ඉන්දියාව හා ශ්‍රී ලංකාව අතර අන්‍යෝන්‍ය ආර්ථික සබඳතා වැඩිදියුණු කරන අනාගත ඉන්දු-ලංකා ආර්ථික හවුල්කාරිත්වය වැදගත් වන බව ජනාධිපති රනිල් වික්‍රමසිංහ මහතා අවධාරණය කළේය.
එය දෙරට අතර පවතින සංස්කෘතික බැඳීම ඉදිරියේදී තවදුරටත් ශක්තිමත් වීමට හේතුවනු ඇති බව ද ජනාධිපතිවරයා පැවසීය.
ජනාධිපති රනිල් වික්‍රමසිංහ මහතා මේ බව සඳහන් කළේ සිය දෙදින ඉන්දියානු නිල සංචාරයේදී ඊයේ (21) පෙරවරුවේ මාධ්‍ය වෙත අදහස් දක්වමිනි.
ශ්‍රී ලංකාව ස්ථීර ලෙස ආර්ථික ප්‍රතිසංස්කරණ ක්‍රියාත්මක කරමින් සිටින බවත්, ඒ හරහා දැනටමත් රට ස්ථාවර වීමේ සාධනීය ප්‍රතිඵල පෙන්නුම් කරමින් තිබෙන බවත් පැවසූ ජනාධිපතිවරයා ශ්‍රී ලංකාව මේ වන විට ලබා ඇති ප්‍රගතිය රටේ මෙන්ම බාහිර පාර්ශ්වයන්ගේ ද විශ්වාසය යළි ඇතිකිරීමට හේතු වී තිබෙන බව සඳහන් කළේය.
ජනාධිපති රනිල් වික්‍රමසිංහ මහතා ඉන්දියාවේ දී මාධ්‍ය වෙත කරනු ලැබු ප්‍රකාශයයි මේ.
‘‘අග්‍රාමාත්‍ය නරේන්ද්‍ර මෝදි මහතාගේ ආරාධනයෙන් නවදිල්ලියට පැමිණීමට ලැබීම මා ලද ගෞරවයක් ලෙස සලකනවා. පසුගිය වසරේ ජනාධිපති ධුරයට පත්වීමෙන් පසු මා ඉන්දියාවට පැමිණි පළමු අවස්ථාව මෙයයි. මේ සංචාරය මට සහ මගේ රජයට ඉතා වැදගත් සංචාරයක් බව කිවයුතුයි.මේ සංචාරයේ දී මට සහ මගේ දූත පිරිසට දැක් වූ ආගන්තුක සත්කාරය වෙනුවෙන් මම අගමැති මෝදි මහතාට සහ ඉන්දීය රජයට ස්තූතිවන්ත වෙනවා.
අද උදෑසන අගමැති මෝදි මහතා සහ මට අපේ රටවල මෙන්ම අපගේ ද්විපාර්ශ්වික සබඳතාවල මෑත කාලීන වර්ධනයන් පිළිබඳව දීර්ඝ ලෙස සමාලෝචනය කිරීමට අවස්ථාවක් ලැබුණා. ඉන්දියාවේ ජනතාවගේ වර්ධනය සහ සමෘද්ධිය සහතික කිරීම සඳහා ආර්ථික, යටිතල පහසුකම් සහ තාක්‍ෂණය යන ක්ෂේත්‍රයන්ගේ ප්‍රගතිය වෙනුවෙන් අගමැති මෝදිගේ නායකත්වය යටතේ ඉන්දියාව අඛණ්ඩව අත් කරගෙන ඇති විශිෂ්ට ප්‍රගතිය ගැන මම සුබ පතනවා.
ඉන්දියාවේ සංවර්ධනය අසල්වැසි රාජ්‍යයන්ට සහ ඉන්දියානු සාගර කලාපයට ප්‍රයෝජනවත් වනු ඇති බව අපි විශ්වාස කරනවා.
පසුගිය වසරේ ශ්‍රී ලංකාව ආර්ථික, සමාජීය සහ දේශපාලනික වශයෙන් අත්විඳින ලද අසාමාන්‍ය අභියෝග සහ මේ අභියෝග ජය ගැනීමේදී මා විසින් ප්‍රතිසංස්කරණමය ක්‍රියාමාර්ග ගණනාවක් ආරම්භ කළ බවට ද මම අග්‍රාමාත්‍ය මෝදි මහතා දැනුම්වත් කළා.
