කල් ඉකුත් වූ චින්තනයෙන් පිරි දේශපාලනඥයන්, පාසල් සිසුන්ට හා ගුරුවරුන්ට ටැබ් පරිගණක ලබා දීමේ වැඩසටහනට පහර ගසමින් සිය ළිංමැඩි මානසිකත්වය හා අඳබාල බව ප්‍රදර්ශනය කිරීම ලැජ්ජා සහගත ක්‍රියාවක් බව අධ්‍යාපන ඇමැති අකිල විරාජ් කාරියවසම් මහතා ප්‍රකාශ කරයි.
විසි එක්වැනි සියවසට අදාළ අධ්‍යාපන නිපුණතා සාක්ෂාත් කර ගැනීමට හා ඉගෙනුම්-ඉගැන්වීම් ක්‍රියාවලියට අතිශයින් වැදගත් වන ටැබ් පරිගණක ලබාදීමේ ව්‍යාපෘතිය විවිධ අසාධාරණ විවේචන මගින් කඩාකප්පල් කිරීමට ගෙනගිය කුහක ක්‍රියාමාර්ග හේතුවෙන් එය මෙතෙක් ප්‍රමාද වූ බව පැවසීය. එහෙත් ජනාධිපති, අගමැති හා අමාත්‍ය මණ්ඩලය ටැබ් පරිගණක දිය යුතු බවට ඉකුත් 25 වැනිදා ඓතිහාසික තීන්දුවකට එළැඹිම අධ්‍යාපන ක්ෂේත්‍රය ලැබූ විශාල ජයග්‍රහණයක් බව ද ඇමැතිවරයා සඳහන් කරයි. එම ජයග්‍රහණය ඉවසනු බැරි වූවෝ දැන් විවිධ චෝදනා නඟමින් සිය කුහක මානසිකත්වය පෙන්නුම් කරන බවත් ඇමැතිවරයා සඳහන් කරයි.
පසුගිය රජයේ අධ්‍යාපන අමාත්‍යංශය යම් සාධනීය පියවරක් ගත්තේ නම් විපක්ෂය නියෝජනය කරමින් සිටියදී පවා ඒ හැම අවස්ථාවකදීම කුහකත්වයෙන් තොරව සහයෝගය පළ කරමින් අගය කළ බව මේ විවේචකයන්ට අමතක වීම ගැන තමා කනගාටු වන්නේයැයි ද ඇමැතිවරයා සඳහන් කරයි.
පුද්ගල නාම ප්‍රවර්ධනය කිරීමේ මානසිකත්වයෙන් ජාතික ධනය රුපියල් කෝටි ගණන් වැය කරමින් මහ පාරට පෙනෙන්නට විද්‍යාගාර ගොඩනැඟිලි තැනීම, ඒවා තනා නිම කිරීමට පෙර තවත් විශාල මුදලක් වැය කරමින් උපකරණ මිලදී ගැනීම හා ගුණාත්මකභාවය පිළිබඳ ප්‍රශ්නගත පරිගණක යන්ත්‍ර රුපියල් කෝටි ගණන් වියදම් කර මිලට ගැනීම, දේශපාලන උපක්‍රම වශයෙන් විද්‍යාගාර හා ගොඩනැඟිලි විවෘත කිරීම වැනි කටයුතු කළ ද පසුගිය රජයේ බලධාරීන් පාසල් දරුවන්ගේ මූලික අවශ්‍යතා හිතා මතා අමතක කළ බවත්, එසේ අමතක වූ පාසල් වැසිකිළි-කැසිකිළි හා ජල පහසුකම් ලබා දෙන්නේ වත්මන් රජය බවත් ඇමැතිවරයා අවධාරණය කරයි.
තමා අධ්‍යාපන ඇමැති පදවිය බාර ගැනීමට පෙර විපක්ෂ මන්ත්‍රීවරයකුව සිටියදී අධ්‍යාපන ක්ෂේත්‍රයේ ගැටලු මෙන්ම අඩුපාඩු සම්බන්ධයෙන් දැඩි උනන්දුවක් දැක්වූ බැවින් අමාත්‍ය පදවියට පත් වූ පසු ඒවා එකිනෙක කඩිනමින් විසඳීමට පටන්ගත් බව ද පවසන අමාත්‍යවරයා 'ළඟම පාසල -හොඳම පාසල' වැඩසටහන යටතේ රුපියල් මිලියන 64000ක වියදමින් පාසල් 9345ක් සංවර්ධනය ආරම්භ කළ බව ද පෙන්වා දෙයි. ඒ යටතේ 2015 වසරේ සිට මේ දක්වා පාසල් 3800ක් සඳහා රුපියල් මිලියන 3977 ක් වැයකරමින් සනීපාරක්ෂක පහසුකම් මෙන් ම, රුපියල් මිලියන 147.303 ක් වැය කරමින් පාසල් 860 ක ජල පහසුකම් ද පාසල් 1845කට රුපියල් මිලියන 1417ක් වැය කර විදුලිය ලබා දුන්නේ ද වත්මන් රජය බවද ඇමැතිවරයා අවධාරණය කරයි. වර්තමාන ආණ්ඩුව අධ්‍යාපනයට මේසා විශාල වැඩ කොටසක් ඉටු කළ ද ඒ කිසිවක හෝ සිය නාම පුවරු සවි නොකළ අතර කිසිවක් සිය නමින් නම් නොකළ බවත් පෙන්වා දෙයි. 'ළඟම පාසල - හොඳම පාසල ' වැඩසටහනේ දෙවෙනි අදියර යටතේ ඉදිකළ පාසල් ගොඩනැඟිලි 250ක් මේ මාසයේ දී විවෘත කිරීම සියතට පවරා නොගෙන පළාතේ මැති ඇමැතිවරුනට පැවරීමට තමා කටයුතු කළ බවත් අමාත්‍යවරයා පෙන්වා දෙයි.
මෙවැනි ජයග්‍රහණ ඉවසනු බැරිවූවන් විවිධ ප්‍රකාශ කරමින් සිය පහත් මානසිකත්වය හා කුහකත්වය ප්‍රදර්ශනය කරන බව ද අමාත්‍යවරයා පවසයි.
සත්‍යය පිළිබඳ සොයා නොබලා අහිංසක ජනතාව රැවටීමට එකම බොරුව දිගටම වපුරන ගොබෙල්ස් න්‍යාය ක්‍රියාත්මක කරනවාට වඩා පාසල්වලට ගොස් ඉහත පහසුකම් තිබෙනවාද නැද්ද යන වග සැක හැර ප්‍රායෝගිකවම දැක ගැනීම සඳහා හැකි නම් පැමිණෙන ලෙස විවේචක දේශපාලනඥයන්ට හා ජනමාධ්‍යයන්ට ආරාධනා කරන බවද අමාත්‍යවරයා වැඩිදුර‍ටත් සඳහන් කරයි.
මාධ්‍ය වෙත නිවේදනයක් නිකුත් කරමින් අධ්‍යාපන ඇමැති අකිල විරාජ් කාරියවසම් මහතා මේ බව සඳහන් කරයි.
අදහස් 2ක් ඇත
Education
Education
නව අදහස දක්වන්න