පැරණි කෝන්තරයක් මත මහ රෑ නිවසකට කඩා වැදී ගැබිනි කාන්තාවකට පහර දී බරපතළ තුවාල සිදු කොට ඇති බව කියන සැකකරුවෙකු මේ මස 28 වැනිදා දක්වා රිමාන්ඩ් භාරයේ රඳවා තැබීමට ගම්පහ අතිරේක මහේස්ත්‍රාත් ෆාතිමා සහානා මහ්ජි මහත්මිය පෙරේදා (24) පස්වරුවේ නියෝග කළාය.
ඇඹරළුව දකුණ ප්‍රදේශයේ පදිංචි ජේ.ඒ. පුබුදු ඉෂාන් නමැත්තෙකු එසේ රිමාන්ඩ් කෙරිණි. පැරණි කෝන්තරයක් මත ඉකුත් 23 වැනිදා රාත්‍රී දකුණ ඇඹළුව ප්‍රදේශයේම නිවසකට කඩා වැදී එහි සිටි ගැබිනි කාන්තාවකට පහර දී බරපතළ තුවාල සිදු කොට ඇති බව කියන සිද්ධියක් සම්බන්ධව වැලිවේරිය පොලිසිය පරීක්ෂණ පවත්වා සැකකරු අත්අඩංගුවට ගෙන ඇත. වැලිවේරිය පොලිසියේ පොලිස් සැරයන් හෙට්ටිආරච්චි (46373) මහතා කරුණු වාර්තා කරමින් සැකකරු පැරණි කෝන්තරයක් මත නිවසට කඩා වැදී එහි සිටි නිවසියන් හට පහර දී ඇති බවත් එම පහර දීම් හේතුවෙන් ගැබිනි කාන්තාවකට බරපතල තුවාල සිදු වී ගම්පහ රෝහලට ඇතුළත් කර සිටින බවත් පවසා සිටියේය.
මෙහිදී පොලිසියේ කරුණු දැක්වීම්වලින් අනතුරුව එසේ සැකකරු රිමාන්ඩ් භාරයේ රඳවා තැබීමට නියෝග කෙරිණි.
මෙම නඩුව නැවත කැඳවීම මේ මස 28 වැනිදාට කල් තැබිණ.
