නැවතත් කොවිඩ් අවදානමක් තිබෙනවා | දිනමිණ

නැවතත් කොවිඩ් අවදානමක් තිබෙනවා

වෛද්‍ය අන්වර් හම්දානි

කොවිඩ් 19 වයිරසය ගෝලීයව තුරන්ව නැතිකම හේතුවෙන් මෙරට නැවතත් වයිරසය ව්‍යාප්ත වීමේ අවදානමක් තිබෙන බව සෞඛ්‍ය අමාත්‍යාංශයේ කොවිඩ් 19 සම්බන්ධීකාරක වෛද්‍ය අන්වර් හම්දානි මහතා ‘දිනමිණ‘ට ඊයේ (03) ප්‍රකාශ කළේය.

මේ දිනවල පවතින තත්ත්වය අනුව පැහැදිලිවම කොවිඩ් ආසාදිතයන්ගේ අඩුවක් පවතින බවත් ආසාදිතයන් වාර්තා වීම අඩු වුවද රෝගය ව්‍යාප්ත වීමේ අවදානමක් පවතින බවත් ඒ මහතා පැවසුවේය.

ජනතාව ඒකරාශී වීමේ අවස්ථාවන් මේ දිනයන්හි ඉහළ ගොස් ඇතැයි ද, පුද්ගලයන් ඒකරාශී වීමේදී ඒ අතුරින් එක් පුද්ගලයකුට හෝ වයිරසය පැවතියහොත් පුද්ගලයන් රැසකට ව්‍යාප්ත විය හැකි යැයි ද හෙතෙම පැවසීය.

කොවිඩ් වයිරස් අවදානමෙන් මිදීම සඳහා මුව ආවරණ පැලඳීම ඇතුළු කොවිඩ් මර්දන සෞඛ්‍ය ආරක්ෂිත ක්‍රමවේද අනුගමනය කළ යුතු යැයි ද ඔහු කීය.

රටේ පවතින ආර්ථික අර්බුදය ඇතුළු ගැටලු හේතුවෙන් කොවිඩ් වයිරසය සම්බන්ධයෙන් ජනතාවට ක්‍රමක්‍රමයෙන් අමතක වීම සිදුව ඇති බව ද හෙතෙම කියා සිටියේය.

මෙරටින් ආසාදිතයන් 663,408ක් මේ වන විට වාර්තා වී ඇති බවත් කොවිඩ් මර්දන එන්නත්කරණය හේතුවෙන් ආසාදිතයන් වාර්තා වීම මේ වන විට පැහැදිලි ලෙසම අවම වී ඇති බවත් ඒ මහතා පැවසුවේය.

සන්ධ්‍යා කරුණාරත්න

නව අදහස දක්වන්න