ශ්‍රී ලංකා - පාකිස්තාන සබඳතා තවදුරටත් ශක්තිමත් කර වැඩි දියුණු කිරීමට කැප වෙනවා

පාකිස්තාන ජාතික දින සමරු උත්සවයේදී කෘෂිකර්ම ඇමැති මහින්ද අමරවීර කියයි

අදට (23) යෙදී තිබෙන පාකිස්තාන ජාතික දිනය නිමිත්තෙන් ශ්‍රී ලංකාවේ පාකිස්තාන තානාපති කාර්යාලය විසින් සංවිධාන කළ සමරු උත්සවයක් පෙරේදා (21) බණ්ඩාරනායක ජාත්‍යන්තර සම්මන්ත්‍රණ ශාලාවේදී පැවැත්විණි.

අමාත්‍ය මණ්ඩලයේ තීරණයක් පරිදි, කෘෂිකර්ම ඇමැති මහින්ද අමරවීර මහතා ජනාධිපති වෙනුවෙන් එහි ප්‍රධාන ආරාධිතයා ලෙස සහභාගි විය.

එහිදී ඇමැතිවරයා උත්සව සභාව හමුවේ පැවැසුවේ වසර 2023, ශ්‍රී ලංකාව සහ පාකිස්තානය රාජ්‍ය තාන්ත්‍රික සබඳතා පිහිටුවීමේ 75 වැනි සංවත්සරයේ සන්ධිස්ථානය සටහන් කරන බවයි.

අප දෙරට අතර බහුවිධ සබඳතාව පසුගිය කාලසීමාවේ ශක්තිමත්ව වර්ධනය වී ඇති අතර නිරන්තරයෙන් ඉහළ මට්ටමේ අදහස් හුවමාරු කර ගැනීම අපගේ රාජ්‍ය තාන්ත්‍රික සබඳතාවල තවත් ලක්ෂණයක් බවද ඇමැතිවරයා මෙහිදී ප්‍රකාශ කළේය.

එහිදී ඇමැතිවරයා මෙසේද කීය.

“පාකිස්තාන ඉස්ලාමීය ජනරජයේ පාකිස්තාන දින සැමරුම් උලෙළට ශ්‍රී ලංකා ජනාධිපතිවරයා සහ රජය නියෝජනය කිරීමට ලැබීම ඉමහත් සතුටක්.

“ජනාධිපති රනිල් වික්‍රමසිංහ මහතා වෙනුවෙන්, ශ්‍රී ලංකා රජය සහ ජනතාව වෙනුවෙන්, මේ පිළිබඳව ජනාධිපති ආචාර්ය අරිෆ් අල්වි මහතාටත්, රජයටත්, පාකිස්තානයේ ජනතාවටත් අපගේ උණුසුම් ප්‍රණාමය සහ අවංක සුබ පැතුම් පිරිනමනවා. පාකිස්තානය සහ ලංකාව ගන්ධාර යුගය දක්වා දිවෙන ඓතිහාසික සබඳතා සහ හවුල් සංස්කෘතික සබඳතා භුක්ති විඳියි.

“1948 දී රාජ්‍ය තාන්ත්‍රික සබඳතා පිහිටුවීමේ සිට දෙරට අතර ද්විපාර්ශ්වික සබඳතා ගොඩනැඟී ඇත්තේ මේ හවුල් ඓතිහාසික සම්බන්ධතා, අන්‍යෝන්‍ය වශයෙන් ප්‍රයෝජනවත් සහයෝගිතාව සහ මිනිසුන් අතර සම්බන්ධතා මතයි. එතැන් සිට, ද්විපාර්ශ්වික මිත්‍රත්වයේ සහ සහයෝගිතාවයේ අපගේ බැඳීම්, හවුල් වටිනාකම් සහ රුචිකත්ව මත පදනම් වූ කලාපීය සහ බහුපාර්ශ්වික මට්ටම් අඛණ්ඩව වර්ධනය වී තිබෙනවා.

