ණය ප්රතිව්යුහගතකරණය අවසන් අදියරට පැමිණ ඇති බවත්, එය අවසන් වූ වහාම විදේශ ආයෝජකයන්ට වේගවත්ව නැගී එන ශ්රී ලංකා ආර්ථිකයේ කොටස්කරුවන් වීමේ මහගු අවස්ථාව උදාවන බවත් වැඩ බලන මුදල් අමාත්ය ශෙහාන් සේමසිංහ මහතා පවසයි.
සිදු කෙරෙමින් පවතින ආර්ථික ප්රතිසංස්කරණ තුළිත් ඇති වන තිරසර ආර්ථික වර්ධනය ආයෝජකයන්ට වඩාත් සුදුසු වටපිටාවක් නිර්මාණය කරනු ඇති බව අමාත්යවරයා සඳහන් කළේය.
මෙරට අමෙරිකානු වාණිජ මණ්ඩලයේ 31 වැනි වාර්ෂික මහා සභා රැස්වීමේ ප්රධාන දෙසුම පවත්වමින් අමාත්යවරයා ඊයේ (27) මේ බව කියා සිටියේ ය.
වැඩි දුරටත් අදහස් දැක් වූ සේමසිංහ මහතා මෙසේ ද පැවැසීය.
මෙරට කලක් තිස්සේ පැවැති ආර්ථික දුර්වලතාවන්ට පිළිතුරු සපයමින් ආර්ථිකයේ ව්යුහාත්මක වෙනස්කම් සිදු කෙරෙමින් පවතියි. මෙය ශ්රී ලංකාව කෙරෙහි දේශීය මෙන් ම විදේශීය ආයෝජකයන්ගේ විශ්වාසය යළි දිනා ගැනීමේ අවස්ථාව උදා කරනු ඇත. දුර්වල වෙමින් පැවැති රාජ්ය ආදායම් තත්ත්වය වර්ධනය කර ගැනීම සඳහා රජය විසින් බදු ප්රතිසංස්කරණ ක්රියාවලියකට අවතීර්ණ වූ අතර එහි ප්රතිඵලයක් ලෙස වසරේ මුල් මාස 6 තුළ ඉකුත් වසරට සාපේක්ෂව 50%ක වර්ධනයක් අත් කර ගැනීමට සමත් විය. වසරේ මුල් මාස 6 තුළ ප්රාථමික ගිණුම ධන අගයක පවත්වාගෙන යාමට හැකි වූයේ වියදම් කළමනාකරණයේ සහ ආදායම් ඉහළ නංවා ගැනීමේ ප්රතිඵලයක් ලෙසිනි. බදු ක්රියාවලිය තව දුරටත් විධිමත් කිරීමේ අරමුණින් ආරම්භ කළ ආදායම් පරිපාලන කළමනාකරණ තොරතුරු පද්ධතිය (RAMIS) ලබන සතිය වන විට යාවත්කාලීන කරමින් ක්රියාත්මක කිරීමට හැකි වනු ඇති බව අමාත්යවරයා පැවසීය.
ශ්රී ලංකාව ආර්ථික වශයෙන් වැදගත් රටවල් වන ඉන්දියාව, චීනය සහ තායිලන්තය සමග ද්වීපාර්ශ්වික නිදහස් වෙළෙඳ ගිවිසුම් පිළිබඳ සාකච්ඡා යළි ආරම්භ කර ඇති බවත් ඒවායේ සාර්ථකත්වය මත කලාපීය විස්තීරණ ආර්ථික සහයෝගීතාවකට අවතීර්ණ වීමේ හැකියාව ශ්රී ලංකාවට ඇති බවත් අමාත්යවරයා කියා සිටියේ ය. මේ සියල්ල තුළින් ශ්රී ලංකාව විදේශීය ඍජු ආයෝජන සඳහා සුවිශේෂී ප්රවේශයක් ලබා ගනු ඇති බව සේමසිංහ මහතා වැඩි දුරටත් සඳහන් කළේය.
මෙරට අමෙරිකානු තානාපතිනී Julie Chung මහත්මිය සහ ශ්රී ලංකාවේ ක්රියාත්මක අමෙරිකානු සමාගම් ප්රධානීහු රැසක් ද මෙම අවස්ථාවට එක්ව සිටියහ.
