අද සිට ජූලි 10 තෙක් ඉන්ධන අත්‍යවශ්‍ය සේවාවලට පමණයි | දිනමිණ

අද සිට ජූලි 10 තෙක් ඉන්ධන අත්‍යවශ්‍ය සේවාවලට පමණයි

පෞද්ගලික වාහනවලට තෙල් නෑ

අද (28) සිට ලබන මස (10) වැනිදා දක්වා අත්‍යවශ්‍ය සේවා සඳහා පමණක් ඉන්ධන නිකුත් කිරීමට රජය තීරණය කර ඇත.

ඒ අනුව,සෞඛ්‍ය, ආරක්ෂක,විදුලිබල, අපනයන කර්මාන්ත ආදී ක්ෂේත්‍ර සඳහා පමණක් අද සිට ලබන 10 වැනිදා දක්වා ඉන්ධන නිකුත් කරන බව ප්‍රවාහන, මහාමාර්ග හා ජනමාධ්‍ය ඇමැති ආචාර්ය බන්දුල ගුණවර්ධන මහතා පවසයි.

රජයේ ප්‍රවෘත්ති දෙපාර්තමේන්තුවේ ඊයේ (27) පැවැති විශේෂ ප්‍රවෘත්ති සාකච්ඡාවකදී ඇමැතිවරයා මේ බව කියා සිටියේය.

ඉන්ධන පිරවුම්හල් වලින් පෞද්ගලික අංශයේ වාහන සඳහා මේ කාලය තුළ ඉන්ධන නිකුත් නොකරන බවද ඔහු කීවේය.

අත්‍යවශ්‍ය සේවා සඳහා ඉන්ධන නිකුත් කිරීම ලංගම ඩිපෝ සහ ත්‍රිවිධ හමුදා ඉන්ධන පිරවුම්හලවලින් සිදුකරන බවද හෙතෙම සඳහන් කළේය.

රට තුළ පැනනැගී ඇති ඉන්ධන අර්බුදය සම්බන්ධයෙන් ඊයේ (27) පැවති කැබිනට් රැස්වීමේදී දීර්ඝ වශයෙන් සාකච්ඡා වූ බවත්,ඒ අනුව අත්‍යවශ්‍ය සේවා සඳහා පමණක් ඉන්ධන නිකුත් කිරීමට එහිදී තීරණය කළ බවත් හෙතෙම සඳහන් කළේය.

මහින්ද අලුත්ගෙදර

නව අදහස දක්වන්න