Home » පැය 20 කට පසු වගා ලිඳෙන් ගොඩට ආ වන අලියා

පැය 20 කට පසු වගා ලිඳෙන් ගොඩට ආ වන අලියා

by chanaka
September 6, 2023 3:02 pm 0 comment

තිරප්පනය පොලිස් වසමේ වෙල්ලමුදාව ප්‍රදේශයේ අනාරක්ෂිත වගා ලිඳකට වැටී සිටි වන අලියෙකු පැය 20 කට පමණ පසු ගොඩට ගැනීමට වනජීවී නිළධාරීන් ඊයේ(05) පස්වරුවේ කටයුතු කළහ.

මෙම වන අලියා තිරප්පනය, වෙල්ලමුදාව ගම්මානයේ නිවසක ගෙවත්තක තිබූ අනාරක්ෂිත වගා ලිඳකට පෙරේදා (04) රාත්‍රී 8.00 ට පමණ වැටී ඇති අතර, ඒ පිළිබඳව නිවැසියන් හා ගම්වාසීන් වන ජීවී නිළධාරීන් දැනුම්වත් කර ඇත.ඒ අනුව වන ජීවී නිළධාරීන් පැමිණ අදාළ ස්ථානය නිරීක්ෂණය කර ඇති අතර, අලියා නිරුපද්‍රිතව වගා ලිඳ තුළ සිටීම හේතුවෙන් ඊයේ බැකෝ යන්ත්‍රයක් ආධාරයෙන් වගා ලිදෙහි බැම්ම කපා වන අලියා ගොඩට ගැනීමට සැලසුම් කර තිබිණි.

මෙම වගා ලිඳ අඩි 30කට ආසන්න ගැඹුරකින් යුතු විශාල වගා ලිඳක් වන අතර බැකෝ යන්ත්‍රයක් රැගෙන විත් වගා ලිඳ අසල පස් තට්ටුව ඉවත් කිරීමට ආරම්භ කළ නමුත් වගා ලිඳෙහි පවතින ගැඹුර හේතුවෙන් පැය ගණනක් එම බැකෝ යන්ත්‍රයට මගින් එම කටයුත්ත සිදු කිරීමට සිදුව තිබුණි. ඒ අනුව වගා ලිඳ තුළ වන අලියා පැය 20 කට වැඩි කාළයක් රැදෙමින් වගා ලිඳෙන් ගොඩ ඒමට උත්සහ දරමින් රැදී සිටියේය.

පෙරේදා (04) රාත්‍රී 8.00 පමණ සිට වගා ලිඳ තුළ සිට ගොඩට ඒමට උත්සහ කළ වන අලියාද ඊයේ(05) පස්වරුව වන විට වල තුළ එහා මෙහා ගොස්, ගොඩට ඒමට උත්සහ දැරීමෙන් හෙම්බත් වී සිටින අයුරුද දැකගත හැකි විය.

මෙම වන අලියාගේ එක් ඇසක් තුවාල වී ඇති අතර, වගා ලිඳට වැටෙන අවස්ථාවේ එහි තිබූ කෝටුවක් ඇනීමෙන් ඇස තුවාල වන්නට ඇතැයි ප්‍රදේශවාසීන් පවසති.

පළමුව කුඩා බැකෝ යන්ත්‍රයක් ආධාරයෙන් ලිං බැම්ම අසල කපා අලියා ගොඩට ගැනීමට උත්සහ කළද, පැය කීපයක උත්සහයකින් පසු එය අතැහැර දැමුවේ ලිදෙහි පවතින ගැඹුර හේතුවෙන් එම බැකෝ යන්ත්‍රය මගින් පැය ගණනක් බැම්ම කැපීමට සිදු වීම හේතුවෙනි.ඒ වෙනුවට ඊට වඩා ප්‍රමාණයෙන් විශාල බැකෝ යන්ත්‍රයක් ගෙන ඒමට පසුව වන ජීවී නිළධාරීන් කටයුතු කළ අතර, පස්වරු 05.00 ට පමණ වගා ලිඳට වැටුණු වන අලියා ගොඩට ගැනීමට හැකිව ඇත.

වගා ලිඳෙන් ගොඩට පැමිණි වන අලියා නල්ලමුදාව රක්ෂිත ප්‍රදේශයට දිව ගියේය.

(තිසර සමල් – අනුරාධපුර)

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT