ජාතික ඔලිම්පික් කමිටුව සමඟ අතුවැල් බැඳ ක්‍රීඩාව ඩිජිටල්කරණයට යොමු කරමින් ශ්‍රී ලංකා ඊ ස්පෝට්ස් සංගමය මුල් වරට ආසියානු ක්‍රීඩා උලෙළට ඊ ස්පෝට්ස් ක්‍රීඩක කණ්ඩායමක් යොමු කරයි. ක්‍රීඩකයින් සිවුදෙනකුගෙන් සමන්විත මෙම කණ්ඩායම චීනය බලා පිටත්වන අතර, එහිදී ශ්‍රී ලංකාවට පදක්කමක් දිනා දීම එකම අපේක්ෂාව බව ශ්‍රී ලංකා ඊ ස්පොට්ස් සංගමයේ සභාපති රවීන් විජේතිලක මහතා පැවැසීය.
බලංගොඩ ආනන්ද මෛත්‍රී විදුහලේ ශිෂ්‍ය චමුදිත ධර්මසිරිගේ නායකත්වයෙන් සහභාගීවන ඊ ස්පොට්ස් පිලට වත්තල ලයිසියම් ජාත්‍යන්තර පාසලේ මොහොමඩ් රිස්වි, කටුනේරිය සාන්ත සෙබස්තියන් ජාතික පාසලේ රමේෂ් ප්‍රනාන්දු හා කොළඹ අමල් ජාත්‍යන්තර පාසලේ මොහොමඩ් රිහාම් යන ක්‍රීඩකයින් ඇතුලත්ව සිටිති.
මෙවර ආසියානු ක්‍රීඩා උලෙළේ ඊ ස්පොට්ස් තරගවලට රටවල් 25කින් තරගකරුවන් ඉදිරිපත්ව ඇති අතර, මෙයට මාසයකට පමණ පෙර පැවැති තරගාවලියකදී ශ්‍රී ලංකා පිල සිවුවැනි ස්ථානයට පත්ව ඇත. එහිදී වියට්නාමය, තායිලන්තය හා මියන්මාරය මුල් ස්ථාන තුන දිනා ගත්හ.
“මේ කණ්ඩායම තෝරා ගත්තේ ශ්‍රී ලංකාවේ ඊ ස්පෝට්ස් තරගාවලියක් පවත්වායි. පසුගිය තරගාවලියට පාසල් ළමුන් 2700ක් පමණ එක්ව සිටියා. දැන් ඊ ස්පෝට්ස් ක්‍රීඩාව අපේ රටේ ප්‍රචලිත වෙමින් පවතිනවා. ආසියානු ක්‍රීඩා උලෙළින් පසු පදක්කම් දිනා මේ ක්‍රීඩාව තවත් අවධානයට ලක්වේවි“ ශ්‍රී ලංකා ඊ ස්පොට්ස් සංගමයේ සභාපති රවීන් විජේතිලක මහතා පැවැසීය.
