්. මෙයට විවිධ කලා අංශයන්හි ප්‍රවීණ සහ දක්ෂ සම්පත්දායකයන් බොහෝ ප්‍රමාණයක් සම්බන්ධ වී සිටිනවා."

90 දශකයට පෙර කලාවට අවතීර්ණ වූ පිරිස කලාව සමඟ ජීවත් වූ ආකාරය වර්තමානයට වඩා වෙනස් ස්වරූපයක් උසුලයි. ඔවුන් කලා ක්ෂේත්‍රයේ ප්‍රවීනයන් සමග කටයුතු කළ ආකාරය සහ කලාව කෙරෙහි දැක්වූ දැනුවත්භාවය, වත්මන් පරපුර ප්‍රවීණයන් සමඟ ක්‍රියා කරන ආකාරය සහ ඔවුන් සතු දැනුවත් භාවය තුළ බොහෝ වෙනස්කම් පවතී. ඒ වෙනස තුලනය කළ හැකි ආකාරය පිළිබඳ සිදුකළ විමර්ශනයක් මගින් සූරිය විලේජ් හරහා සිදුවන නාට්‍ය වැඩමුළුව පිළිබඳ මූලික සංකල්පය බිහි වී තිබේ. ඉංග්‍රීසි කලා නිර්මාණ තුළ වන දියුණු ශිල්පීය කුසලතා සිංහල නාට්‍ය කලාව තුළට අවතීර්ණ කර ගැනීමද මෙහිදී වැඩි අවධානයක් යොමුවී තිබේ.

" ඉංග්‍රීසි කලාව තුළ ඇති ඉහළ ගුණාත්මක භාවය, වින්දනය කරන පුද්ගලයාගේ මනෝභාවයන් වෙනස් කරනවා. උදාහරණයක් ලෙස රෝමියෝ ජුලියට් කියවූ පුද්ගලයකු ආදරය කරන ආකාරය සහ එය නොකිය වූ පුද්ගලයකු ආදරය කරන ආකාරය එකිනෙකට වෙනස්. මිනිසාගේ ප්‍රේමණීය බව හා සියලු භාවාත්මක චින්තනයන් උද්දීපනය කිරීමේ අපූරු හැකියාවක් ඉංග්‍රීසි කලාකෘති තුළ අන්තර්ගත වී තිබෙනවා. බහුතර ප්‍රජාව තුළ ඉහළ පන්තිය තුළ නොමැති මහ පොළොවේ යථාර්ථය පිළිබඳ අත්දැකීම් සම්භාරයක් තිබෙනවා. ඔවුන්ගේ සියලු හැඟීම් තීරණය කරන්නේ ඒ අත්දැකීම් මතයි. අප විසින් සිදුකරන මේ සංස්කෘතික හුවමාරුවේ දී චිත්තවේග සහ මනෝභාවයන් උද්දීපනය කරන සාහිත්‍ය සහ කලාවත් යථාර්ථයත් එකිනෙකට සංසරණය කිරීමක් සිදු වනවා. ඒ ඔස්සේ මේ දෙපිරිසට ම සිය දෘෂ්ටිකෝණයන් සහ ජීවන රටා පිළිබඳ වෙනදා නොතිබූ පුළුල් සහ පෘථුල අවබෝධයක් ලැබෙනවා."

 

 

දිල්රූ ජයසේකර

ඡායාරූපය

ටෙනිසන් එදිරිසිංහ

නව අදහස දක්වන්න