අපගේ මෑත ඉතිහාසයේ වඩාත්ම අභියෝගාත්මක කාල පරිච්ඡේදයේදී ඉන්දියාව, ශ්‍රී ලංකාවට ලබා දුන් සහයෝගය වෙනුවෙන් අගමැති මෝදි මහතාට, ඉන්දීය රජයට සහ ජනතාවට මම එහිදී හෘදයාංගම ස්තූතිය පළ කළා.
ශ්‍රී ලංකාවේ මෑතකාලීන තත්ත්වය සමාලෝචනය කිරීමේදී, රටේ සෑම ප්‍රදේශයකම ජීවත්වන සියලුම ජන කොටස්වලට ප්‍රතිලාභ සැලසෙන අයුරින්, යුක්තිය සහ සාධාරණත්වය සමඟ තිරසර හා ස්ථාවර සංවර්ධනයක් කරා ගෙන යන ආර්ථික ප්‍රකෘතියක් ඇති කිරීමට මගේ කැපවීම මම එහිදී මෝදි අගමැතිතුමා සමඟ සඳහන් කළා.
මෑත කාලීනව ගෙන ගිය වැඩපිළිවෙළ හේතුවෙන් ශ්‍රී ලංකාව මේ වන විට ආර්ථික ප්‍රතිසංස්කරණ මාවතකට යොමුව ඇති බවත් මේ ක්‍රියාමාර්ගවල ස්ථාවර ප්‍රතිඵල ශ්‍රී ලංකාව දැනටමත් අත්විඳිමින් සිටින බවත් අප රට ලබා ඇති එම ප්‍රගතිය පිළිබඳ අද රටේ මෙන්ම ජාත්‍යන්තරයේ ද විශ්වාසය ඇති වෙමින් පවතින බවත් මම මෝදි අග්‍රාමාත්‍යවරයා වෙත පැහැදිලි කළා.
ප්‍රතිසන්ධානය හා බලය බෙදීම සහ උතුරේ සංවර්ධන සැලැස්මේ බහුවිධ අංගයන් තවදුරටත් ඉදිරියට ගෙන යෑම සඳහා මා පසුගියදා ඉදිරිපත් කළ විස්තීර්ණ යෝජනාවලිය ගැන ද මම එතුමා සමඟ සාකච්ඡා කළා. මේ ක්‍රියාමාර්ග සම්බන්ධයෙන් සම්මුතියකින් යුතුව සහ ජාතික සමඟිය වෙනුවෙන් කටයුතු කරන ලෙස මම පාර්ලිමේන්තුවේ සියලුම පක්ෂ නායකයන්ට ආරාධනා කර තිබෙනවා.
මේ උත්සාහයන් පිළිබඳ අග්‍රාමාත්‍ය මෝදි මහතා සිය ප්‍රසාදය සහ සහයෝගය ප්‍රකාශ කළා. අප දැන් අපේ ආර්ථිකයට වැඩි ප්‍රතිලාභයක් හිමි වන හා රටට වැඩි ආදායමක් ලැබෙන මෙන්ම සෑම ප්‍රදේශයකටම ප්‍රතිලාභ ලැබෙන ආයෝජන අවස්ථා සමඟ රට සංවර්ධන මාවතට යොමු කළ යුතුව තිබෙනවා.
මේ අරමුණු සාක්ෂාත් කර ගැනීම සඳහා ශක්තිමත් ආධාරක පදනමක් ලෙස, වැඩිදියුණු කළ සම්බන්ධතාවකින් අනාගත ඉන්දු -ලංකා ආර්ථික හවුල්කාරිත්වය පිළිබඳ ඒකාබද්ධ දැක්මකට ද අප එකඟ වුණා.
අපගේ ද්විපාර්ශ්වික රාජ්‍ය තාන්ත්‍රික සබඳතාවලට 75 වසරක් සම්පූර්ණ වෙනවා. ඉදිරි දශක කීපයේ අපගේ අනාගත පරම්පරාවන් සඳහා ප්‍රතිලාභ ලබාගත හැකි අයුරින්, දෙරට අතර අන්‍යෝන්‍ය වශයෙන් වාසිදායක වන අන්තර්ක්‍රියාවලින් වඩාත් සුරක්ෂිත අනාගතයක් උදාකර ගැනීමට එම දැක්ම ඉවහල් වනු ඇති කියා මම විශ්වාස කරනවා.