“2023 වසරේ අප දෙරට රාජ්‍ය තාන්ත්‍රික සබඳතා පිහිටුවීමේ 75 වැනි සංවත්සරයේ සන්ධිස්ථානය සනිටුහන් කරයි. අප දෙරට අතර බහුවිධ සබඳතාව පසුගිය කාලසීමාවේ ශක්තිමත්ව වර්ධනය වී ඇති අතර නිතර නිතර ඉහළ මට්ටමේ අදහස් හුවමාරු කර ගැනීම අපගේ රාජ්‍ය තාන්ත්‍රික සබඳතාවල තවත් ලක්ෂණයක්. මෑතක දී පාකිස්තානයේ විදේශ කටයුතු ඇමැතිනි එම්. හිනා රබානි ශ්‍රී ලංකාවේ 75 වන නිදහස් දින උත්සවයට ගෞරවනීය ආරාධිත අමුත්තියක ලෙස සහභාගි වුවා. අතීතයේ සහ වර්තමානයේ අප රටේ අභියෝගාත්මක කාලවලදී ද්විපාර්ශ්වික සහ බහුපාර්ශ්වික මට්ටමින් පාකිස්තානය විසින් ලබා දුන් අඛණ්ඩ සහයෝගය පිළිබඳව ශ්‍රී ලංකාව වෙනුවෙන් මගේ කෘතඥතාව පළ කර සිටිනවා. ශ්‍රී ලංකාව සහ පාකිස්තානය අතර ආරක්‍ෂක අංශයේ සහයෝගිතාව පුහුණුවීම් සහ ධාරිතා වර්ධනය සහ බුද්ධි තොරතුරු හුවමාරු කර ගැනීම ඇතුළු අන්‍යෝන්‍ය වශයෙන් උනන්දුවක් දක්වන ක්ෂේත්‍ර කීපයක් ආවරණය කරමින් අඛණ්ඩව වර්ධනය වුණා.

“ශ්‍රී ලංකා සහ පාකිස්තානය අතර වෙළෙඳාම මේ කාලයේ වර්ධනයක් පෙන්නුම් කර තිබෙනවා. වසර 2005 දී පාකිස්තානය සහ ශ්‍රී ලංකාව නිදහස් වෙළෙඳ ගිවිසුමක් අත්සන් කරන ලද අතර එය පාකිස්තානය විසින් පළමුවරට අත්සන් කරන ලදී. දෙරට අතර ද්වීපාර්ශ්වික වෙළෙඳාම තවදුරටත් වැඩිදියුණු කිරීමේ දැවැන්ත හැකියාවක් පවතී.

“ශ්‍රී ලංකාව ඉන්දියන් සාගර කලාපයේ වැදගත් මූල්‍ය සැපයුම් සහ ව්‍යාපාරික කේන්ද්‍රස්ථානයක් බවට පරිවර්තනය වන බැවින්, පාකිස්තාන සමාගම් රටේ නිෂ්පාදන සහ සැකසුම් පහසුකම් පිහිටුවීම ගැන සලකා බලනු ඇතැයි අප බලාපොරොත්තු වෙනවා. අප දෙරට අතර ද්විපාර්ශ්වික සබඳතා ශක්තිමත් කිරීම සඳහා අධ්‍යාපනය වැදගත් සාධකයක් ලෙස පවතී. පාකිස්තානය - ශ්‍රී ලංකා උසස් අධ්‍යාපන සහයෝගිතා වැඩසටහන යටතේ, පාකිස්තානය ශ්‍රී ලංකාවට වාර්ෂිකව ශිෂ්‍යත්ව ගණනාවක් ප්‍රදානය කරමින් සිටින අතර එමඟින් ශ්‍රී ලංකාවේ සිසුන්ට වෛද්‍ය, තොරතුරු තාක්‍ෂණය, ඉංජිනේරු, මූලික සහ යන ක්ෂේත්‍රවල උසස් අධ්‍යාපනය හැදෑරීමට අගනා අවස්ථා උදාකර දී තිබෙනවා.

“අප දෙරට අතර මිත්‍රත්වයේ සහ සහයෝගිතාවයේ බැඳීම් ඉදිරි කාලපරිච්ඡේදයේ දී අඛණ්ඩව පුළුල් වී වර්ධනය වනු ඇතැයි මම තරයේ විශ්වාස කරනවා. ශ්‍රී ලංකා - පාකිස්තාන ද්විපාර්ශ්වික හවුල්කාරිත්වය තවදුරටත් ශක්තිමත් කිරීම සඳහා උමාර් ෆාරුක් බුර්කි මහතාගේ නොපසුබට උත්සාහය ඇත්තෙන්ම ප්‍රශංසනීයයි” ද ඇමැතිවරයා මෙහිදී පැවැසීය.

ශ්‍රී ලංකා හිටපු ජනාධිපතිවරුන් වන මහින්ද රාජපක්ෂ සහ මෛත්‍රිපාල සිරිසේන, කථානායක මහින්ද යාපා අබේවර්ධන මහත්වරුන් ඇතුළු පිරිසක් මේ අවස්ථාවට එක්ව සිටියහ.

බුද්ධිකා ඉඹුලාන