චීන අගමැතිගේ කතාව එවෙලේම සිංහලෙන් ! | දිනමිණ

චීන අගමැතිගේ කතාව එවෙලේම සිංහලෙන් !

මහාචාර්ය ගුණපාල මලලසේකර

ශ්‍රී ලංකාවේ ජනිත වුණු විශිෂ්ට පඬිරුවනක් ලෙස මහාචාර්ය ගුණපාල මලලසේකර මහතා හැඳින්විය හැකිය. එතුමා විශිෂ්ට රාජ්‍ය තාන්ත්‍රිකයෙකි; භාෂා පරිවර්තකයෙකි; කෘතහස්ත ලේඛකයෙකි. ලංකාවේ පමණක් නොව; සමස්ත ලෝකයම පිළිගත් ප්‍රාඥයෙකි. රාජ්‍ය තාන්ත්‍රිකයකු ලෙස සේවය කරන කාලයේ ඔහු සම්බන්ධයෙන් කියැවුණු රස කතා රාශියකි.

1957 වර්ෂයේ, එස්.ඩබ්ලිව්.ආර්.ඩී. බණ්ඩාරනායක මහතා ලක්දිව අග්‍රාමාත්‍ය ධුරය දරන සමයේ ගුණපාල මලලසේකර මහතා රුසියාවේ තානාපතිවරයා ලෙස කටයුතු කළේය. එම ධුරය දරන අතර මලලසේකර මහතා නිවාඩුවක් ගෙන ශ්‍රී ලංකාවට පැමිනුණේය. එම කාල වකවානුවේදී එවකට චීන අග්‍රාමාත්‍ය චෞ එන් ලායි මහතා ශ්‍රී ලංකාවේ නිල සංචාරයක් සඳහා පැමිණියේය. එතුමා පිළිගැනීම වෙනුවෙන් කොළඹ නිදහස් මන්දිර ශාලා පරිශ්‍රයේ උත්සවයක් සංවිධානය කර තිබුණේ අග්‍රාමාත්‍ය එස්.ඩබ්ලිව්.ආර්.ඩී. බණ්ඩාරනායක මහතා ඇතුළු ප්‍රභූන්ගේ සහභාගීත්වයෙනි. එම කාලයේ නිවාඩු ලබා මෙරටට පැමිණ සිටි ගුණපාල මලලසේකර මහතාට උත්සව සභාවේ භාරධුර කාර්යයක් පැවරුණි. ඒ, චීන අග්‍රාමාත්‍යතුමා සිදු කරන කතාවේ සිංහල පරිවර්තන කතාව සිදු කිරීමටය.

විශාල ජනකායක් මෙන්ම ප්‍රභූන් රැසක් එක්රොක් වී සිටි සභාවේ මේ කාර්යය ඉටු කිරීමට ගුණපාල මලලසේකර මහතා නොපැකිළව ඉදිරිපත් වූයේය. අගමැති බණ්ඩාරනායක මහතාගේ පිළිගැනීමේ කතාවෙන් අනතුරුව චීන අග්‍රාමාත්‍ය චෞ එන් ලායි මහතා සිය කතාවට මුලපිරුවේය. චීන අගමැතිතුමා සිය කතාව වෙනුවෙන් මයික්‍රෆෝනය ඉදිරියෙන් සිට ගනිද්දී, ඊට යාබදින් සිටුවා තිබූ මයික්‍රෆෝනය ඉදිරියේ ගුණපාල මලලසේකර මහතාද සිට ගත්තේය. මිනිත්තු 20ක් පමණ චෞ එන් ලායි අගමැතිතුමාගේ කතාව සිදු කෙරුණි. රැස්ව සිටි පිරිසගේ අත්පොළසන් මැද ගුණපාල මලලසේකර මහතාද පරිවර්තන කතාවට ප්‍රවේශ වූයේය.

ගුණපාල මලලසේකර මහතා චෞ එන් ලායි මහතා සිදු කළ කතාවේ සිංහල පරිවර්තනය මනාව සිදු කර අවසන් කළේය. මලලසේකර මහතා කතාව අවසන් කරන තුරු සිය අසුනට නොගොස් මයික්‍රෆෝනය අසලටම වී, තමා සිදු කළ කතාවේ සිංහල පරිවර්තනය සිදු කරන මලලසේකර මහතා දෙස චෞ එන් ලායි මහතාද ආසාවෙන් යුතුව බලා සිටියේය. මලලසේකර මහතා කතාව අවසන් කරන විට රැස්ව සිටි පිරිසගේ අත්පොළසන් නාදයෙන් සභාව ගිගුම් දුන්නේය. බණ්ඩාරනායක අගමැතිතුමාද ඉහේ මලක් පිපුණාක් ‍මෙන් සතුටින් පසු විය. මලලසේකර මහතා පරිවර්තන කතාව නිම කොට බණ්ඩාරනායක මහතාගේ අසුනට යාබද අසුනේ වාඩි වූයේය. චෞ එන් ලායි මහතා බණ්ඩාරනායක මහතාට අනෙක් පසින් වූ අසුනේ වාඩි වූයේය. එහිදී බණ්ඩාරනායක අගමැතිතුමා, මලලසේකර මහතාගේ අත් දෙකෙන්ම අල්ලාගෙන ප්‍රකාශ කළේ “බොහොම හොඳයි මලලසේකර, ඔබ චීන භාෂාව මෙතරම් දන්නෙහි යැයි මම මේ වන තුරු දැනගෙන හිටියේ නැහැ. ඇත්තටම ඔබ එය බොහෝම හොඳින් සිදු කළා” යනුවෙනි.

එවිට ගුණපාල මලලසේකර මහතා කළ ප්‍රකාශයෙන් බණ්ඩාරනායක අගමැතිවරයා විස්මයෙන් විස්මයට පත් වී ගියේය.

“මොන චීන භාෂාවක්ද අගමැතිතුමනි, මං චීන භාෂාවක් දන්නේ නැහැ. මා මුලින් සිතා ගෙන උන්නේ චීන අගමැතිතුමාගේ කතාවේ ඉංග්‍රීසි පිටපතක් හෝ මට ලැබෙයි කියායි. ඒත් එහෙම දෙයක් සිදු වුණේ නැහැ. මම ඉතින් එතුමා මෙතැනට ඇවිත් මේ වගේ කතාවක් කරයි කියලා හිතාගෙන අපේ රටේ ගෞරවයත් බේරාගෙන ඒ කතාව සිදු කළා” යනුවෙන් මලලසේකර මහතා කියා සිටියේය.

ගුණපාල මලලසේකර මහතාගේ තැනට සුදුසු නුවණ පිළිබඳ පුදුමයට පත් බණ්ඩාරනායක අගමැතිවරයා මලලසේකර මහතා වෙත යොමුව “මලලසේකර තමයි දවසකටවත් පුත්‍රයා” යනුවෙන් කියා සිටියේය. ඒ, අතිශය සතුටු සිතිනි.

පසිඳු මිහිරාන් රැටියල

නව අදහස දක්වන්න