අපගේ රටවල් දෙක අතර වසර දහස් ගණනාවක් පැරණි ශිෂ්ටාචාරමය, සංස්කෘතික, මානව සහ වාණිජ අන්තර්ක්‍රියා හරහා එම ඒකාබද්ධ දැක්මේ පදනම සැකසී තිබෙනවා. අප දෙරට අතර, සම්බන්ධතාව නමැති නූල ඉතිහාසය විසින් වියන ලද්දක්. ඒ නිසා අනාගතය සඳහා එවැනි දැක්මක් ආරම්භ කිරීමට වර්තමානයේ වඩාත්ම සුදුසු අවස්ථාව මෙය බව අප විශ්වාස කරනවා.
ඉන්දු – ශ්‍රී ලංකා ආර්ථික හවුල්කාරිත්වය පිළිබඳ අපගේ දැක්ම සාක්ෂාත් කර ගැනීම සඳහා මේ වන විට දෙරට අතර පවතින සම්බන්ධතා තීරණාත්මක කාර්යභාරයක් ඉටු කරන බව අප හඳුනාගෙන තිබෙනවා.
මෑතකදී චෙන්නායි සහ යාපනය අතර ගුවන් සේවා නැවත ආරම්භ කිරීම දෙරට අතර ගුවන් සම්බන්ධතාවයේ වැදගත් පියවරක්. අනෙකුත් ගමනාන්ත වෙත ගුවන් සම්බන්ධතා පුළුල් කිරීම සහ පලාලි ගුවන්තොටුපොළ තවදුරටත් සංවර්ධනය කිරීම මේ මූලාරම්භය සනිටුහන් කරනු ඇතැයි අප විශ්වාස කරනවා.
තලෙයිමන්නාරම – රාමේෂ්වරම් සහ නාගපට්නම් – කන්කසන්තුරේ අතර මඟී බෝට්ටු සේවා දෙරට අතර, මුහුදු ගමන් වර්ධනය කරනු ඇති. ශ්‍රී ලංකාව සහ ඉන්දියාව අතර, සම්බන්ධතාවන්හි අනෙකුත් ක්ෂේත්‍ර විමසා බැලීම ද ආර්ථික වර්ධනය ඉහළ නැංවීම සඳහා තවදුරටත් ඉවහල් වෙනවා.
නව සහ ප්‍රමුඛතා ක්ෂේත්‍රයන්හි ද්විපාර්ශ්වික වෙළෙඳාම සහ ආයෝජන වැඩිදියුණු කිරීම සඳහා ශ්‍රී ලංකාව සහ ඉන්දියාව අතර, ආර්ථික හා තාක්ෂණ සහයෝගිතා ගිවිසුම ඉතා වැදගත් බවට අප එකඟ වුණා. ඩිජිටල් තාක්‍ෂණය මෙහෙයවන සේවා සැපයීම සහ පුරවැසි කේන්ද්‍රීය සේවා සඳහා ඉන්දියානු සහාය පිළිගැනීමට ශ්‍රී ලංකාව කැමැත්තෙන් පසුවෙනවා.
රටවල් දෙක අතර, වැඩිදියුණු කරගන්නා සම්බන්ධතාවන් සංචාරක ව්‍යාපාරය, අන්තර් පුද්ගල හුවමාරු සහ සංස්කෘතික සබඳතා යන ක්ෂේත්‍රයන්හි සහයෝගිතාව ශක්තිමත් කිරීම සඳහා තීරණාත්මක කාර්යභාරයක් ඉටු කරනු ඇති බවට එකඟතාවක් අප අතර තිබෙනවා.
පශ්චාත් කොවිඩ් වසංගත ලෝකයේ ප්‍රතිලාභ ලබා ගැනීමට ශ්‍රී ලංකාවේ සංචාරක ව්‍යාපාරය සූදානමින් සිටින අතර, ඉන්දියාව දැනට ශ්‍රී ලංකාවට පැමිණෙන සංචාරක ව්‍යාපාරයේ ඉහළම වෙළෙඳපොළ වෙනවා. ශ්‍රී ලංකාවේ Unified Payments Interface (UPI) පදනම් කරගත් ඩිජිටල් ගෙවීම් සක්‍රීය කිරීම අනෙකුත් අංශවල තවදුරටත් වර්ධනයට ඉමහත් ලෙස පහසුකම් සපයනු ඇති.
හරිත ආර්ථිකයක් සඳහා ශ්‍රී ලංකාවේ ජාතික ප්‍රමුඛතා සහ ගෝලීය කැපවීම්වලට අනුකූලව, බලශක්ති සුරක්ෂිතතාව සහතික කිරීම සඳහා, හරිත හා පුනර්ජනනීය බලශක්ති සංවර්ධනය සඳහා ඉන්දියාව සමඟ හවුල් වීම ඉතා වටිනා අවස්ථාවක් ලෙස ශ්‍රී ලංකාව දකිනවා.
