යුද හමුදාවේ දෙදෙනෙක් කුරුණෑගල දී අත්අඩංගුවට | දිනමිණ

යුද හමුදාවේ දෙදෙනෙක් කුරුණෑගල දී අත්අඩංගුවට

කුරුණෑගල පොලිස් වසමේ ගෝවා කොටුව හංදිය අසල දී‍,කුරුණෑගල පොලිස් ස්ථානයේ නිලධාරීන් විසින් යතුරුපැදියකින් ගමන් ගත් සැකකටයුතු පුද්ගලයින් දෙදෙනෙක් අත්අඩංගුවට ගෙන තිබේ.
 
පසුගිය අගෝස්තු 31 වන දා රාත්‍රී 11.40ට පමණ මොවුන් මෙලෙස අත්අඩංගුවට ගෙන ඇතැයි පොලිස් මාධ්‍ය ප්‍රකාශක පොලිස් අධිකාරී රුවන් ගුණසේකර මහතා පැවසීය. 
 
යතුරුපැදියෙන් යමින් සිටි මෙම පුද්ගලයින් දෙදෙනා පොලීසියෙන් නවතා පරීක්ෂා කර තිබේ.
 
එහිදී යතුරුපැදිකරු හැඳ සිටි ජැකට්ටුවට ආවරණය කර ගෙන රැගෙන යමින් තිබූ ටී.56 ගිනි අවියක්, සජීව පතරොම් 10ක් සහිත මැගසීනයක් සමඟ සැකකරුවන් දෙදෙනා අත්අඩංගුවට පත්ව ඇත.
 
මෙසේ අත්අඩංගුවට පත්ව ඇත්තේ, වයස අවුරුදු 46 ක් වු කුලතුංග මුදියන්සේලාගේ තුෂාර චන්දමාල් නැමති දාහිගමුව, කුරුණෑගල ප්‍රදේශයේ පදිංචි බුත්තල යුද හමුදා කඳවුරේ සේවය කරන යුද හමුදා සිවිල් සේවකයෙකි.
 
අනෙක් පුද්ගලයා හංවැල්ල, කුඩාගල්ගමුව ප්‍රදේශයේ පදිංචි වයස අවුරුදු 37 ක් වු කරුණාධිපති දේවලාගේ චමින්ද සිරිජයලත් යන අයෙක් වන අතර යතුරුපැදියේ පසුපැදිකරු වන මෙම පුද්ගලයා නිට්ටඹුව, වතුපිටිවල විජයබා පාබල රෙජිමේන්කුවේ යුද හමුදා සිවිල් සේවකයෙකි.
 
මෙම අත්අඩංගුවට පත් සැකකරුවන්ගේ නිවෙස් ඊයේ(01) දහවල් කුරුණෑගල පොලිස් ස්ථානයේ නිලධාරීන් විසින් පුපුරණ ද්‍රව්‍ය සම්බන්ධයෙන් පුහුණුව ලත් නිල සුනඛයෙකු යොදවා විශේෂ පරීක්ෂාවකට ලක් කර ඇත.
 
එහිදී යතුරුපැදිකරුගේ නිවසේ තිබී තවත් ටී-56 ගිනි අවියක්, ටී - 56 ගිනි අවි පිරිසිදු කිරීමේ කට්ටලයක්, ඉතාලියේ නිෂ්පාදිත වායු රයිපලයක්, අවි සඳහා භාවිතා කරන දුර දක්නයක්, බෝර 12 පතරොම් තුවක්කු සඳහා භාවිතා කරන හිස් පතරොම් කොපු 6 ක්, යුද හමුදා නිලධාරින් භාවිතා කරන පැක් 2ක්, හනස් කට්ටල 1 ක්, බෙල්ට් ඕඩර් 2ක්, පුචස් 2ක්, අවි පටි 4ක්, වතුර බෝතල් 2ක්, හෙල්මට් 1, කළු ඉන පටි 1ක්, කැප් තොප්පි 1ක්, මෙස් ටින් 1ක්, ඔයිල් බෝතල් 1ක්‍, පිස්තෝල අවි මැගසින් දැමීම සඳහා භාවිතා කරන හොස්ටර් 01ක්, නිල මුද්‍රා 1ක් හා උපකරණ දැමීම සඳහා භාවිතා කරන කොළ පැහැති බෑග් 2ක් සොයා ගෙන තිබේ.
 
අත්අඩංගුවට පත් සැකකරුවන් ඊයේ කුරුණෑගල මහේස්ත්‍රාත් අධිකරණයට ඉදිරිපත් කිරීමෙන් පසුව වැඩිදුර පරීක්ෂණ සඳහා පැය 48 ක් රැඳවුම් නියෝග ලබා ගෙන ඇත. අද(02) නැවත කුරුණෑගල මහේස්ත්‍රාත් අධිකරණයට ඉදිරිපත් කිරීමට නියමිතය.
 
කුරුණෑගල පොලීසිය වැඩිදුර විමර්ශන සිදු කරනු ලැබේ.

නව අදහස දක්වන්න