රිෂාඩ්- හිස්බුල්ලා-අසාද් සාලිට ස්ථාපිත පොලිස් කමිටුවට තවම එක පැමිණිල්ලයි | දිනමිණ

රිෂාඩ්- හිස්බුල්ලා-අසාද් සාලිට ස්ථාපිත පොලිස් කමිටුවට තවම එක පැමිණිල්ලයි

ගයාන් කුමාර වීරසිංහ

හිටපු ඇමැති රිෂාඩ් බදියුදීන් ,හිටපු ආණ්ඩුකාරවරුන් වන ඒ.එල්.ඒ.එම්.හිස්බුල්ලා සහ අසාද් සාලි යන මහත්වරුන්ට එරෙහිව පැමිණිලි ඉදිරිපත් කිරීමට පොලිස් මූලස්ථානයේ ස්ථාපිත කළ කමිටුවට ඊයේ (05) වන විට ලැබී තිබුණේ එක් පැමිණිල්ලක් පමණි.

රිෂාඩ් බදියුදීන් මහතාට එරෙහිව එම පැමිණිල්ල ඉදිරිපත්කර ඇත්තේ සමස්ත ලංකා ආපන ශාලා හිමියන්ගේ සංගමයේ සභාපති අසේල සම්පත් මහතා විසිනි.

රිෂාඩ් බදියුදීන්, ඒ.එල්.ඒ.එම්.හිස්බුල්ලා සහ අසාද් සාලි යන මහත්වරුන්ට එරෙහිව ඇති පැමිණිලි සාක්ෂි සහිතව ඉදිරිපත් කිරීමට වැඩ බලන පොලිස්පති සී.ඩී. වික්‍රමරත්න මහතාගේ උපදෙසින් පොලිස් මූලස්ථානයේ මෙම කමිටුව ස්ථාපිත කරන්නේ පෙරේදා (04) ය.

මූල්‍ය අපරාධ විමර්ශන කොට්ඨාසයේ අධ්‍යක්ෂ ජේ්‍යෂ්ඨ පොලිස් අධිකාරී පී.කේ.ඩී.ප්‍රියන්ත මහතාගේ ප්‍රධානත්වයෙන් යුත් එම කමිටුවේ සෙසු සාමාජිකයන් වන්නේ පොලිස් නීති කොට්ඨාසයේ අධ්‍යක් පොලිස් අධිකාරී නීතීඥ ජාලිය සේනාරත්න සහ සංවිධානාත්මක අපරාධ විමර්ශන කොට්ඨාසයේ අධ්‍යක්ෂ පොලිස් අධිකාරී ප්‍රියන්ත ලියනගේ යන මහත්වරුන්ය.

සියළු පැමිණිලි ලබන 12 වෙනිදා දක්වා පෙරවරු 8.00 සිට පස්වරු 4.00 දක්වා භාරගන්නා බව පොලිස් මාධ්‍ය ප්‍රකාශක පොලිස් අධිකාරී නීතීඥ රුවන් ගුණසේකර මහතා සදහන් කළේය. ඉදිරිපත් කරන පැමිණිලි වලට අදාල කරුණු සනාත කිරීමට ලිඛිත හෝ වෙනත් සාක්ෂි ඉදිරිපත් කරන ලෙස ද රුවන් ගුණසේකර මහතා සදහන් කරයි.

අදහස් 1ක් ඇත

නව අදහස දක්වන්න