පවතින අයහපත් කාලගුණ තත්ත්වය හේතුවෙන් මාතර දිස්ත්‍රික්කයේ ආපදාවට පත් ප්‍රදේශවල නිරීක්‍ෂණ චාරිකාවක ආරක්‍ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන් මහතා ඊයේ (08) නිරත විය.
ආපදා හේතුවෙන් අවතැන් වී සිටින ජනතාවට සහන සැලසීම සඳහා රජය මේවන විටත් පියවර ගෙන ඇති අතර,ඔවුන්ට සහන සැලසීම සඳහා ත්‍රිවිධ හමුදාව ඇතුළු සහන සේවා කණ්ඩායම් විශාල පිරිසක් එම ප්‍රදේශ වලට කැඳවා ඇත.
ආපදාවට ලක්ව සිටින ජනතාවට ආහාර සැපයීම සඳහා මාලිම්බඩ හා මාතර ප්‍රදේශවල ශ්‍රී ලංකා යුද හමුදාව විසින් පවත්වාගෙන යන ආහාර පිසින ස්ථාන වෙත ගිය අමාත්‍යවරයා පවතින ගැටලු සම්බන්ධයෙන් සොයා බැලීමක් සිදුකල අතර, එම ස්ථානවල දිවා රෑ නොබලා කැපවී වැඩ කරන භට පිරිස් දිරිමත් කර ප්‍රශංසාවට ලක්කරන ලදි. ආපදාවට පත් ජනතාවට පිසු ආහාර ඇතුළු අනෙකුත් අවශ්‍යතා මේ වන විට ත්‍රිවිධ හමුදාවේ භට පිරිස් විසින් සැපයීමට ක්‍රියාමර්ග ගෙන ඇත.
දිස්ත්‍රික් ලේකම් ඇතුළු අනෙකුත් රාජ්‍ය ආයතන ප්‍රධානින්, ප්‍රදේශයේ ත්‍රිවිධ හමුදා ප්‍රධානින් සහ පොලිස් ප්‍රධානීන් සමඟ අවතැන්වී සිටින ජනතාවට සහන සැලසීම සඳහා ගත යුතු ඉදිරි පියවරයන් සම්බන්ධයෙන් ශ්‍රී ලංකා පාර්ලිමේන්තුවේ කතානායක මහින්ද යාපා අබේවර්ධන මහතා හා අමාත්‍ය තෙන්නකෝන් මහතාගේ ප්‍රධානත්වයෙන් මාතර දිස්ත්‍රික් ලේකම් කාර්යාලයේදී සාකච්ඡාවක් ද සිදුකරන ලදි. මීට අමතරව මෙම සාකච්ඡාව සඳහා මාතර දිස්ත්‍රික් පාර්ලිමේන්තු මන්ත්‍රි නිපුන රණවක මහතා ද එක්විය.
අනතුරුව ආපදාවට පත් ප්‍රදේශ වලත්, යුද හමුදාව විසින් අත්තුඩාවේ ගංවතුර අවම කරගැනීම සඳහා වැලි කොට්ට අධාරයෙන් ඉදිකර ඇති වේල්ල නිරීක්‍ෂණය කිරීමටත් ද එක් වන ලදි.මෙම නිරීක්‍ෂණ චාරිකාව සඳහා පාර්ලිමේන්තුවේ කතානායක මහින්ද යාපා අබේවර්ධන මහතා, දිස්ත්‍රික් ලේකම් ඇතුළු ප්‍රදේශයේ රාජ්‍යය ආයතන වල බලධාරීන් පිරිසක් හා 61 වන සේනාංකයේ සේනාංකාධිපති මේජර් ජෙනරල් ආර්.ඒ.ජේ.ඒන් රණසිංහ ප්‍රමුඛ ජ්‍යෙෂ්ඨ යුද හමුදා හා නාවික හමුදා,ගුවන් හමුදා ජ්‍යෙෂ්ඨ නිලධාරීන් මෙන්ම ප්‍රදේශය භාර ජ්‍යෙෂ්ඨ පොලිස් නිලධාරීන් පිරිසක් ද එක්ව සිටියහ.