මේ සන්දර්භය තුළ, පුනර්ජනනීය බලශක්ති ක්ෂේත්‍රයේ සහයෝගිතාව සඳහා වූ අවබෝධතා ගිවිසුම සාර්ථක කර ගැනීමෙන් ශ්‍රී ලංකාව සහ ඉන්දියාව අතර, අධි ධාරිතා විදුලි අන්තර් සම්බන්ධතා ජාලයක් ස්ථාපිත කිරීමට හැකි වන අතර, එමඟින් දෙරට අතර ද්වි-මාර්ග විදුලි බල වෙළෙඳපොළට අවකාශ හිමි වෙනවා.
ඉන්දියාවේ සහාය ඇතිව ත්‍රිකුණාමලය ශ්‍රී ලංකාවේ බලශක්ති කේන්ද්‍රස්ථානයක් ලෙස සංවර්ධනය කිරීම සහ කර්මාන්ත සහ අනෙකුත් ආර්ථික ක්‍රියාකාරකම් සඳහා ද ත්‍රිකුණාමලය කේන්ද්‍රස්ථානයක් බවට පත් කර ගැනීම ශ්‍රී ලංකාවේ තීරණාත්මක ඉලක්කයක් වනවා.
ඉන්දියාවේ දකුණු ප්‍රදේශයේ සිට ශ්‍රී ලංකාව දක්වා බහු නිෂ්පාදන ඛනිජ තෙල් නල මාර්ගයක් ඉදිකිරීම, ශ්‍රී ලංකාව වෙත දැරිය හැකි සහ විශ්වාසදායක බලශක්ති සම්පත් සැපයුමක් සහතික කරනු ඇති බව අග්‍රාමාත්‍ය මෝදි සහ මම විශ්වාස කරනවා.
වැඩි සමාජ – ආර්ථික සංවර්ධනයක් අත්පත් කර ගැනීම සඳහා වන අපගේ පොදු උනන්දුව සාක්ෂාත් කර ගැනීම වෙනුවෙන් අපගේ ජනතාවගේ පෝෂණ තත්ත්වය ඉහළ නැංවීමට කිරි නිෂ්පාදන සහ සත්ත්ව පාලන ක්ෂේත්‍රවල දෙරට අතර සහයෝගිතාව වැඩිදියුණු කරන්නේ කෙසේද යන්න පිළිබඳව ද අප සාකච්ඡා කළා. අධ්‍යාපන ක්ෂේත්‍රයේ සහයෝගිතාව අපගේ ද්විපාර්ශ්වික සබඳතාවයේ ප්‍රධාන අංගයක් වනවා. ඉන්දියාවේ ආධාර ඇතිව ශ්‍රී ලංකාවේ නව උසස් අධ්‍යාපන ආයතන පිහිටුවීම වැදගත් බවත් අප විශ්වාස කරනවා. එය අපගේ තරුණ තරුණියන්ගේ දැනුම සහ කුසලතා ඉහළ නැංවීමට ඉවහල් වන අතර, ඔවුන් ජාතික සංවර්ධනයට දායක කර ගැනීමක් ද වෙනවා.
අපගේ ද්විපාර්ශ්වික සබඳතා සමාලෝචනය කිරීමට මෙන්ම භූගෝලීය සහ ඓතිහාසික සබඳතා ශක්තිමත් කර ගැනීමටත්, නූතන ලෝකයේ අනාගත අභිවෘද්ධිය සඳහා වන විශ්වාසය ශක්තිමත් කර ගැනීමටත් මගේ ඉන්දීය සංචාරය ඉවහල් වනු ඇති බව මම විශ්වාස කරනවා.
අද අප පැවැත්වූ සාකච්ඡා ඉන්දු-ලංකා සබඳතාවල ඉදිරි වසර 25 සඳහා අඩිතාලම වනු ඇත. ශ්‍රී ලංකාවේ තිරසර සංවර්ධනය, ජාතික සමගිය හා සියලුම ජන කොටස් අතර, සංහිඳියාව ඇති කර ශ්‍රී ලංකා ජනතාවට සමෘද්ධිමත් සහ සුරක්ෂිත අනාගතයක් නිර්මාණය කිරීම සඳහා වන මාගේ දැක්මට එය දායක වන බව කිව යුතුයි.’’
