ලෝක ළමා දිනයට ධීවර රාජ්‍ය අමාත්‍යාංශයෙන් වැඩසටහනක් | දිනමිණ

ලෝක ළමා දිනයට ධීවර රාජ්‍ය අමාත්‍යාංශයෙන් වැඩසටහනක්

ලෝක ළමා දිනය යෙදෙන ඔක්තෝබර් 01වැනිදා, ධීවර ජනාවාස ආශ්‍රිතව සිටින සෙමින් මනස වැඩෙන (විශේෂ අවශ්‍යතා සහිත) දරුවන්ගේ කුසලතා සංවර්ධනය හා එම දරුවන් හට ඇගයීම් ප්‍රදානයක් සිදුකිරීමේ වැඩසටහනක් පැවැත්වීමට ධීවර රාජ්‍ය අමාත්‍යාංශය කටයුතු යොදා ඇත. 
 
'රළ පෙළ දිනන දරුවෝ' නමින්වන මෙම වැඩසටහන, ධීවර රාජ්‍ය ඇමැති පියල් නිශාන්ත ද සිල්වා මහතාගේ සංකල්පයක් මත ,  ධීවර ඇමැති ඩග්ලස් දේවානන්දා මහතාගේ ප්‍රධානත්වයෙන්‍ඔක්තෝබර් 01 දා උදෑසන 8.00ට බේරුවල මොරගල්ල වෙරළ තීරයේ  (Eden Hotel අසල) පැවැත්වෙන අතර එයට  ධීවර ජනාවාස ආශ්‍රිතව  සිටින,සෙමින් මනස වැඩෙන දරුවන් 300කට ආසන්න පිරිසත් සහභාගී වෙයි.
 
ශ්‍රී ලංකාව තුළ සෙමෙන් මනස වැඩෙන දරුවන් ලක්ෂ හතකට අධික සංඛ්‍යාවක් ඇති අතර පන්ති කාමරයෙන් තුළින් දිගුකාලීන අධ්‍යාපනයක් ලබා ගැනීමට වඩා ක්‍රීඩා හා සෞන්දර්ය ක්‍රියා මානසික ශක්තිය සැලකිය යුතු ලෙස වැඩි දියුණු කරගත හැකිබව වෛද්‍ය විශේෂඥයෝ පවා ප්‍රකාශ කර ඇත. 
 
මේ තත්වය සැලකිල්ලට ගෙන  ලෝක ළමා දිනය වඩාත් අර්ථවත් කිරීමේ  අරමුණෙන්'රළ පෙළ දිනන දරුවෝ' වැඩසටහන් ආරම්භ කරන බව ධීවර රාජ්‍ය ඇමැති  පියල් නිශාන්ත ද සිල්වා මහතා අද(29) රජයේ ප්‍රවෘත්ති දෙපාර්තමේන්තුවේ පැවැති මාධ්‍ය හමුවේදී  පැවැසීය.
 
'සෙමෙන් මනස වැඩෙන දරුවන් වෙන්වෙන් ශරීර සුවතා වැඩසටහන්,ඔවුන්ගේ රංග කුසලතාවන් වර්ධනය කෙරෙන වැඩසටහන්, ඔවුන්ගේ චිත්‍ර නිර්මාණ, ගායනා සහ වැලි නිර්මාණ මෙදින මොරගල්ල වෙරළ තීරයේදී එළි දැක්වේ. ඔවුන් වෙනුවෙන් සෞඛ්‍ය සායන වැඩසටහන් පැවැත්වීමද මෙදින සිදු කෙරේ.
 
'රළ පෙළ දිනන දරුවෝ වැඩසටහන සාර්ථක කර ගැනීමට කළුතර දිස්ත්‍රික් ලේකම් කාර්යාලය ,බේරුවල ප්‍රාදේශීය සභාව සහ බේරුවල පොලිස් ස්ථානය එදින අපට සහයෝගය ලබා දෙනවා' යැයි රාජ්‍ය ඇමැතිවරයා මෙම මාධ්‍ය හමුවේදී කරුණු අනාවරණය කළේය. මෙම අවස්ථාවට ධීවර දෙපාර්තමේන්තුවේ අධ්‍යක්ෂ ජනරාල් සුසන්ත කහවත්ත  සහ රජයේ ප්‍රවෘත්ති අධ්‍යක්ෂ ජනරාල් දිනිත් චින්තක කරුණාරත්න මහත්වරුද එක්ව සිටියහ.
 
(බුද්ධිකා ඉඹුලාන)
 

නව අදහස දක්වන්න