කටුනායක ජාත්‍යන්තර ගුවන් තොටුපළේ දී සංචාරකයන්ට සිදුවන අක්‍රමිකතා හා අකටයුතුකම් නතර කිරීමේ අරමුණින් සංචාරක කුළි රථ සේවාව විධිමත් කෙරේ.
ජනාධිපති ගෝඨාභටය රාජපක්ෂ මහතාගේ උපදෙස් පරිදි මෙම පියවර ගැනෙන බව කාර්මික අපනයන, ආයෝජන ප්‍රවර්ධන, සංචාරක හා ගුවන් සේවා ඇමති ප්‍රසන්න රණතුංග මහතා පවසයි.
ඇමති ප්‍රසන්න රණතුංග මහතා සහ ගුවන් තොටුපල සංචාරක මාර්ගොපදේශක රියදුරු සංගමයේ නියෝජිතයන් අතර මේ සම්බන්ධ විශේෂ සාකච්ඡාවක් පසුගියදා කාර්මික අපනයන, ආයෝජන ප්‍රවර්ධන සංචාරක හා ගුවන් සේවා අමාත්‍යංශයේ දි පැවැත්විණ.
ඇමතිවරයා පැවසුවේ ,ජනාධිපති ගෝඨාභය රාජක්ෂ මහතා කටුනායක ගුවන් තොටුපළේ කළ සාකච්ඡාවේදි මේ සම්බන්ධයෙන් විශේෂ අවධානය යොමු කළ බවයි. සංචාරකයන් අපහසුතායට පත් වීම සහ සේවා සැපයීම් වල දී සිදුවන අවභාවිත වැළැක්වීමට පියවර ගන්නා බවත්, ඒ සදහා සංචාරක මාර්ගෝපදේශකයන් සහ සංචාරක රියදුරන් ලියාපදංචි කර ඔවුන්ට ජාත්‍යන්තර මට්ටමේ පුහුණුවක් සහ සහතික පත්‍රයක් ලබාදෙන බවත්, ජනාධිපතිවරයාගේ රට හදන සෞභාග්‍යෙය් දැක්ම වැඩපිළිවෙලේද ප්‍රධාන පොරොන්දුවක් වන බවත් ඇමතිවරයා කීවේය. සංචාරකයන් දිවයිනට පැමිණීමේ දී ඔවුන් මුහුණ දෙන විවිධ අකටයුතුකම් පිළිබද තොරතුරු රැසක් තමන්ට ලැබී ඇතැයි පෙන්වා දුන් ඇමතිවරයා ,මෙම සංචාරක මාර්ගෝපදේශ රියදුරන් නියාමනය කිරිමේ වැඩපිළිවෙලක් ඉදිරියේ දී ක්‍රියාත්මක කරන බව කීවේය.
මෙම සංගමයේ ලේකම් අසංක ගොඩකුඹුර මහතා සදහන් කළේ, සංචාරක කුලී රථ රියදුරන් පසුගිය රජය සමයේ අයාලේ යන තත්ත්වයකට පත් කර තිබු බවයි. පසුගිය එජාප ආණ්ඩුව විසින් ගුවන් තොටුපළට පැමිණීමේ පර්යන්තයේ තිබු සංචාරක කවුළු 04 ක් තම පක්ෂයේ මැරයන්ට ලබා දුන් බව පෙන්වා දුන් ගොඩකුඹුර මහතා මේ නිසා සංචාරක කුලි රථ සේවය ප්‍රමිතියෙන් තොර සේවාවක් බවට පත් වු බව ද කීවේය.
ඇමති ප්‍රසන්න රණතුංග මහතා කීවේ ,ඉදිරියේදි මෙම සේවාවේ නිරත අයට විශේෂ නිල ඇදුමක්, හැදුනුම්පතක්, ගුවන් තොටුපළට පැමිණීමේ හා පිටවිමේ විශේෂ අවසර පත්‍රයක්, සංචාරකයන්ගෙන් අයකරන නිශ්චිත මිල ක්‍රමයක් හදුන්වා දෙන බවයි. මෙම ව්‍යාපාරයේ නිරත වාහන වෙන ම හදුනාගැනීමට පහසු වන පරිදි සන්නාමකරණය (Brand) කිරීමට ද අපේක්ෂා කරන බව ඇමතිවරයා කීවේය.
ඊට අමතරව මෙම වාහන වල ප්‍රමිතිය මාසිකව පරික්ෂා කිරීමටත් එමෙන් ම මෙම වෘත්තියේ නිරත රියදුරන් පුහුණු කිරිමේ වැඩ පිළිවෙලක් ආරම්භ කිරීමට ද සැලසුම් කර ඇති බව ඇමතිවරයා කිවේය.
නිමල් රාජපක්ෂ
නව අදහස දක්වන්න